فضيحة مدوية كشفها برنامج "الفساد" عن رشاوى النائب كنعان في المتن
وأدنى مستوى تخاطب ممكن أن يصل إليه من يدعي الإصلاح والتغيير
CLick Here to Watch The video on Youtube
Click Here to download

فضيحة مدوية كشفها تلفزيون "الجديد" ضمن برنامج "الفساد" بالأسماء والوقائع حول قيام النائب ابراهيم كنعان بشراء مئات الأصوات في المتن خلال الإنتخابات النيابية وكنعان يتصل بالبرنامج ويفقد أعصابه ويبدأ بالشتائم يميناً ويساراً على الهواء مباشرة.

وفي سياق الإتصال الذي قام بها نائب "التغيير والإصلاح" ابراهيم كنعان قالت مقدمة برنامج "الفساد" غادة عيد: "سأقدم دعوى ضدك لاهانتك وكلامك الفذ في اتصالك واتهاماتك".

وقالت: "كنتم تركضون إلى البرنامج لأنه كان يفتح برامج خصومك، أما اليوم وبعد أن فتحنا بعض ملفاتكم اتهمتمونا بتركيب الأخبار واتهمتمونا بالكذب الإعلامي"، وقالت: "يحق لكم انتقاد الآخرين ولا يحق لهم بانتقادكم".

وبدأ اتصال النائب كنعان بالصراخ لأن الاتصال الذي سبقه قد استفزه بعدما تناول الموضوع فتح ملفات محرجة لكنعان ولـ"تكتل التغيير والإصلاح"، واتهمها كنعان بالفساد و"قلة الشرف".

وتوجه كنعان إلى عيد مهدداً بفضح ملفات البرنامج والتقدم بدعاوى قضائية ضدها وذلك على خلفية استضافتها المواطن نبيل الفلا، الذي عمل لصالح كنعان وأخيه بول كنعان في الانتخابات النيابية. وقد اشتكى "الفلا" من عدم تسديد شيكات حررها كنعان باسمه، لقاء خدماته الانتخابية، وقدم كل المستندات المتعلقة بذلك.

أما بعض مما جاء على لسان النائب كنعان ضد مقدمة البرنامج فكان: "يا عيب الشوم" و"فشرتي"، وصولاً الى "إجري أنظف منك ومن برنامجك"، مروراً بـ "فشرتي وأنتي رأس الفساد في برنامج الفساد"، و"انتي اندفعلك مصاري لتشوهي سمعة التيار الوطني الحر"، و"انا اشرف منك وبعرف وين كنتي يا بلا أخلاق"، معتبرا انها تفتح حلقة "لإهانة الناس".

وقد "فضحت" الحلقة الكثير من الحقائق التي تشوب النائب كنعان، فقد أظهر التقرير مواطنين كانوا يعملون عند النائب كنعان وأكدوا أنهم كانوا موكلون من قبله لشراء الأصوات وحجز بطاقات الهوية ورشوة الناخبين وتوزيع مال على الناخبين في المتن الشمالي من أجل التصويت لصالحه.

وكانت ردة فعل النائب كنعان مثيرة للدهشة من حيث تصرفه وصراخه وشتائمه فاقداً لأعصابه بشكل غير أخلاقي لا يليق بنائب في المجلس النيابي ولا يليق أن يعرض على الهواء على الإطلاق.


أما الحديث الذي لا يليق بنائب لبناني في وجه المقدمة غادة عيد فحصل على الشكل الآتي:

عيد: ولكن بدي قول هون انو ما بقا معنا إلا السيد نبيل، إذا بعدين في شي رد، إلو حق الرد طبعاً.

كنعان: بتشكرك وبتشكر مهنيتك وبتشكرك تطلعي شخصي متل أستاذ فلا يطلع يفتح كل هالموضوع (عيد تقاطع وتقول: ما هوي .. هلق بطل يعجبنك يا استاذ ابراهيم؟)

كنعان: خليني رد، انت اليوم عملتي اغتيال، اغتيال سياسي (عيد: إذا بتسمح بتحافظ على هدوءك واحترامك للبرنامج لو سمحت)

كنعان: يا عيب الشوم عليكي، بس بدي قلك انو أنا بنفي هالكلام جملة وتفصيلاً (عيد تقاطع: في شخص عم بيقول انو في إلو منك مال، لقاء الخدمات التي قام بها)

كنعان: هيدا الموضوع انتي مدبرتي وحدا دافعلك "ويستمر بكيل الشتائم" (عيد: أنا بتحداك، لو سمحت بتحافظ على احترامك للحلقة، لو سمحت)

كنعان:يا عيب الشوم، انت فاسدة، انت فاسدة وكل العالم بتعرفك، انت رحتي على مكتب ميشال المر. يا عيب الشوم. (عيد: أنا بتأسف من انو توصل لهالمستوى من الكلام، الكل بيعرف انو برنامج الفساد ما حدا ...، لمن انتو كنتو بدكن تعترضو على النائب ميشال المر كنتو تجو عهالبرنامج، لمن بدكن تعترضو على خصومكن تجو عهالبرنامج وممنوع حدا يعترض عأداءكن يا استاذ ابراهيم؟)

كنعان مستمر بكيل الشتائم في حين عيد كانت تقول جملتها ويستمر: يا بلا أخلاق، يا عيب الشوم عليكي.

عيد: معليش إذا بدك تحكي أنا بدي إحكي وصوتي بدو يضل أعلى من صوتكن ونحنا بهالبرنامج عمنعمل مكافحة للفساد والهبرنامج هو التغيير والإصلاح الحقيقي".

كنعان: أنا بدي ارفع دعوى قضائية، انا أنضف منك انت (عيد: أنا بدي ارفع عليك دعوى قضائية بتهمة توجيه الإهانة للبرنامج، وأنا بدي احتفظ بالإدعاء عليك بإهانة البرنامج، هيدا البرنامج بيفتح ملفات لو كانت لكل السياسيين وما حدا عمل متل ما انت عملت).

كنعان: أنا رح ادعي بالقضاء والقانون ورح بتشوفي لأنو كل اللي حكيتي كذب.

عيد: اوكي، في قضاء وفيك تتفضل عالقضاء من دون ما تصرخ، وتطلع تعيط ومن دون ما تعمل تهديد عالهوى لو سمحت، في قضاء بتتفضل عالقضاء، بدك ترد على الشخص اللي معو شيكات باسمك واللي اشتغل لإلك وهلق انت عم تحتقرو.

كنعان: ما حدا اشتغل لإلي، ما بعرفو لهيدا الشخص.

عيد: ليش طلبت انو يطلع من الاستديو قبل ما تطلع حضرتك، لي ما واجهتو؟

كنعان: وين بدي واجهو؟ انا ناقصك؟ ما عندي غيرك أنا؟

عيد: ليش طلبت تحت الهوى انو انت بتطلع بتحكي إذا هوي ترك الاستديو؟

كنعان: فشرتي، انت عم تكذبي، انت عم تكذبي.

عيد: انت عم تهين، انت عم تهين يا استاذ ابراهيم وانا ما بسمحلك، هيدا البرنامج فوق كل الإهانات، فوق كل الشبهات وأكد هيدا البرنامج انو فوق كل الشبهات. (كنعان: ما حدا هانك) نحنا ما بدنا تكتل التغيير والإصلاح يكون متل النائب نقولا فتوش اللي ما دفع للناس بونات البنزين. نحنا كنا منتأمل منك تكون أفضل...

كنعان: بتحداكي، بتحداكي، ولا ليرة دفعنا (عيد: أكيد ما دفعت ما أخدتن ووعدتن وما عطيتن، لأنو لازم تدفع وما دفعت).

كنعان: ليكي، ليكي، قصصك بعرفها (عيد: لا لا، قلة التهذيب كتير، انت بتقول قصصك بعرفها؟ سميلي قصة إذا بدك تحكي حكي وقائع ما تحكي بالعناوين، زهقنا من عناوينكن، زهقنا من الشعارات الكبيرة (كنعان يقاطع: انت عندك موقف ضدنا)

تتابع عيد: بتتفضل بتحكي وقائع، الإنسان اللي كان عالهوا، كان هم بيسمي أسماء ووقائع.

كنعان: هيدا سمسار، سمسار زغير هيدا.

عيد: كل العالم بتعرف نزاهة البرنامج وانتو قبل كل العالم بتعرفو انو غادة عيد بتكافح الفساد بطريقة منطقية وغير مسيسة وما عندا طموح سياسي بالموضوع ولا مصلحة.

كنعان: ليكي، بكل دول العالم (عيد تقاطع: ما تقول ليكي، احترمني تأحترمك، ما بتحترمني ما بحترمك، لو سمحت، احترمني لاحترمك).

كنعان: مني طالب منك احترام، ما بتعنيني أبداً، ما بتعنيني أبداً. فشرت كلو كذب بكذب.

عيد: بدك تحترمني لإحترمك، انت طلبت انو يفل الأستاذ الموجود هونيك وأنا بحترمو كمان مين ما كان يكون لأنو قدر يواجهك بالحقيقة.

كنعان: هيدا واحد قمرجي، وسمسار وهيدا هوي اعترف انو مش آخذ ولا ليرة منّا.

(الضيف الذي كان موجوداً يقول: قمرجي يعني بيعرفو كنعان)

كنعان: عيب عليكي، عيب عليكي تركبي قصص انت، عيب، عيب.

عيد: عيب؟ أنا بشكرك أستاذ كنعان على حسن تعاطيك مع البرنامج. أول مرة تنتقد كنائب تغيير وإصلاح. تنتقد بهالبرنامج. انا هون بدي قول ووجه تحية لكل اللي انتقدت اداءهم وكتبت ملفاتهم خلال الفترة الماضية اللي كانوا ديمقراطية وعندن حضارة بالتصرف أكثر من الحضارة اللي انت بينت للشعب اللبناني كلو انك ما بتتمتع فيها.

كنعان: يا عيب الشوم عليكي عهالأخلاق.

تتابع عيد: وإنو الإصلاح الحقيقي بدأ من هيدي المحطة.

كنعان: انت فاتحة حلقة فساد لأنك انت فاسدة وانا فاتحة حلقة بس تتهيني الناس. انت ما بتفهمي قانون وما بتفهمي قضاء وما بتعرفي وقائع وما خصك بالمهنة.

عيد: ما بقا فيي اسكت عإهاناتك لأنو ما تعودت اسكت على حدا وصوتي بدو يضل عالي والناس كلها رح تعرف انو صوتي بدو يبقى عالي وأنا عم بحكي الصدق ولو على حساب نفسي بكل الأداء اللي مارسته بالإعلام وكل العالم بتعرفني مين أنا. (كنعان: بتحداكي تفتحي ملف مغارة جعيتا).

عيد: بتمنى إذا عندك شي تروح عالقضاء، انت محامي والجأ للقضاء، ما تلجأ للشتائم عيب، (كنعان يقول: عيب، يا عيب الشوم)

عيد تتابع: ما تقول عيب، عيب عليك انك تحكي بهالطريقة.

كنعان: يا عيب الشوم عليكي، هيدا سمسار وفي بحقو 32 دعوة افتراء.

... عيد تحاول إنهاء الحلقة مع ضيفها وهنا يفقد النائب كنعان أعصابه ويصرخ:
اسمعي، اسمعي، 32 دعوة بحقه، يا عيب الشوم عليكي بتطلعي واحد متل هيدا؟

عيد: يا عيب الشوم عليي طلع واحد متل هيدا بس مش يا عيب الشوم عليكن بتشتغلو مع واحد متل هيدا مع احترامي للشخص إذا كنت عم تقول هيك وعم تحقر هالإنسان، قول، يا عيب الشوم عليك لأنك انت اشتغلت معه. لو سمحت أنا ما بقدر اسكت عن إهانات حدا. لو سمحت، لا إنت ولا اللي أكبر منك بهينني عالهواء.

"كنعان مع حديث غادة عيد يستمر بالشتم والصراخ": بدي اعرف وين كنتي وبمكتب مين؟ مبلا مبلا.

عيد: شكراً لكل اللي عم تحكي وللشعارات ومواضيع الإنشاء اللي عم تحكيها.

كنعان: أنا بدي احكيكي لأنو أنا أشرف منك وأنا اسمي أنضف منك وأنضف من كل الزعران...

عيد: أنا بشكرك، نضافة الإسم مش انت بتمنحها لنفسك، نضافة الإسم بتمنحا الناس للشخص وبتمنحا الناس لأداء الشخص وأنا واثقة بتعرف مين غادة عيد، ومين برنامج الفساد، أنا بشكرك، شكراً إلك استاذ جوني وبتمنى النائب ابراهيم كنعان أكثر ديمقراطية لأنو نحنا تعودنا انو ننتقد كل اللي عندن أخطاء، واليوم أنا بتحداه انو يكون عندو ملف عن أي خصم من خصومه وأنا ما طلعه عالهواء. أنا تعودت انو استقبل كل الناس بهالبرنامج والناس منا عبيد تنشغلها ونكبها ونحتقرها. هودي اللي إجو عندن قضية وأوراق وشكوى، ممكن انو كان يعترض قدامن وممكن كان يسمع ردن، وهوي طلب انو ما يكونو موجودين بالحلقة ويطلع يحكي من دون ما يكونوا موجودين ونحنا عملنا لي بدو ياه وتركنا الاستديو التاني وكنا حابين نسمعله بس الهيئة انو طريقة الاهانات والعيطة ورفع الصوت هيي المعتمدة ولكن ما بتنفع ببرنامج الفساد اللي حيبقا صوتو عالي، صوتو عالي فوق الجميع لأنو هيدا البرنامج عم بيعبر بصدق عن كل اللي عم بيصير بالبلد ورح يبقى ومن هيدي المحطة انطلق التغيير والإصلاح ومكافحة الفساد ورح تبقى مكافحة الفساد الحقيقية من محطة النيو تي في ومن برنامج الفساد وعفواً بدي اعتذر من كل المشاهدين، أنا صوتي لازم كان يعلا لأنو ما ممكن انو أنا يوطا صوتي، أنا صاحبة حق، صاحبة حق لأنو هالحق هيدا هوي إلكن ومنكن ورح يبقى صوتي عالي، ما عندي شي خاف منو، ولا عندي شي استحي منو، وبتمنى انو النائب ابراهيم كنعان بس يروق يكون راجع حساباتو ويعرف انو أخطأ جداً في التعاطي مع برنامج الفساد، كان في يكون أكثر ديمقراطية، ما بعرف أي نظام كنا رح نروح إلو لو كان في هلقد هالتحكم الدكتاتوري من دون أي طريقة حتى حضارية بالتعاطي مع أمور إعلامية، دايماً الحق معنا لو شو ما كان.