سلة بو سعدى

يا تعتيري يا دللي
رَبّالي بقلبي علة
ناتع حالو قبل الضو
يعبّي الميِّ بالسلة

ناتع حالو قبل الضو
مبسوط ورايقلو الجو
مدردش عا طريق العين
يدق عاصدرو بالإيدتين
و لربوعما يصللي
لتساع الميّ السلة
ويحلف بـ الله ويقول
نقطة لغيروا ما مخلي
واللي منوّش مصدق
يتفضل يشوف السلة

سلة بو سعدى عتيقة
مليانة أشكال ولوان
من سوريا الشقيقة:
زبيب ودبس ورمان
ومن إيران الصديقة
وفستق من شغل السودان
ومن بلاد الهند والسند
وحتى من بلاد اليونان
وتا ما ينسى أفريقيا
ناتع معو كم سعدان
يعني أورطة ترللّي
كيف سايعتهم هالسلة؟

بطل ومصدق حالو
بس بيخاف من خيالو
إذا حدا ومالو
بيفركها متل البسين
وبيقللك إن هاجمني الكون
ما راح يتغيرلي لون
باقي مطرحي وما بزيح
ويا جبل ما يهزك ريح
وان زحت هونيك العلة
منين بدكن تجيبوا سلة؟

هيدي سلة سحرية
مليانة مبادرات
ووثائق وتفاهمات
بتصلح لكل الأجيال
وقال اللي خلف ما مات!!!
بس أنا عندي بنات
حاطط صهري بالسلة
وعا جمالو عمّا دَلّي
الله يقطع القلّة
شو هي سلة ورتات؟

صاحبنا وصل عالعين
أو قبل منا بشبرين
وصار يفرك كف بكف
كيف خلفوا كان ماشي الصف
كيف الكرسي ناطريتو
وعم يتغاوى بطائيتو
نجوم السما ما بتكفي
تزين كتفوا شي نتفة
طب ليعبي السلة
وطب برقبتو الكف
و من خلفوا فرط الصف
وما بيقيلوا إلا الحلم
ناتعو بقلب السلة
ويا عيني ملا غلّة