الى روح الرفيق الشهيد رياض منير ابي خطار في الذكرى السنوية الأولى لإستشهاده

 

يا معشر القوات يا معهد قيم                                     يا حلم بكرا وفخر ماضينا المنير
يا مسيرة تضحية وجهد وألم                                     من محبسة مارون لشهادة بشير
يا محبرة وكتاب يا ورقة وقلم                                    بالسلم لعجين الوطن ملح وخمير
يا درع استقلال بالدم انرسم                                      يا منارة مشعشعة بحكمة “سمير”
يا رجال يا أبطال يا نخوه وهمم                                 كلما بساحات الوغى دق النفير
متل النسور بتهدروا من هالقمم                                كرمال تحموا حدود لبنان الكبير
•         *           *
مبارح بنومي شفت رياض الفدا                             لابس جناح وعن بيسبح بالضباب
طاير بدنيي حدودها وسع المدى                             فيها المحبه والوئام بلا الوهاب
غمرتو وغمرني وصار يسأل عالهدا                      عن حال خيّ وأخت عن عز الصّحاب
عن ارض حب ترابها وروحو هدا                         لأرزاتها الخضرا تا تشمخ عا لسحاب
قلتله بجبلا يا خييّ ما حدا                                    صدّق معك هالقد بيطول الغياب
ولم مرّ  عام وما سمعنالك صدا                             ولا اجا منك رسالة ولا جواب
عرفناك مع يوسف الزغبي اللّي غدا                       صوب العلا من سنين ما ودّا كتاب
عرفناك مع باسم الغالي بمنتدا                              الله بعد ما لدعوتك الله استجاب
مننطر تعودوا كل ما البلبل شدا                             وشفّق صباح النور نورو بالهضاب
مننطر تعودوا مع حباحيب الندا                            مع جيش رعد وبرق بيشّف الحجاب
اتنهّد وقلّي عمرنا نحنا ابتدا                                ارض الطهاره والقداسه بلا حساب
وعاطول كنا نسمع اصوات الندا                           لكن بشرع الرب يلي بتعرفوا
                        صعبه الروح الخالدي ترجع تراب

 

قلتله ولنّوا بشي ليلة قدر                                  عودوا كرامة قلب عالهجران داب
لطلة رجوع الفارس اشتاق النظر                        طلّوا كرامة أهل عينن عالبواب
انتوا بشرع الكون آيات وعبر                            انتوا دليل الناس عا دروب الصواب
انتوا مدارس مجد وشموخ وكبر                        انتوا بقلب قلوبنا اغلى احباب
عودوا وشوفوا الشر ببلادي انتشر                     غابات ارز الرب حجبّها الضباب
وصنين ودّا لقرنة السودا خبر                           بيروت هجمت عا ضواحيها الدياب
وقلب البلد غرقان” بيكرد ونور”                        بدل البراج العالية بنيوا طناب
والناس صارت عايشه بخوف وحذر                    ما فيش مين يرد عنها الإغتصاب
وانتوا ولولا اسمكن وحدو انذكر                        كافي يرجع جيش هتلر عالكعاب
عودوا وشوفوا كيف “قصرور” افتكر                لولا لبس عاللون ليموني تياب
قادر يركّع سبع عالدهر انتصر                         عملاق من ارزة بشري قلب جاب
يركّع حكيم وقايد وجودو ندر                           بيقصر عرّم بو حنين عالعقاب
عودوا وقولوا كلمتين بمختصر                        معقول يبقى ديب صاطي بقلب غاب
لكن ولولا نهار عابالوا خطر                           يهجم عا مملكة الرجال الخالدي

                         بيوصل عليها ديب بسّ بلا نياب

اطلعت شفتو رف بجناحو وراح                       شالح عا كتفو غيمة البيضا وشاح
عليها كتب متل الحكم بحروف نور                   تتكون عبرة بكل حيّ وكل ناح
لبنان قدره شموخ عا مرّ الدهور                     وقدر الأعادي لكاحلو ما يوصلوا

                             ونحنا قدرنا الموت عا صليب الكفاح

 

الشاعر ميشال طانويس سركيس
جبلا في 20 كانون الثاني 2008