يا ربي…

يا ربي…
شادي نبيه سعد

يا بي،
رح أحكيلك حكايات،
عن لبنان
وأبطال في صاروا
ع صدرو محفورين أيقونات،
وتراتيل مكتوبين ع حجاروا.
صورهن تعلا بـ مزارات،
وع ركن كل بيت
وبـ قلب دارو.
من ألف وخمسمية سني هيهات
الظلم يمحين من التاريخ وفكارو،
وجيال تكتب بدمها
بطولات،
وفن الشهادي تغوص بـ سرارو.
ولهالعالم عم تبعت رسالات
يحملها بـ هواه وبـ بحارو،
بـ صرخات عم تعصف غنيات،
تـ ترد المحتل
وتمحي أثارو.

من الدامور للـ قاع ولقنات،
وزحلة والأشرفية وبدارو،
وترشيش والشوف والقبيات،
وبـ كل جبال لبنان وبـ أنهاروا،
وع كل تلي من هـ التلات،
نسور حلقوا بالسما طاروا،
وغرسوا صليب بوج الويلات،
يحمي الوطن من الغدر وأشراروا.
وسيدة حريصا متل هالإمات
تبكي فرح بـ عرس الشهيد ونهارو.
وتحت فيت وع تراب الأرزات
دمن
خطوط حمر انرسموا وداروا،
وتجمعوا بمحبة رزمة تضحيات
وجباه تعلى
ع الطغيان وإعصارو
وما دام حبّوا لبذل الذات،
رح يبقى لبنان ما دامها القوات
محافظي ع حضارتو وأفكارو.

شادي نبيه سعد
حمانا ايلول 2008