خلية الاعلام تحيي ذكرى ميلاد الشيخ بشير الجميل
"المطلوب اليوم وبأسرع وقت انجاز المصالحة المسيحية – المسيحية لننظم الاختلاف لما يصير خلاف يتحول الى مواجهات دامية ترجعنا للسنين السودا يلي ما صدقنا خلصنا منا"، هذا ما اعلنه رئيس خلية "القوات اللبنانية" في كلية الاعلام والتوثيق الفرع الثاني الرفيق جوزيف شعيا في احتفال أقامه طلاّب القوات اللبنانية في الكليّة في ذكرى ميلاد مؤسس القوات اللبنانية الشيخ بشير الجميل.
وقال شعيا: "المطلوب اليوم يكون عنا قيادات سياسية واعية لشبابها مش لكراسيها، المطلوب زعامات تستثمر مراكزها لخدمة المواطنين مش تستثمر أصوات الناخبين لتأخذ المجتمع بغير مساره التاريخي، لأن مجتمعنا متحرك وبيعرف يحاسب وانتخابات جامعة سيدة اللويزة والجامعة اليسوعية منن الا دليل زغير انه وقت الحكم قرب ورح يصيح الديك ليوعي النايمين على فراش السبعينات ليقلن نحنا بل 2009 وأن مسيحي لبنان خطن التاريخي هو السير خلف بكركي مش مهاجمتها وإنّو البطرك هوي الغطاء الشرعي الوحيد لأي مصالحة بدّا تصير وإنو رئاسة الجمهورية منّا فرق عملة بينصرف ببنوك المال الطاهر. لكلّ هالثوابت نحنا قاومنا. لكلّ هالثوابت رح نضلّ نقاوم لكّل هالثوابت بشير حيّ فينا".
وتابع شعيا: "إذا في جماعات مفكّرة تعمل بلبنان يلي السوري والفلسطيني ما قدرو يعملو بسلاحن وجيوشن لهل الجماعات بالتحديد عم نرجع نكرّر الحديث ونقول: يلي السوري ما قدر يعملو بلبنان ما انعمل لأنّو في شباب رفضوا يركعو عرفو إنو الأوطان ما بتنبنى إلاّ ما يندفع تمنا دمّ نحنا كقوّات لبنانيّة ولاد المقاومة وبيّا وإمّا وكلّ أهلها جاهزين نقاوم كلّ محاولات سورنة لبنان أو جعلو شقفة زغيرة بمنظومة ولاية الفقيه الكبيرة ونحنا كلّ يوم مصممين نكفّي بمشروعنا الإستقلالي للآخر ليبقى لبنان واحة حرّيّة ببقعة من العالم انفقدت فيها كلّ المقوّمات لحتى الإنسان المسيحي يعيش بمجتمع حرّ وإلو حقوقو. مسيحيّي لبنان ما بحياتن كانو سلعة بتنشرى وبتنباع بمزادات الدول أو بتتبدّل بكراسي رح تختفي بمرور الزمن . مسيحيي لبنان هني شعب حفر تاريخو ومقاومتو بصخور قنّوبين، بتراب زحلة وعين الرمانة والأشرفيّة والجبل وشرقي صيدا وبعتبة كلّ بيت أو دير انكسر عبوابو محتلّ. مسيحيي لبنان هنّي أجيال من طينة مار يوحنا مارون ويوسف بك كرم وطانيوس شاهين وبشير الجميّل وسمير جعجع".
وتطرق شعيا في خضم حديثه الى الوضع الجامعي وأكد: "لنكفّي مقاومتنا بنفس أقوى وبروح جديدة ضروري نحدّد خطواتنا بكلّ جوانبها أوّل خطوة مبلشين فيا من زمان، كتار لحقونا عليها وكتار مصرّين يواجهونا فيا نغمة إلغاء الفروع التانية يلي عم ترجع تنعزف بأبواق بعض اللي عم يحلمو، هيدي النغمة اللي كلّفتنا الغالي والرخيص لنواجها ، رمزي عيراني وبيار بولس ما ماتو بحادث سير أو سكتة قلبيّة هودي شباب استشهدو لأنّن قاومو الإحتلال السوري بكل جوانبو وأوّل هالجوانب هيي معركة إلغاء الفروع التانية. الفروع التانية ما رح تكون لقمة هينة بتمّ الطامعين هيدي صروح أسّسها الشيخ بشير الجميّل، صمدت بعد استشهادو وما بتنمحى طالما التاريخ رح يذكرها كإنجاز من إنجازاتو. لمدراء هيدي الفروع يلي عم يمنعونا كلّ سنة نكرّم بشير بالطريقة والمكان المناسبين منتأمّل منن يتذكّروا شغلة زغيرة، لو ما بشير ويلي كان بشير يمثلو بوقتا ما كان ممكن يكون في فروع تانيي يعملو مدراء عليها وياخدو فيها هيك قرارات. مش مشكلة بشير منكرمو بقلوبنا بالأوّل وإذا نزركنا منضهر منكرمو عالطريق لأنو بشير حي فينا مش بالمظاهر الرنانة والاحتفالات الكبيرة. اليوم المطلوب واحد دمج الفروع التانيي بمحلّ واحد بس الأكيد مش بالحدث أو ببيروت المطلوب إتمام المشروع اللي قرّو مجلس الوزراء بإنشاء مجمع بيار الجميّل" بالفنار وهيدي الوسيلة الوحيدة المتاحة قدّام رئيس الجام عة لدمج هيدي الفروع. والمطلوب تسريع العمل بالمراسيم التنظيميّة للـ LMDبأسرع وقت ممكن لتبقى الجامعة اللبنانيّة منارة للعلم وتخرّج روّاد علم متل ما خرّجت روّاد وطنيّة وحريّة وسيادة.”
الاحتفال أقيم في كافيتيريا الجامعة، نظراً لعدم موافقة المدير الكلية على إقامته داخل قاعة الشهيد "جبران تويني"، وقدمه ابنة المعتقل في السجون السورية، الرفيق بطرس خوند، رنا خوند التي أكدت بدورها على ان القائد البشير الذي عشق لبنان فحمل صليبه واستشهد لأجل اللبنانيين كل اللبنانيين عن الانسان قيمة وحرية سقط فانغرس في ترابات الشرق وأساطيره وتاريخه، أما المستقبل مستقبل لبنان، فمهما كبرت مشاكله وتعقدت قضاياه فلا خوف عليه لأن الشيخ بشير الذي عاند الاقدار وتمرس في صنع القرار أيام الحرب عرف كيف يبني الحرية ولأمن والعدالة لمرحلة السلام واستحق عن جدارة أن يكون هو رجل المستقبل".