منقول متل ما هوي بيقول

منقول متل ما هوي بيقول
أنطوان بيطار

حوار بين 2 عونيين، واحد مستغرب شو عم بيصير والتاني مستغرب كيف الأول مستغرب:

الأول: كيف؟؟ هوّي قال هيك؟؟ ما مبارح قال انو سوريا مرتكبة جريمة اغتيال الحريري وكل جرائم الاغتيال بلبنان من 30 سنة؟ اليوم بطلت هيي المرتكبة كل هالجرايم؟
التاني: يا صاحبي مبارح مش متل اليوم. اليوم غير شي. ما الجنرال قال هيك!
الأول: هوي قال هيك؟؟ إذا هوي قال هيك يعني صحيح سوريا ما إلها علاقة، لأنو الجنرال بيشوف لبعيد وما بيغلط أبدا.

الأول: دخلك! مش هوي قال انو سلاح حزب الله سلاح عميل لإيران وسوريا وسلاح فتنة؟
التاني: يا صاحبي تغيّر الحال ورجال حزب الله صاروا أصحابنا وسلاحن صار سلاح مقاومة ولازم يبقى… هوي قلنا هيك.
الأول: هوي قال هيك؟؟ إذا هوي قال هيك لكان متل ما هوي بيقول نحنا منقول!

التاني: وكمان النظام بسوريا سنة 1989 شي وبالـ 2008 شي تاني… صاروا أحبابنا وحلفائنا.
الأول: مين قال؟؟ ما بعدو النظام البعثي نفسو، لا تغيّر ولا صار ديموقراطي وهوي كان أكد أنو نظام بشار متل نظام بيّو…
التاني: بس هوي قال انو تغيّر ومنشان هيك عملن زيارة ملوكية واستقبلوه استقبال الأبطال…
الأول: إذا هوي قال هيك يعني هيك مظبوط… الجنرال ما بيغلط ونحنا منقول متل ما هوي بيقول.
الأول: بس بما أنو صرنا أصحاب معن ليه ما منخلص من قصة مزارع شبعا اللي عم تبقى حجة تا إسرائيل تهاجمنا؟ ليه ما منجيب الورقة من سوريا حتى تصير تحت القرار 425 ونسترجعها؟
التاني: يا صاحبي ما هوي قال انو السوريين قالولو إنا لبنانية ومش بحاجة لورقة!!
الأول: من دون ورقة حتى؟ إذا هوي قال هيك ما في مشكل نحنا كمان منقول هيك.

الأول: بس يا صاحبي شو عمل بالمعتقلين بالسجون السورية؟ جابن معو من سوريا لما زار بشار؟
التاني: هوي قال انو المعتقلين مش من مسؤوليتو وانو في لجان بتعالج الموضوع… شو خصو هوي؟!
الأول: هوي قال هيك؟ إذا الجنرال قال هيك يعني معو حق. ونحنا منقول متل ما هوي بيقول.

الأول: بتعرف يا صاحبي؟ حاسس أنو صرنا متل المبنّجين؟
التاني: لأ يا صاحبي… أوعا… ما تقول هيك تا هوي يقول…