ليش عون راح عا سوريا؟
مارك معلوف
– ليجرب الطيران السوري
– لأ ليشوف بشار الأسد
– لأ ليأكل برازق
– لأ ليمثل المسيحيي
– اي مسيحيي تبع لبنان؟ او ليمثل عمسيحية سوريا ؟
– كيف يعني ؟
– ما شفتو قعد عاكرسة الرئاسة (يعني عالشمال) وعمل جولة عالمناطق المسيحية بسوريا. وزار صيدنايا.
– اخد مرتو معو ؟
– انا ما شفتا
– ولا انا شفتا، قولكن جبلا شوية قطنيات من سوق الحمدية ؟
– هلق عرفنا ليش راح عا سوريا ليكل برازق ويزور صيدنايا ويجيب شوية قطنيات.
– اكيد عمل شي تاني مش بس كرمال هيك
– ما بعرف يمكن معك حق بس نحنا هالقد منعرف شو بيعملوا بسوريا
– الجنرال اكيد عمل شي اهم واكبر من عقلنا
– لالا ما عمل شي الجنرال بيحكي اللي بقلبو عراس لسانو
– الجنرال دغري ما بلف ولا بدور
– اي اي تذكرت طالب يغير اتفاق الطائف
– ليش اتفاق الطائف بين لبنان وسوريا
– لأ اتفاق الطائف بين نواب لبنان واتفقوا عليه بالسعودية (لأنّو كان في حرب بلبنان)
– مش عم بفهم الجنرال نائب وعندو كتير نواب ما بيعرف انّو سوريا ما الا علاقة، هيدا لازم ينطرح بمجلس النواب اللبناني.
– راح معو كمان بنتو وصهره
– ما بعرف انا شفت ابراهيم ونبيل وسليم وعباس
– ونسوانن
– ما بعرف انا ما شفت نسوان ولا شفت جبران
– الهيئة كانو كلّن نواب
– نام عون بالطيارة ؟
– لأ المشوار قصير
– راحو دغري عالشام ؟
– هيك قالو
– بس نام بالشام ؟
– نام وشبع نوم قعد جمعة
– جاب معو هدايا ؟
– ما بعرف ناطرين ليبينوا عليهن
– جاب معو معتقلين؟
– لأ بس كل اللي راحوا معو بهل المشوار رجعوا معو.
– ما ترك حدا بالشام ؟
– والله مرجلة للجنرال بطل ، كل اللي راحو معو رجعن معو.
– يا ريت بدلن بكم واحد من اللي راحو قبل كان ريحن شوي وتوزعت البهدلة والعذابات على الكل.
– والله ما كان حدا غلبوا خصوصي انو الطقم القديم اصلي اكتر (100% تيار) وصار مجرب بيعرف يخلّص حالو وهيك هيك بفرد مرّة الشبيبة الجديدة بتعمل دورة تخصص.
– كان في شتي بسوريا ؟
– اي شتت بسوريا وبلبنان بس بلبنان التبزيق غلب الشتي .
– وين انبسط الجنرال اكتر بسوريا او بإيران ؟
– بالإتنين بس اقل بكتير من بسط الايرانية والسورية بالجنرال .
– عرفنا انو شدو كتير عالجنرال يعيد الزيارة بكل فرصة مناسبة
– وهوي قبل ؟
– ما بعرف الجنرال عادة هوي اللي بقرر .
– هوي قرر يعطل رئاسة الجمهورية بتتذكروا وهوي قرر الحصار عالغربية وطرابلس وصيدا …….وهوي قرر التحرير………. وهوي قرر الإلغاء ………… وهوي قرر التفاهم ……….. وهوي قرر زيارات ايران وسوريا ………
واله. يطوّل بعمرو ليلحق يقرر اكتر واكتر آخرتنا …………..