شحوار التاريخ

شحوار التاريخ
جوزيف حدشيتي

ألارجح انو التاريخ جبان! ما بيخلّي حدا يفوت الا اذا كان متوّج بالدم او حامل بايدو جمجمة.
جبان! لانو بيفوت ع صفحاتو ناس متل نيرون وجحا ويوضاس….
الابريا، النضاف، الاوادم، اللي ايدين بيضا..بيفوتوا من ورا ضهرو…
اصحاب البطولة اللي اسما التضحية بالذات كرمال البقيي…
البطولي اللي اسما الشهادي، اصحابا بيفوتوا غصب عنو…
بس اللي بيعزّي واللي بيكبّر القلب.. انو ما بيعود فيه يطلعّن.

ايّا تاريخ بعدو قادر يطلّع براتو فتيل ثورة الارز….ايا تاريخ بيسترجي ما يحفر ع صفحة بلاد الارز اسم رفيق الحريري.

ليش لحد هلق قدر التاريخ يطلّع عن صفحاتو كمال جنبلاط، وحسن خالد وبشير الجميل، ورينيه معوض وداني شمعون والمفتي خالد؟؟؟؟

ايّا تاريخ بيسترجي ما يفوت باسل فليحان وسمير قصير وجورج حاوي وجبران التويني وبيار الجميل ووليد عيدو وانطوان غانم، وفرنسوا الحاج ووسام عيد وسامر حنا وكل ابرياء ثورة الارز؟؟؟؟

ايّا تاريخ بيسترجي يوقف بوج مروان حمادة والياس المر ومي شدياق….

هلق بيقولولنا رجعوا يعدوا….كيف ما بدنا نعدّن ونتذكرن وهني اللي حفروا استقلال لبنان بالدم..
ايا تاريخ بيقدر ما يسجل ع صفحاتو السود، اسامي المجرمين اللي رح تنكتب بالشحوار والزفت، عا قوس لاهاي!

يا شعب 14 اذار
الشعب اللي عندو قيادات مستعدة تموت عنّو…بالتأكيد هوي غير الشعب اللي قياداتو بتخوض حروبا فيه وبتودّي ت يستشهد عنا…..وبالتأكيد هيدا الشعب رح يفوت ع صفحات التاريخ البيض غصب عنو…من هون فينا نقول بكل فخر وبصوت عالي وتيبقى لبنان – لبنان:
مجد لشهدائنا،سلام لارضنا، خلاص لشعبنا….
ليش الموت كان تحوّل لشهادة لولا قدسية هالقضية الثالوث؟

 
الشهدا !!!نيال اهلن اللي انغطوا بالبكي، ما دام هني الفعل والبقوة حكي..
بس لأ…..لأ ما بقى نقبل انو ام الشهيد واختو يضلوا عايشين عالابر ، خوتان وناطرين …
وام واخت وعشيرة الحرامي والسفاح والطنبرجي مشنشلين بالدهب…

يا لبنانيي….يا ولاد 14 اذار…
30 سني، ممنوع علينا نعرف ليش مصلوبين….30 سنة عم نتخبط بين القاعدي والشواز…30 سنة عاملين من لبنان تنّورة مرا…
فزعانين ع لبناننا…..ايه فزعانين…تلفانين جوّات وبرّات لبناننا….ايه تلفانين..قرفانين من لبنانون…ولك ايه قرفانين….مقهورين ع التمن اللي اندفع….ايه مقهورين…

بس ….ما حلّن يعرفو انو نحنا اخترعنا الشهادي….ما منموت!
ما حلّون يعرفوا انو شلوشنا من لبنان ما بتنشال!
ما حلّون يعرفوا انو طرابلس هيي طرابلس لبنان ومنا طرابلس الشام!
ما حلّون يعرفوا انو طريق عروبتنا ما بتمرق بسوريا!
ما حلّون يعرفوا انو طريق اسلامنا ما بتمرق بطهران!
ما حلّون يعرفوا انو بيروت رح تضل عروسة الشرق!
ما حلّون يعرفوا انو بيروت منا تل ابيب ….ولاْ ما رح تختفي!
ما حلّون يعرفوا انو كلنا تركنا سلاحنا ت كلنا نتسلّح بالجيش والمؤسسات الامنية الشرعية.
ما حلّون يعرفوا انو لأ لأ… ما بقى نخلّي الموت يرقص ويشرب من كاسنا ت يعمرّوا بلادن ع دمّاتنا وخيراتنا….

حسّوا بقا…. اسكتوا… اصمتوا… بيكفي بلف…شبعنا هز صابيع وتقطيش ايدين …حاج ملهيين بسبّ الدين وبالتعطيل والتخوين وتسكير الطرقات وحرق الاعلام والدواليب، بنصب الخيم وفك الخيم والغزو والتسلبط ع الناس وارزاق الناس.

من بعد التجربة…..ما بتستحقوا تكونوا حتى معارضة…لانو المعارضة بتعارض ت تصحح الخلل بالسلطة، بتعارض ت تبني مش ت تعطّل وتشلّ الاعناق والارزاق…

 
ولك هس…. لبنان باقي…لبنان للناس اللي دفعوا التمن عن كذبكن.. لبنان ما بعمرو حني للموت ….لبنان رح ينتصر غصب عنكن.
كونوا ع ثقة، انو نحنا هون بالانتشار، منتنفس صلاه، كل ما تقدمتو خطوة، او حققتو انجاز باتجاه هالهدف المقدس، ومنتحسر حزن والم كل ما اجا يوضاس يصلبلنا لبنان ع النار…

بين واحد ندل والتاني لئيم، يوضاس يسلّم شعبنا للدبح والارتهان، وقادتنا ورموزنا للتطاول والاساءة.
يوضاس بيقبض حق خيانتو… تعيينو عسكري ع بواب سلطة نيرون، او ناطور ع عتاب دولة عم تحلم تصير امبراطورية ع ضهر دم ولادنا.
يوضاس بيضرب من الزنار وبالنازل، كل التضحيات اللي دفعتوها باجسادكن وعقولكن ومستقبلكن…كرمال يبقالنا وطن..
وطن.. ارضو وشعبو بيعشقوا مشيئة السما
ارضو وشعبو للاسف مزنرين ببيئة ديكتاتوريات عسكرية وتيولوجية، ما بيعنيلا من الانسان والفرد والجماعة الا انو تعوزون ممسحة لاحلاما الفاشلة والرخيصة.

سعادة النايب
منحلفك برفيق الحريري وبكل شهدا ثورة الارز…
منحلفك بجمهور 14 اذار الصادق والطيب…واللي فاجأ الكل..
منحلفك بالشهيد الاخير لطفي زين الدين….منحلفك بلبنان…لا بقى تقبلوا تكونوا ردة الفعل..
شهدائنا ماتوا ت انتو ونحنا وثورة الارز نكون الفعل…
عبد السلطة ما بيقدر يكون الفعل…شهود الزور ما بتقدر تكون نواطير ع الحق.
اماني برقبتك كونوا الفعل..وما تخلّوا لبنان يتحول آلة بأيد عبيد…

ما تخلوا لبنان يصير مرقد للصوص والطبول الفارغة اللي عم تضج بالكفر والحقد والمصالح الآنية العابرة.
بالاخير، ما بيبقى الا نهني الرئيس الشهيد رفيق الحريري…وكل شهداء ثورة الارز …منهنين ع ايمانن بلبنان، ومعن منهني كل لبناني آمن بلبنان….منهني كل لبناني آمن بانو رسالتو هيي وطن اسمو لبنان، وانو وطنو هوي رسالة، وصل صداها الطيب لكل الدني.

(كلمة 14 اذار في ذكرى استشهاد الرئيس رفيق الحريري في سيدني اوستراليا في حضور النائب احمد فتفت القاها مسؤول الاعداد والتوجيه في القوات اللبنانية في سيدني جوزف حدشيتي)