إمرأة لبنانية: "ليش بدّي إنتخب القوات و14 آذار؟؟"
هيدا المقال وردنا من امرأة لبنانية كتير حلوة واكيد كتير ذكية ، وهي بتعرف منيح مين بدا تنتخب، يللي بيهمه الامر وبدو يعرف لمين بدا تصوت ما الو الا انو يقرا هيدا المقال:
ليش بدّي إنتخب القوات و14 آذار؟؟
أنا ما رح بنتخب نكاية بعون!!!
رح إحكي عن الإشيا اللي شفتا من الـ 2000 لهلأ… ليش من الـ 2000؟ لأنو عمري 29 سنة ومن الـ 2000 لهلأ شفت وقشعت وحلّلت وقتنعت وما نطرت حدا يخبّرني…
شفت شباب القوات مش بس عم ياكلوا خبيط… شفتن عم يستشهدوا… وبسأل ليه؟ في حدا يقلّي ليه قتلوا رمزي عيراني؟ أزعر؟ فشروا… مجرم؟ فشروا… لأنّو قوات وبس… يتّمو جاد وياسمينا…لأنو بيّون قوات.
ليه قتلوا بيار الجميّل؟ في حدا يقلّي ليه؟ خافوا منّو…
ليه جرّبوا يقتلوا مي شدياق؟ في حدا يقلّي ليه؟ لأنّو صوتا عالي والحقيقة بتجرح…
شفت رجال من 14 آذار عم يستشهدوا… ليه؟ في حدا يقلّي ليه؟
أنا خيّي قوات وجوزي عوني… وبس قلّو لجوزي عم يهدّدوا خيّي… بيقلّي:"خلّي ينضب، أحسن ما يعملولوا قصّة إلو ولعيلتوا!"
معقول؟ بدال ما جوزي يدافع عن حرّية الرأي؟؟؟ عفوا جوزي عم بدافع عن حريّة الرأي، بس حرّية نصرالله وعون والباقين مش مهم أصلا شو بيفكروا.
ليه 14 آذار؟
لأنّن ما كانوا عم يتسلّوا ويقتلوا حالن تا العالم تشفق علين. كان في طرف عم يقتلن. والقتل ما بيجي من الخير.
لأنو قريت الإستراتيجية الدفاعية يلي قدّموها جعجع وعون، وحلمت عيش بالبلد الي عم يطمح إلو جعجع وخفت، إيه خفت، من البلد الي بدّو يعيّشنا في عون.
لأنو بدي عيش بسلام. لأنو شفت الفرق بين تظاهرات 14 آذار وشغب فريق 8 آذار.
لأنو شفت قادة بـ 14 آذار مستعدين يضحّوا بالغالي والرخيص كرمال لبنان. وشفت حسن نصرالله مش مسترجي يطلع من تحت الأرض.
لأنو أنا عملت حسابات خطوط التشريج الألفا وشفت كيف عم بيكذّب عليّ باسيل.
لأنّو رفيقتي الشيعية خبّرتني كيف ما بيدفعوا كهربا، كيف عمّروا بيتن بلا رخصة، وكيف بياكلوا قتلة الدرك اللي بيجربوا يشيلوا مخالفة عندن بالحي.
لأنّو عم بحضر أوقات الـ OTV و شوف كيف سامح عون سوريا والضباط الـ 4 وكيف عم يعملوا حلقات مفبركة عن القوّات تا يزيدوا الحقد بين المسيحيين.
لأنّي مسيحيّة وما بقبل حدا يهين البطرك. ولأني شفت شو عملو بشربل خليل وقت حلقة نصرالله، وبكيت لما سمعت شو حكيو العونيّة عن راس كنيستنا.
إذا بدّي كفي ما بخلص… بس بدّي إرجع قول: "لأنّي شفت وقشعت وحلّلت واقتنعت وما نطرت حدا يخبّرني… بدّي إنتخب القوات و14 آذار.
أ.ن