كلمة الرفيق ميشال بو عبود خلال مهرجان لائحة "زحلة بالقلب" في حوش الامراء ـ زحلة
اشمخي يا ارض حوش الأمارة الأبية
بشموخك كل اهل الكون ساحو
ويا اهلنا الجيتو عن صدق نية
تعيدو لزحلة مجدها وللقلب افراحو
انتو لهللايحة دعمة اساسية
وانتو رايات النصر بالجو لاحو
وانتو جناح طير قواتنا اللبنانية
وشو نفع الطير لولا من جناحو
منرحب فيكون بحوش الأمراء اجمل ترحيب
منرحب فيكون بأرض البطولة والكرامة والوفا
منرحب فيكون بقلب زحلة، يا أعضاء لايحة زحلة بالقلب، معالي الدكتور نقولا فتوش، والمناضل ايلي ماروني، والدكتور طوني ابو خاطر، والمهندس جوزف المعلوف، والدكتور عاصم عراجي، وعملاق الصحافة عقاب صقر، وخيي وحبيب قلبي الأستاذ شانت جنجنيان.
منرحب فيكون يا نخبة نخبة أبناء زحلة والبقاع، انتو أبناء زحلة النابض بالكرامة والعنفوان، انتو اللي رح ترفعو اسم زحلة بالعالي.
زحلة عروس البقاع ومربى الأسود عم تطلع فيكون وتقول: لازم يلي دافع عن الأرض وسقاها دم وعرق ودموع بحقّلو يعيش فيها بعزّة وكرامة.
انتو اللي رح تاخدونا عا زمن جديد، زمن غير اللي عيّشونا فيه، وبأي زمن هني بعدون عايشين، بأيا ماضي هني بعدون مأسورين، عايشين عا نبش القبور، عايشين عا كذبة كبيرة وعا حقد أعمى. كل يلي ضدون نصابين وفاسدين، ومصدقين حالون انو هني شي مهم كتير، انو هني درجة أولى، بس نسوا يمكن انو نحنا صرلنا سنين عم نتبهدل ونموت وراسنا مرفوع، وما رح نرضى بايام السلم والأمان نوطي راسنا، انتو رفعت راسنا، انتو بتقررو مستقبلنا ومستقبل ولادنا.
ما منرضى غير الجيش اللبناني يحمينا، وما بدنا يتصيدو أبطال الجيش ويقولو هيدي السما مش إلهون وهيدي السما إلنا، السما كلنا لإلنا والأرض كلنا لإلنا، وهيك بدنا، ومثل ما بدنا بدو يصير، والسما زرقا ورح تبقى زرقا.
ومثل ما الأشرفية كانت بداية البشير ورح تبقى، هيك زحلة كانت ملحمة صمود وبطولة ورح ترجع، انتو رح ترجّعو لزحلة الأصالة، أصالة العنفوان والكرامة.
7 أيار كان يوم ذل وارهاب وعار، وبـ 7 حزيران رح نعلمون كيف بتكون البطولة والشهامة، وكيف رح منرد الكرامة لزحلة، ومنوعدهن انو حوش الأمراء رح تكون مدرسة يتعلمو منا كيف الأبطال بتخوض المعارك مش بس بأيام الحرب كمان بأيام السلم والأمان.
بـ7 حزيران رح نقلون انو الكلمة والبسمة أقوى من سلاحون،
بـ7 حزيران رح نزرع الأمل والرجاء مطرح الشك والضغينة،
بـ7 حزيران رح نرد المجد لصحابو، ونقلو لسيد بكركي انت البطرك با سيدنا ومجد لبنان لإلك وحدك وأبواب الجحيم ما رح تقدر عليك.
بـ7 حزيران رح نقلون انو نحنا يلي دفعنا أغلى ما عنا كرمال شرفنا، هيدا الشرف ما بينباع بكنوز الدني، هيدا الشرف يلي عم يكتب التاريخ، ومش ممكن بلحظة من اللحظات انو نشوه التاريخ ونعتذر من يلي شردنا ودمر بيوتنا ويتّم اولادنا.
بـ7 حزيران رح نعتذر من ابطالنا وشهدائنا، وبس، وفشروا نعتذر من حدا تاني، منعتذر من ابطال زحلة وحوش الأمراء، ومنقلون نحنا أوفياء لالكون، يمكن بفترة معينة غلبنا النسيان بس بعد اليوم مش مسموح ننسى ونحنا على خطاكون وعلى دعساتكون رح نكمل المشوار.
بـ7 حزيران رح نقول لأماتنا وبياتنا اللي خلف ما مات، خلقنا أبطال ورح نصوت كأبطال قوات وأحرار وكتائب وتجمع ومستقبل، وغير زحلة بالقلب ما منرضى والسما زرقا.
بـ7 حزيران رح نعلمون انو يلي بدو يتحالف مع سلاح خارج اطار الشرعية ما الو مكان بيناتنا.
بـ7 حزيران رح نعلمون انو زرع الفتن والحقد بطّل مسموح، رح نعلمون انو تزوير الحقايق والتاريخ صار من الماضي.
بـ7 حزيران رح نتذكر كل شهدائنا وكل اسرانا ورح نقلون انو الزحف والتزلف ممنوع ونقطة عالسطر.
بـ7 حزيران رح نعلمون انو حرق الدواليب وتسكير الطرقات ممنوع عا ارض القداسة والكرامة، اذا بدون يحرقو دواليب يروحو يحرقوها بنفوسون المهترية والمعفنة.
بـ7 حزيران رح نقلون مين هني ومين نحنا، هني عندون بشر بتعيش تا تدمر بيوت، ونحنا عنا أبطال بتموت تا تعمر بلاد.
يا ابن زحلة يلي عشت العمر محروم
وحدك بتم الدهر غنيي
مروج المجد بإيدك شقعتا نجوم
بتركعلك تصلي ومستحيي
يا نسر فوق الأرز عو بتحوم
من عنفوانك اندفقت الحنيي
لولاك استقلال لبنان ما بيدوم
ولولاك ما خلقت الحريي.