كرمال هيك رح تنتخبو عون؟؟؟
بقلم امرأة لبنانية
"انتو اصطفلو نحنا منحب عون ورح منصوتلو. هيدا زلمي وطني مش متل جعجع قتّيل قتلا".
هيدي الجملة اللي حافظينا العونية وواقفين عندا. هون بيوقف تفكيرن. مش مستعدين يشوفو ويسمعو غير اللي بتخبرن ياه وسائل الإعلام العونية الخبيرة بالفبركات والتحريض وزرع الأحقاد.
طيّب بس ما عم بقدر إفهم، كيف؟ وبعد كل الوقايع اللي عم بتصير مع أدلّة مظبوطة (ومش مفبركة)، بعدن راكضين ورا عون اللي بيحكي عن شي وبيعمل عكسو تماما. أنا عم جرّب آخر مرّة قبل الإنتخابات، بركي حدا بيوعا:
يا عونيّة:
1 – ما بدّو مين يذكركن بالصورة المزوّرة اللي عرضا عون على المنار تا يتّهم شباب القوات
2 – وأكيد شفتو خبرية ابراهيم كنعان كيف ادّعا على شباب القوات إنو هني قوّصوا عليه وفجأة سحب الدعوى بكل محبة لأنو منيح. وبيّن كذبن الفاضح لما بيّن الفيديو تبع كاميرا المراقبة لي أظهرت كيف إنو جماعة كنعان هني اللي قوّصوا.
3 – وأكيد لازم تشوفو الفيديو اللي عم يطلب في عون من مناصرينو يوزعو الإشاعة عن نايلة تويني.
4 – أكيد كمان حضرتو جبران باسيل مع مرسيل غانم كيف صار ينكر الإشيا الموجودة ببرنامجن الإنتخابي 2005 وبيّنو كيف انقلبو على المبادئ اللي على أساسا العالم انتخبوهن بال 2005
5 – مع باسيل ما بتخلص هون الخبرية:" رخّص خطوط التلفون" واو ….صار بدل الإتصال ندق 3 تا نحكي كلمتين. صارو الخطوط يفوتو ببعضن، هيدا غير إنو التشريج غلي ما رخص.
6 – وأكيد سمعتو الإهانات اللي توجهت للشهداء من عون. وإنتو أكيد ضد بشير وبيار وجبران وكل الشهدا…
7 – والأهم إنتو مع محاسبة الشهيد سامر حنا يلي: مين سمحلو يطير بطيارتو مطرح ما بتدرّب عناصر "حزب الله"، واكيد مش فارقة معكن مشاعر امو لسامر حنا.
8 – وأكيد إنتو مبسوطين بالتحالف مع القومي السوري وإنتو معو على ذات المبادئ: سوريا الكبرى، سوريا أولا".
9 – وأكيد إنتو مع قطع الأيدي والألسن ومحاكمة الصحافة وتشبيق القناني ووضع خوازيق و….
10 – وطبعا إنتو مع يوم 7 أيار المجيد لأنو هيك بيتربو اللي بيغلطو مع حزب الله.
11 – وأكيد إنتو من محبّي ومعجبي جميل السيّد، عاصم قانصو، ناصر قنديل، وئام وهاب، بشار الأسد العظيم… إنتو أصلا سامحتوهن متل ما بيقول المتل: ما إلك صاحب إلا من بعد قتلة (وأكيد حبّيتو القتلة).
12 – طبعا عون ضد المال الإنتخابي، بس هوي مع يللي إذا راح ع إيران وجبلو قرشين (وهوي ما نكر… شوفو المقابلة بس رجع من إيران).
أخيرا يلي أنا مأكدة منو إنتو مش ذات الأشخاص اللي نزلو معنا على ساحة الشهدا ب 14 آذار… لأنو هوديك ما كانوا يفكروا هيك…