بـ 7 حزيران… ما تنسى!
مارون طوني بدر
انت وعم تحط صوتك بالصندوق… ما تنسى الصندوق لي انحط رمزي عيراني في…
بـ 7 حزيران
انت وعم بتحط صوتك… ما تنسى صوت الشهيد فوزي الراسي… تحت التعذيب بوزارة الدفاع..
بـ 7 حزيران
انت وعم تفكر بالمرشحين… ما تنسى تفكر ببطرس خوند ورفاقو…وانو حقن يرجعوا…
بـ 7 حزيران
اذا كنت من زغرتا وعم تصوت… ما تنسى رينيه معوض…شهيد الاستقلال… وما تنسى لي رقصوا نهار يلي مات…
بـ 7 حزيران
اذا كنت من الكورة وعم تصوت… ماتنسى معركة تحرير الكورة بال 1976…
بـ 7 حزيران
اذا كنت من البترون وعم تصوت.. ماتنسى كفيفان.. ما تنسى الشهيد سامر حنا ..ويلي طالبو بمحاسبة الجيش لأنو بعتو عالجنوب…
بـ 7 حزيران
اذا كنت من جبيل وعم تصوت… ماتنسى القطارة.. .ولا كنيسة لاسا.. ما تنسى ميفوق..
بـ 7 حزيران
اذا كنت من كسروان وعم تصوت…ماتنسى البطريرك والتاريخ الحاملو عكتافو.. ما تنسى الاهانات اللي سمعتا عن بكركي.. فكر بسيدة حريصا… بلي صار بالقليعات.. بلي عمر جونيه… فكر بالجبهة اللبنانية بجامعة الكسليك… تذكر الأباتي شربل قسيس.. و ما تنسى ليش في صخور بنهر الكلب…
بـ 7 حزيران
اذا كنت من المتن وعم تصوت… ماتنسى البطل بيار جميل… ما تنسى عنفوان المتن… ما تنسى تل الزعتر.
بـ 7 حزيران
اذا كنت من بعبدا وعم تصوت… ماتنسى 13 تشرين… ما تنسى عين الرمانة الأبية.. واللي بتبقى أبية.. فكر بمستقبل ولادك ببعبدا.. فكر بلبنان… فكر صلاح حنين أو علي عمار؟
بـ 7 حزيران
اذا كنت من الأشرفية وعم تصوت… ما تنسى بشير الجميل.. وخليك عخطو ثابت.. تذكر اسم لي قتلوا… قرا الأسامي والتحالفات باللوائح… فكر… بس ما تنسى جبران التويني.. وديك النهار… تذكر حرب المية يوم…وصوت.
بـ 7 حزيران
اذا كنت من زحلة وعم تصوت… ماتنسى انك زحلاوي… ما تنسى المجد لي بيوم من الايام لبستو.. ما تنسى الأسطورة لي عملتا بزحلة… بال 1981… ما تنسى هويتك…. ما تنسى نصري ماروني …صوت!
بـ 7 حزيران
اذا كنت من الجنوب وعم تصوت…ماتنسى أهلك…واحتكار تمثيلك…قلن لا.. جزين حرة… كانت ورح تبقى حرة… تذكر مينو ادمون رزق… ومين يلي عم ينزلو ضدو.. تذكر شرق صيدا.. تذكر لي صار بعد التحرير… فكر… وصوت!
اذا كنت لبناني.. ومش فرقاني معك اذا بتصوت…
ما تنسى اللي قالو أحمدي نجاد… انو فوز المعارضة بيعني لبنان جبهة عسكرية…
تذكر 7 ايار… وسلاح حزب الله ببيروت…
ما تنسى مي شدياق.. وجورج حاوي…
ماتنسى انطوان غانم…سمير قصير…
ما تنسى انو لبنان بخطر… نمط حياتك بخطر… مستقبلك… بلا مبالغة بخطر…
ما تنسى انو بـ دول المقاومة، السهر ممنوع… واللبس ممنوع… والتفكير بيجي بعلب كرتون.. موزعة..
ما تنسى حرب تموز… ونهر البارد… والخطوط الحمر…
ب 7 حزيران… فرصتك ليربح لبنان الانفتاح.. لبنان الروشة وشلالات جزين وقلعة بعلبك ونهر البردوني والكسليك والبترون ومحمية اهدن وارز بشري…على لبنان صواريخ رعد وخيبر وخيارات المواجهة…
ب 7 حزيران… فرصتك تتنقي بين يبقى لبنان لي بتعرفو، او يصير جمهورية موز معلبة…
ما تقعد ببيتك وما تصوت… ب 8 حزيران ما رح ينفع الندم…
7 حزيران… ما تنسى تاريخك… وتجذرك بهالأرض وميات الاف الشهدا لي ماتوا تتبقى هالأرض حرة… اذا فلشنا اجسادن بتغمر لبنان كلو… ما تنسى 1500 سنة من النضال… ما تخلين يسقطوا ب 7 حزيران…
وصحّ… هي بتفرق عصوتك… وصوتي… وصوت كل واحد عم يتردد… سوا، منعمل كل الفرق…
سوا، صوتنا بيجمع.. ما تسكت… لأنو صوتك أعلى من رصاص حقدن، وايمانك بلبنان أصلب من متاريس ضعفن…
ب 7 حزيران… صوّت.. للبنان.. للحرية.. صوّت لولادك… لتاريخك..
ب 7 حزيران… قول لأ … هلأ فيك، وما في سلاح يمنعك… ما منعرف بكرا شو مخبيلنا…
ب 7 حزيران… كل نقطة حبر بتكتب 14 آذار… دفعنا حقا دم… ما تفرط بدم الشهدا… كون وفي، ولو ورا العازل!
…
كرمال دموع ستي وتيابا السود على ابنا… كرمال الليالي لي تركنا بيي وراح يدافع عن لبنان….
كرمال صورة خالي المعلقة فوق تختك يا امي… كرمال يبقى الوطن متل ما منعرفو..
كرمال ورّت لابني شقفة ارض حرة.. وتكبر اختي وتتجوز بلبنان مش باميركا.. كرمال كل شهيد سبقني… وكل مصاب.. وكل معتقل بسوريا..
وكرمال كل شب من التيار والقوات اللي انحبسوا تيضل لبنان… نازل صوت… ل 14 آذار.. نازل صوت، ليلي بيشبهني أكثر!