لائحة مطالب معيشية مش سياسية برسم الحكومة الجديدة

لائحة مطالب معيشية مش سياسية برسم الحكومة الجديدة
بقلم أمال أبي نجم

بما إنو انتخبو برّي، يعني ما بقا فينا نتأمّل شي من مجلس النواب، خلينا نجرّب مع الحكومة العتيدة، نعرض مطالب الشعب وكل شي منتأمّل إنّو يتحقّق، بلكي الله بيفرجا علينا.

أنا حضرت لائحة مطالب، مطالب معيشية مش سياسية، منا نظريات ولا كترت حكي، وجرّبت قدّم معن إقتراحات لحلول، بتمنى يوصل صوتي للحكومة الجديدة….

1- يلاقو بديل لإيرادات البنزين، ويخفضو سعر البنزين لأن من ورا بترخص أمور كتيرة…

في عدّة إقتراحات بحب ذكركن فيها: زيدو سعر الدخان (5000) وزيدو سعر تنبك الأرجيلة وسعر الكحول وسعر الكولا (كلن إشيا مستهلكة ومنها أساسية). كمان حطو ضريبة 1$ على كل كتاب لجبران خليل جبران بينباع خارج لبنان وعلى CD أغاني فيروز (كلنا منعرف قدّي مبيع كتب جبران وأغاني فيروز) وهيك بيكون في مدخول للدولة مش من جيبة اللبناني.

2- يعملو قانون كرمال الشقق، منو مقبول إنو اللبناني ما يكون قادر يشتري شقة ببلدو ويجو العرب يشترو البلد … يغلّو الشقق على العرب ويحدّو من تملّكن بلبنان ويرخصو الشقق على اللبناني، لي الحد الأدنى للأجور 500000 ل.ل. كيف بدو يشتري شقة إذا متر العمار فوق ال 1000 $ والأجارات مش تحت 300$.

3- يظبطو قانون الجنسية ويعطو المرأة اللبنانية الحق بإعطاء الجنسية لأولادها وزوجها

4- ضمان الصحي وضمان الشيخوخة اللي هنّي من حق كل مواطن لبناني، خليهن بالأول يشيلو الفساد والمحسوبية اللي موجود بمؤسسة الضمان الإجتماعي ويعملو تفتيش على الشركات اللي ما بتصرح عن موظفينها أو بتصرح بنص معاش وبترشي المفتّش. وما يرفضو العلاجات والعمليات للعالم بحسب مزاج حكيم الضمان.

5- يخلقو فرص عمل للشباب تا يخفّفو من الهجرة

6- يظبطو شبكة الإتصالات ويعملو مدّة كارت التشريج سنة متل كل دول العالم.

7- يظبطو الكهربا والمي تا نبطّل ندفع فاتورتين (كهربا وموتور – مي وغالونات مي الشرب)

8- يعملو رقابة على كل موظفين الدولة لأن هونيك الهدر المظبوط 10% منن بيشتغلو والباقي بيقبض هوي وقاعد ببيتو.

9- يزيدو معاشات الجيش والقوى الأمنية ويرجعولن حقوقن لأنن بيقبضو أقلّ معاشات بالعالم مقارنة مع القوى الأمنية بغير دول، وحياتن معرّضا كل لحظة للخطر.

10- يظبتو المواصلات العامة تا تقدر العالم تستعملا ساعتها بيزيدو إيراداتن، بوظفو ناس أكتر، بتخفف العالم من إستعمال سياراتا (وانا أول وحدة) وبتخف عجقة السير.

يا ريت الحكومة بتنظر بهالمطالب وبترأف بالعالم. وتمني أخير يا ريت بيرجع الوزير زياد بارود على وزارة الداخلية وبيكونو كل الوزراء الجداد بنفس الوطنية والهمّة…