جنرال ما منحسدك ع وضعك … ولا منحسد هل وردة!

جنرال ما منحسدك ع وضعك … ولا منحسد هل وردة!

هِوايتو الاهتمام بالجنيني ونكشها وتعشيبها بالاضافة الى إبتكار الشتائم ونكش القبور… وقد شوهد في الايام الاخيرة حامل وردة، وعم يشيل اوراقها ويقول:

"سعد الدين رمز الفساد … سعد شاب ادمي".
"الحريرية السياسية ملحقة بالسعودية وبدها تشتري الاراضي تا توطن الفلسطينيين، ما هودي سنة … تيار المستقبل عن جد بيؤمن إنو "لبنان اولاً"، ويلي بدّهن يوطنو هني حلفائي جماعة "حزب الله" والقوميين. مش مروان فارس والحاج محمد فنيش قدموا قانون كرمال ينسمح للفلسطينيين يتملكوا شقق ببيروت"."سعد الدين لازم يسمو "سام الدين" لانو نقطة تقاطع اميركية – سعودية … سعد همو لبنان ومصالحو قبل كل شي"…
"سعد الدين جندي زغير بالحرب الكونية ضد التيار … سعد بيتعاطى معنا من الند للند".

بينتش ورقة وبيصرخ سعد الدين … وبيرجع بيشيل التاني وبيقول سعد…

اكيد عرفتو، وهل يخفى القمر؟!

مواقف الجنرال متل أسهم البورصة.

ساعة متفق مع الحريري على 90 بالمية من النقاط، وساعة  "Deux droites paralleles ne se rencontrent jamais".
ساعة "عم منكمل من مطرح ما وصلنا في النسخة الاولى من الاستشارات"، وساعة "نحن منفتخر انو اسقطنا التكليف الاول".
ساعة "بدي وزّر صهري تيكفي "الحركة التصحيحية" بوزارة الاتصالات"، وساعة جربنا المشاركة بحكومة السنيورة وما قدرنا نمارس "الاصلاح والتغيير" لانو كنا أقلية.
ساعة "أنا يعني دولة الرئيس قائد الجيش السابق ورئيس تكتل "التغيير والاصلاح" الجنرال البرتقالي ما بحط ايدي مع جماعة "14 شباط" هودي عم تدعمهم اميركا واوروبا واسرائيل … نعم اسرائيل متل ما عم خبركم. وعم يتآمروا على المقاومة"، وساعة "انا ضد ثقافة التخوين وإلغاء الاخر وعم مّد ايدي للجميع لانو ما فينا إلا نتعاون سوى تا نخلّص البلد".

شو قصتو الجنرال؟!
معقول عم يعيش علاقة "غرام وانتقام"؟!
أكيد الغرام مش بالرئيس المكلف سعد الحريري بل غرامو الازلي والابدي بالسلطة، وإنتقامو مش من الفساد يلي معشعش بوزارة الصهر واخر معالمو فضيحة "الاشرف" ولا من المحسبويات يلي متفشايي بالتيار حيث "لا صوت يعلو فوق صوت الجنرال" ويلي بيرضا عنو بيدخل جنة السلطة، بل انتقامو من كل مين بيعرقل وصولو.

جنرال ما منحسدك ع وضعك … ولا منحسد هل وردة.