من وحي “طاولة الحوار”

عالهوّارة الهوّارة.. دبّرها.. مالا دبّارا.. لحتّى نسلّي هالشعب.. شكلّنا لجنة حوارا..

هوّر يا بو الهوّارة.. المحاور عمّا تندارا.. ولما شفنا الصورة طار… العقل وشعلت هالنارا..

فكّرنا كيف نلهي الناس.. الما قبضونا من الأساس.. قلنا منريّح هالراس .. ومناخد صورة تذكارا..

عالهوّارة الهوّارة.. دبّرها.. مالا دبّارا.. لحتّى نسلّي هالشعب.. شكلّنا لجنة حوارا..

فاجأنهن بالتشكيل.. تنعرف شوفي مواويل.. براس القصير والطويل.. واللي بيشبه الخيارا..

كلّن رح يحكو بالدّوْر.. ورح يصطفو متل الحَوْر.. وهيدا يلفّ وهيدا يدور.. وهيدا يفور وهيدا يخور.. وهيدا يناطح متل التُّور.. وتصير الجلسة حُوَّارا..

عالهوّارة الهوّارة.. دبّرها.. مالا دبّارا.. لحتّى نضيّع الوقت.. اخترعنا هالدّوبارا..

وهوّر يا بو الهوّارة.. شكّلنا لجنة حوارا.. وما حدّدنا المواضيع.. حتى نلغم شعارا..

وعالهوارة يا شطّار. .هلّق وقت الانتظار.. ونحنا ما عنّا قرار.. قلنا منسلّي الزغار.. ومنسلّي معهن الكبار.. ومنخترعلن أخبار.. عن طاولة الحوارا..

وقلنا منلعب بيت بيوت.. حتى لا نطقّ ولا نموت.. وهالشعب "ابن العـ…."… يقطع عمرو شو حمارا…

عالهوارة يا مهوّر ، شون ناطر حتى تدوّر، واحد مفتاحو بإيران… وواحد مفتاحو بالشام… وواحد بدو الأميركان… ما حدا بدّو لبنان إلا تابع و"دلدول".. حامد شاكر غفّارا..

وواحد أم قليباني.. ساعة بيطلع لبناني..وفجأة بيقلب عرباني.. ولما عتركيا راح.. تذكّر أصلو عثماني، ما كان يرسيلو عبرّ.. قضّى عمرو محتارا..

وهوّر يا بو الهوراة.. فكرّنا الشعب حمارا.. ركبنا عضهرو من جديد.. حتى نلعب: "حوارا"…