أكد منسق "القوات" اللبنانية في قضاء كسروان – الفتوح د. زياد معلوف "انهم مهما حاولوا استهداف القوات اللبنانية فلن يُحبطوا عزيمتنا"، مشيراً الى "اننا على بُعد بضعة ايام عن طاولة الحوار وبأن البند الوحيد الذي يجب أن يُبحث هو سلاح حزب الله والاستراتيجية الدفاعية". وشدد معلوف على وجوب احترام المواعيد الدستورية من اجل حصول الانتخابات البلدية، لافتاً الى ان ابناء كسروان لن يُخيبوا آمال القوات اللبنانية".
كلام معلوف جاء خلال العشاء الذي دعت اليه منسقية "القوات اللبنانية" في بلدة عينطورة الكسروانية، وبحضور النائب شانت جنجنيان والنائب أنطوان زهرا الى جانب عدد كبير من الفاعليات الكسروانية.
وهنا نص الكلمة:
اهلاً بكل الأهل والرفاق بعينطورة …
وبعدنا ثابتين…كتير اشيا عم تتغيّر والقوات ثابتة ونحنا ثابتين…
بعينطورة ثابتين…بكسروان ثابتين…بجبل لبنان ثابتين…وبلبنان ثابتين
كتير اشيا عم تتغيّر إلاّ شغلة واحدة وهيّي استهداف "القوات اللبنانية" من قبل بعض يللي صاروا بالماضي البغيض، وعم يفكّروا يرجعوا يحتلّوا حاضرنا ومستقبل ولادنا…
عم نجتمع الليلة وسهام الغدر بعدا عم تستهدف "القوات"…
لانو "القوات اللبنانية" ثابتة صامدة
لانو "القوات" مصرة ما تفرط بوجودنا الحرّ.
واذا اعتقدوا انن اذا هاجموا الحكيم رح يقدروا يحبطوا عزيتمنا فهني غلطانين… ونسيوا انو نسر الارز وابن قنوبين يللي حمل صليب المقاومة كرمال حرية لبنان ما بهزوا حقدن وضعفن. ونسيوا انو "القوات" مقلع رجال ما بفتتا كذب الجبنا والعملا… فنحنا يللي انحبسنا وانقتلنا وقاومنا وصنعنا ثورة الأرز… وهنّي يللي فبركوا الآف الملفات بحق شباب التيار السيادي، ويللي زوّروا تاريخ شعب بكامله وباعوا الوطن للغريب بـ 30 من الفضّة.
نحنا يللي صمدنا وثبّتا "14 آذار" ع إجريها… وهنّي يللي عم يخنقوا القرار الوطني الحرّ ويحوّلوا لبنان لحلقة زغيرة بسلسلة الممانعة والتصدّي تبعن من غزّة لأفغانستان…
هالبعض يللي عم يرمي سهام حقدو على "القوات" بشكل مستمرّ، نسي إنّو دول كتيرة جربّت قبلو… والنتيجة إنو: بقيت "القوات"، وكبرت "القوات"… ورح تبقى "القوات" قوات… ويبقى لبنان وطن حرية "القوات"
عم نتجمع الليلة كمان، وإيّام قليلة بتفصلنا عن انطلاق طاولة الحوار… ومتل العادة، عم يحاول البعض يشعّب مواضيع البحث ليضيّع الموضوع الأساسي والوحيد المفروض إنّو ينبحث وينبّت فيه وهوّي موضوع السلاح…
هالبعض هيدا نسي إنّو بلبنان في مؤسسات دستورية قائمة وبالتالي ما فيها طاولة الحوار تكون البديل عنّا…
وهالبعض هيدا يللي مفكّر إنّو يميّع موضوع السلاح تا يستمر الوضع على ما هو عليه، نسي إنو لبنان والمنطقة قادمين على استحقاقات كتير كبيرة وخطيرة، وإنّو استمراره بالتمسّك بالسلاح بهالشكل رح يتسبب للدولة اللبنانية وللشعب اللبناني بخراب كبير…
لازم الكل يفهموا بقا إنو الشرعية اللبنانية والعربية والدولية هيّي سلاح الدولة اللبناني الوحيد… وايّا خروج عن هالثلاثي هوّي إنتحار لقيام الدولة بلبنان…
عم نجتمع الليلة كمان… والمحاولات الحثيثة بعدا مستمرة لعرقلة مسيرة الدولة وشلّ الحكومة اكتر واكتر…
عم يحاولوا يعرقلوا التعيينات، ويطيّروا الإنتخابات ويحرموا المغتربين من حقّن بالإقتراع… من بعد ما قرروا إنو كل شخص وكل لبناني حامل جواز سفر اجنبي صار عميل مُحتمل… غريب هالمنطق التخويني يللي ما إلو حدود وضوابط… غريب، إنّو من بعد ما هجرّوا اللبناني من بلادو عم يحاولوا اليوم يمنعوه ينتخب، او يفكرّ إنوّ يزور ارضو حتى…
نحنا كـ "قوات لبنانية" ما رح نقبل ولا بأي شكل من الأشكال إنو هالمنطق التخويني يستمرّ… وما رح نقبل إلاّ إنو المغترب اللبناني توصلّوا حقوقو على اكمل وجه… وما رح نقبل إلاّ إنو المواعيد الدستورية تكون مُحترمة والإنتخابات تصير بموعدا المحدد…
ومنشان هيك، بدنا نكون كلنا مستعدّين لحتّى نواجه كل هالاستحقاقات ونخوض هالانتخابات بكل تصميم وإندفاع لنثبت للجميع إنوّ كسروان هيّي عرين لـ"القوات"… واهلنا بكسروان وعينطورة رح يكونوا على قد آمال "القوات اللبنانية"…
عاشت عينطورة…
عاشت القوات اللبنانية…
يحيا لبنان
لقراءة كلمة النائب زهرا إضغط هنا.