"وقع إشكال في محلة الصفير في الضاحية الجنوبية عصر الاربعاء بين آل جعفر وآل مقداد تخلله إطلاق نار غزير"، بسيطة … أمر طبيعي وعرضي وكلنا اهل بأهل وما في شي يحرز، أنو بحي الشراونة ببعلبك بيصبحوا بعضهم بـقذائف الـ B7، وبالدار الواسعة قرب شلال اليمونة كل ما بدهن يرسّموا حدود الارض بتمشي الهواوين، وبالضاحية بس يحكي السيد حسن بيطلقوا قذائف "ر.ب.ج" ابتهاجاً وبيفتحوا قنابل يدوية بدل الشمبانيا، وبجنوب كل ما بيجددوا للاستيذ بيروح اربع او خمس ضحايا برصاص الفرح "شهداء النيران الصديقة". هيك بتتفاعل قوى "8 آذار" مع الخبر، فـ "فرفور زنبو مغفور". أما قوى "14 آذار" فتحصر الحادث باطاره الشخصي وتطلب من القوى الامنية ضبط الامن ومن القضاء وضع يده على الملف.
ولكن تخايلوا ان الصفير هي الصفرا او عيون ارغش او اي بلدة موالية لـ"القوات اللبنانية"… يا ويليييي، والله قوى "8 آذار" بتعلن حال الطوارئ وبتستدعي شتامينا حتى يبخوا سموم كذبهم ومنظريها حتى يروجوا لسيناريوهاتهم "الهوليودية": القصة اطلاق نار خلال مخيمات تدريب بس لما نكشف الامر قالوا انو الخلاف بيناتهم… له له خبرية مشاكل على مغانم بعدها من زمن المليشيات|… يا خيي سألوا الجنرال يمكن تكون القصة لعبة قمار متل ما صار بعين الرمانة وقت مقتل جورج ابو ماضي… انا بقول الشغلي اكبر فيها اصابع صهيونية… له ولو هيد مشروع انقلاب كان عم يتحضر حتى "القوات" تجتاح بعلبك وصولا للهرمل متل 7 ايار… مش يمكن كانو عم يحضرو "انتفاضة" على اميل رحمة لازم مجلس النواب يتدخل، بس ما بينخاف عليه 109 الاف لبناني صوتولوا ومستعدين يلغموا حالهم كرمالوا… يا جماعة شو ما كان السبب "القوات" لهن يد فيها، ما هني فختوا الاوزن بالـ 1994، شو نسيتوا… واكيد سمير جعجع هو "الامر الناهي".