بستحي… بستحي بدولتيمن آخر انتخابات نيابية لليوم، براقب اللي عم يصير من بعيد وما بصدق…
قال شو؟ 14 آذار ربحو الإنتخابات! إذا ربحنا الأغلبية النيابية والوضع هيك، ما عم فيني إتخايل كيف معقول يكون الوضع لو، لا سمح الله، هني اللي ربحو.
كل يوم في كذبة جديدة عن القوات، ولو ما القوات زعران… إذا كان القواتي عم يصلّب إيدو ع وجّو، بيطلع عند 8 آذار تحريض طائفي وعميل صهيوني وعم يزعزع السلم الأهلي…
وإذا كان واحد من حاملين السلاح الإلهي عم يسرق، عم يتزعرن، عم يقوّص شمال يمين إبتهاجا، أو إنتقاما، أو يمكن فشّة خلق لأنّو معصب من مرتو… معليه ولَوْ، وين الحرية والديموقراطية!
وبعدين ممنوع، ممنوع منعا باتا حدا، أي حدا، يجيب سيرة هيداك السلاح، بأمر خاص من جنرال الرابية…
وإجا كلام الموسوي ليزيد الطين بلّة، قال شو؟ "اذا كان الخيار بين المقاومة وبين الوحدة الوطنية فالاولوية ستكون للمقاومة ولن يقيم حزب الله اعتبارا لاي امر آخر"
يعني بالعربي المشبرح، حزب الله بيحط سلاحو وكل شي خصو بسلاحو، إيران سوريا فسلطين … قبل لبنان، قبل وطنيتو… وبعد حدن إلو عين يقول إنن لبنانيّي؟….
ما عندن مشكلة يمحو لبنان عن الخريطة (ويمكن هيدا هدفن) بس يكون نجاد راضي.
أنا بدّي إتوجه للمسؤولين:
– رئيس الجمهورية، مع كل محبتي وإحترامي، بدي إسألو عن اللقاء اللي صار بين الأسد ونجاد ونصرالله للتداول بشؤون المنطقة… هل هالشي طبيعي وعادي… أنا اللبنانية المسيحية المارونية، شعرت بالإهانة.
بتسحب تمثيلك من إحتفال القوات كرمال كلمة الشهيدة الحية الدكتورة مي، اللي كانت عم تردّ على كلام نقال وفيه إهانة لكل اللبنانيين، بدل ما تحط إيدك بإيدا لمي، وترفع الصوت وتطالب بالحق….
– وزير الداخلية ووزير الدفاع، مع كل محبتي وإحترامي، كيف بتقبلو بصيف وشتي تحت سقف واحد، ليه؟ في كتير أحداث مش مقبولة وكل العالم فهمانة، وينو جوزيف صادر؟ شو تعليقن على المقارنة بين هيبة الدولة بعيون أرغش، مطرح ما كان في أي إصابة، وباقي الأحداث اللي متل العادة، ممنوع حدا يجيب سيرتها، وممنوع عليكن تفوتو أصلا على المنطقة…
مع كل محبتي وتقديري، أنا بستحي بدولتي… بس بعد عندي رجا، وما رح إترك لبنان، ورح ضل حاطا إيدي بإيدكن بكل شي فيه خير للبنان، وانشالله بيجي يوم وإرفع راسي بدولتي…
سيدة لبنانية…