ماتوا لنحيا بلبنان

ماتوا لنحيا بلبنان
بول هيكل

لبنان ما كان ولا مرة معزول عن محيطو، وهيدا يلي كان سبب نضال مستمر من اكتر من 1600سنة دفعوا المسيحين خلالها تمن وجودن بهيدي المنطقة، تمن حريّتون انو يأمنوا بعيش مبادئون من دون ما يكونوا اهل ذمة، او انو يكونوا مواطنين درجة تاني.

ولكن سنة 75 تغيّر حتى مفهوم النضال، صرنا مهددين بوجودنا على هالارض ، صرنا مهددين بحياتنا ، ببقائنا على قيد الحياة.

فكانت غريزة الحياة اقوى من الخوف، اقوى من كل الجيوش يلي جربت انو تقتلنا حتى نترك ارضنا.

بس ما عرفوا انو كل نقطة دم رويت هالارض فرخت محلا بطل، ما عرفوا انو كل شهيد سقط على الارض نزرع قديس بالسما.

يمكن خسرنا احبا كتير، بس لو ما هني استشهدوا ما كنا نحنا موجودين ، ومن هون حتى نكون امناء لكل شهيد دفع حياتو حتى نبقى، لازم وواجب علينا وعلى ولادنا انو نكفي المسيرة عنن، ونكفي النضال يلي عمروا الآف السنين.

هني ماتوا ليحيا لبنان
ونحنا منحيا ليبقى لبنان، هيدي الامانة يلي حمالونا يها الشهدا،

هني تركونا على الارض بس عم يتطلعوا علينا من فوق من السما، ودمن عم يصرخ : اوعا تخونوا الامانة، اوعا تتركوا لبنان.

دم الآف الشهدا مروراً بالبشير، كلن عم يصرخوا بالعالي، ما تتركوا لبنان، لبنان بعدوا بيستاهل انو يندفع كل هالتمن كرمالوا.

رفاقي ، رفيقاتي

بهالذكرى هيدي يلي هي شهر الشهادة، كلنا منعرف انو كل دمعة ام شهيد هي خرزة مسبحة صلاة، وكل وجع بقلب زوجة شهيد هو مسمار بصليب الفدى، وكل حسرة ابن او بنت شهيد هي شعلة حرية عا طول المدى.

بس حبيت أكد انو بعدنا على العهد، وحتى نتشارك مع اهلنا هيدا الشهر ونذكر ابطالنا القديسين، لازم كلنا نكون بكل قداس لكل شهيد.