كنت عم تابع شوي من حلقة الأستاذ بيار الضاهر على "كلام الناس" مع مارسيل غانم الى جانب متابعتي لـ "حديث البلد" مع منى ابو حمزة على الـ "MTV".
شوبدي بالحديث القانوني، فيه دعوى وفيه قضاء بيحكم والحكي على التلفيزيون ما الو طعمة. انا بآمن بالقانون يلي لازم ياخد مجراه. وشو بدي بالإفتراءات وفتح الدفاتر العتيقة للنيل من سمعة "القوات"، في مين بيعرف كيف يرد. وشو بدي من فن الـ ""Art Dramatique حول اسئلة وأجوبة مدروسين ومفبركين قبل بوقت … ومحاولة تمثيل موضوعية ما انطلت على حدا ….مع ضحكة سخيفة من وقت لوقت مصطنعة وموقتة: "يعني انا بقول هيك وانت بتضحك هيك وبس تقول هيك انا بضحكلك هيك" يعني المضحك المبكي … وخاصة اذا بيكون الضحك من "بطران" على معاناة شعب ومأساة جماعة…..
بس لفتني محاولة تسخيف مؤسسة الـ"LBC" وبرامجها ما قبل1992 ومساقبة انا من الناس يلي متابع الـ"LBC" من 1985 يعني وقت كانت المحطة تجريبية بتعرض الأفلام التاريخية مثل "لوسيد" و "رودريغو وشيمان" حتى الأمس القريب….
عجبني التضليل والتقليل من اهمية الـ"LBC" في فترة ما قبل الـ 1992 و القول انها كانت محطة للحرب والصدم (مع افتخارنا الكامل بتاريخنا)، وعجبتني عبارة في احد الريبورتاجات وهي: "انجأ كان ينعرض فيها من وقت لوقت مسلسل هانتر".
"يبدو" انو يلي اعد هذا التقرير ما بيعرف برامج الـ"LBC" و ما كان من مشاهديها أو ربما من المعادين لها أو ربما وقع ضحية يلي بيعرفوا ولكنهم اعطوه المعلومات الناقصة فقط بغية استعماله لتضليل الرأي العام.
لا يا اصدقائي نحن بقينا اوفيا للـ "LBC" لفترة طويلة ومنعرف شو هيي المحطة لا مش "انجأ هانتر" كان على شاشة الـ"LBC" الثمانينات.
لا "LBC" الثمانينات هي:
الـ"LBC" "لبنان الدايم" مع المؤرخ الكبير فؤاد فرام البستاني.
الـ"LBC" فارس آغا " الأونباشي " للأديب الكبير مارون عبود.
الـ"LBC" مهرجانات بيبلوس والمسرح العائم في مدينة جبيل ومسرحيات الفنان الكبير روميو لحود.
الـ"LBC" "ستوديو الفن" للمخرج سيمون اسمر والعديد من برامجه الناجحة.
الـ"LBC" "كبارنا" و"مرحبا حضارة" للأستاذ جوزف بو نصار يلي اعدهما بطلب من الدكتور سمير جعجع شخصيا والذي كان حريصا على الدور التثقيفي للمؤسسة.
الـ"LBC" "نادي النوادي" الذي اعاد احياء تراثنا وثبت اللحمة والتعاضد بين ابناء القرية الواحدة.
الـ"LBC" "الاول عل LBC " مع الراحل الكبير رياض شرارة الذي تمتعت برامجه بالثقافة المحببة الممزوجة بخفة الظل.
الـ"LBC" لقطة عال هوا، وافتح ياسمسم وغيرها من البرامج الترفيهية الرائدة آنذاك…..
وغيرهن وغيرهن وغيرهن وغيرهن وغيرهن وغيرهن وغيرهن وغيرهن….. هيدي هي الـLBC من 1985 للـ 1992.
لا يا شباب لا تكذبو على الناس ولا ترخصوا الـ"LBC" حتى تشنّو حرب الغاء على تاريخ "القوات اللبنانية" وعطاءاتها. الـ"LBC" رخيصة عندكن لأنو بتقيسوها بالمال بينما الـ"LBC" عندنا كانت و بتبقى غالية لأنو منقيسها بدم الشهدا والنضال الطويل. وغالية اكتر وأكتر لأنو منقيسها بتعب الرفاق الموظفين والمخرجين والإعلاميين المبدعين يلي بقيو يشتغلو، وباللحم الحي، وبمعاشات واطية ورفضوا كتير عروض، وتعرضو لكتير ضغوط حتى تبفى المؤسسة وتستمر وآخر شي كافأتوا بعضهم بالطرد….
"ايه هيدا الإبداع كلو قوات"، اما ابداعكم فبيفضل "الوادي" و"يا ليل يا عين" و"ستار اكادمي"وغيرها وبيرفض يضحي بساعة هوا لبرنامج ثقافي، وميشان هيك غاب حضور اي برنامج من هل نوع من سنوات عن المحطة وميشان هيك تخلت المحطة بسهولة عن مثقفيها امثال الاستاذ بسام براك. التّجار متلكن ما عم يقدرّو يفهموا كيف في ناس بتآمن بالقضية مش بالمصاري… ما بتخاف الموت، ما بتخاف السجن، ما بتخاف الفقر، ما بتخاف الجوع، ما بتخاف الإغتيال، ما بتخاف الإعاقة، ما بتخاف الإضطهاد، ما بتخاف التعذيب…. و بتبقى وفية للمؤسسة.
وبالنتيجة، كل واحد بيجرب يلغي القوات و تاريخها آخرتو هوي يفل …..
والضاهر رح يبقى ضاهر و يلي مفكر حالو غانم :" الناس مش غنم و LBC مش غنيمة" و شعراء البلاط، بينتهوا بس يفل الحاكم …و بيصيروا عل البلاط….