راح كتير وبعد كتير موطنا منو سايب
يا ربي وعي الضمير لِعن أرض بلادي غايب
خلي قلوب لعنا تصير لهفة وملقى حبايب
يا الله انت القدير خلّصنا من المصايب
بيكفينا حقد وتعتير بيكفي إجرام وتدمير
صار طفل لعنا شايب
لبنان بخاطر مكسور شهقان عيونو تدمع
كتروا فيه شهود الزور يا نيال لما بيسمع
من الخيانة عملوا قصور يا شعب بلادي ادفع
رح يبقى حقك مهدور لحتى صوتك ترفع
جايين بحقر وبفجور ما في أسوأ أو أشنع
ايدين تلوج بشرور قال بدهن يانا نركع
مهما الدهر علينا يجور قلن عنا فكر ونور
أقوى من فعل المدفع
اللبناني بأرضو خلقان وخلقت فيه الحرية
مش لازم يبقى فزعان من الهجمة الهمجية
ولا من كل صاير خوان مش رح نصبح سورية
نحنا خلقنا بلبنان ورح نبقى لبنانية
رح نبقى بكل الأزمان إسلام ومسيحية
نحمل شعار الإيمان ونحافظ عالهوية