بشري… قلب نابض بهالجبال

يا محابس ساكنة عشوش النسور يا كنايس راقدة بين الصخور               والأرز شامخ عكتافك وخالد بين الله وبيننا مادد جسور
ما كان بقي أرز الرب في لبنان لولا من ترابك يشبع عنفوان                    انهدوا السنين قبالك وشاب الزمان بعدك بشري وباقية لدهر الدهور
يا خالدة وموردة فوق الجبال ساكنك الله عا ملك عرزال                        من فجر التاريخ وبيضل منك رجال بالحرب نار وبالسلم بخور
أرضك بشري بحامي الحمى فيك الكرامة محلقة فوق السما                  الغزاة قبالك تحولوا كلن دمى ولا طامع بأرضك إلا رجع مكسور
وبقي الأرز بهمة رجالك وقداسة شربل الواقف قبالك                            الكرامة والبطولة هن رسمالك كانوا وبعدهن من ماضي العصور
هالأرض ياما اجوها غازيين مغول فرس وأخوة حاقدين                           مملوك ترك وجحافل فاسدين تقهقروا وفلوا يعاقبة ونسطور
بشري مهما تكاتروا عليك العدا بترخصلك الدمات بيطيب الفِدا                  بهمة الأبطال بيصيروا صدى بتضل أرضك دوم للغازي قبور
ما بيصح بهالدني إلا الصحيح بشري مليحة لبناننا بيبقى مليح                  يا محافظة بإيمان عا عهد المسيح بالمحبة وبالعطا بعدت الشرور
خلف الجبل عليت الصلوات من الدير وزرازير من بشوات                          يصلوا تا الله يخلد القوات بيخلد معن لبنان بالمعمور
شلال دافق بوادي القديسين للشط واصل عم يحلف يمين                     من فوق من بشري نحنا جايين نروض الموجات ونهدّي البحور
مش بس في عندك بطولة في جمال من نسمتك جبران صار عندو خيال    بتبقي عروس بتبقي عرين بهالشمال كنت وبعدك قلب نابض بهالجبال