تحدثت مسؤولة قطاع النساء في "القوات اللبنانية" ريتا خوري عن نضال ومسيرة المرأة داخل الحزب، واعتبرت في كلمة لها في الذكرى السابعة عشر لحلّ الحزب تحت شعار "نور الحريّة أقوى من ظلامهم في احتفال في معراب، ان "القوات اللبنانية" هي تجارب نضالية تُعبّر عن كل النضال التاريخي لأنها تجربة الانسان والمواطن العادي الذي يفتش عن مكان له تحت ضوء الشمس".
كلمة خوري كاملة:
متل الحلم … بنسى … بس ما بنسى إتذكر
وبتذكر … لانو اليوم الذكرى بتمرق من دون ما تجرح
وبتذكر … لأنو بوقتا الحدث بيحرق … وما كان بيسمح إنو نعبر بالكلمة .. بحرية
بتذكر لانو الذكرى اليوم منّا وقفة على الاطلال ::
بوقتا عبرنا بالنضال .. اليوم عم نتعلم من نضالنا.. تأكتر وأكتر نصنع تاريخنا ..
بتذكر الامّات مع ولادن بنغارة عاصي 1283 ورجالن ع كتاف الوادي مع القوس والنشاب
بتذكر الزوجات عم بزرعوا اراضي ببلاد جبيل لانو رجالن عم يخوضو معركة ع برج الفيدار
وبتذكر الصبايا 1975.. متل الشباب بردّة فعل وجودية ، عم يحملو البارودة بالاسواق تيدافعو عن الهوية والوطن
وبتذكر معهد غوسطا ، لاول مرّة بتاريخ لبنان ، تجربة الضابط – الفتاة ـ يللي بتتخصص بالمجال العسكري وبالمجال الاداري – العسكري
بقلب النضال كانت .. عبر التاريخ وبعدا ، دبكة وجود ..ز متل الدبكة اللبنانية الكتف ع الكتف ت نبقى … وبقينا .. ورح نكبر أكتر بهالنضال …
وهيدا النضال التاريخي ، اختصرتو بجوهرها المرحلة الممتدة من 1994 لل2005
متل الحلم … صورة الناس عطريق غدراس ، طريق وعرة كلاّ جور ، ومين سئلان
والناس حولو .. عم يدعمو .. وبلظة .. بتفكر انو وقع الحلم إذا كنت قليل الايمان ..
ما الطرقات يللي كلا جور من سنين .. فجأة تزفتت بعد ما قدّم حالو ت يااخدو ع الحبس …
من عجقة الناس .. بقيت هي بغدراس … وهونيك كان قرار المرأة اللي ما بتملك الخبرة السياسية .. إنو تناضل
وكملت ، صور ما بتخلص .. حلم كأنو عم ينكسر ، كتل ايمانية بشرية عم تمشي صوب بكركي ، البطرك بيحكي وهي ام ّ شهيد عم بتقلو من تحت وصوتا مسموع : قرّ قول الحقيقة .. فعلها النضالي إنو ضلّت تعرف شو هي الحقيقة بخضم ذ كل التزوير .. ما حدا قدر يغلغلها روحا بالغشاوة
والبنت الزغتورة عبير ، صورة البي الحامي والقوي عم تتكسر عندا ، بيّا تخبى بالخزانة ، وبيضلو هربان من سلطة الوصاية
انكسرت الصورة .. بس هي ما انكسرت وهي اليوم
نضالا كبير ، انخطف بطرس خوند.. وبلش مشوار الركض والعذاب والضياع والتفتيش اليومي . كيف بتجابو لرودي لما بيرسمو عدفترو عم يقوّص حالو . ولما سألتو ليش يا رودي ؟ قلاّ : هيك ، يللي بيقوصوا بيحبسون ، واذا حبسوني بشوف البابا
بطرس ما رجع .. بس منخبرو انو بفضل نضالا رودي مبدع بجامعتو ..
بقدر انسا صورتا ونضالا ؟ ومسبحتا بإيدا امّو لفهد .. وتطلب يا ربي ابني يصطفل ..بس ما تموتني قبل ما شوفوا برات سجنو .. وبس تيقنت بروحا إنو طالع … راحت
ونضالا ، إن حملت الصليب بكل ابعادو : إم شهيد ، إم مصاب جرب ، ام لمبعد … إم انطوانيت شاهين المسجوني ظلم … العين ما بتقاوم مخرز ؟ مين قال … هيدي العين سهرت ، صلّت ، ناضلت وقاومت المخرز وشافت بنتا عم بتحاضر عن حقوق الانسان وتتكرم بكل العالم
وهيك .. بتكمل السبحة .. ياسمينا ناطرة بيا رح يجبلا الكاتو نهار عيد ميلادا .. خطفو … قتلو ..وارادو يقتلو صورتو .. نضال : صور الحقيقة جواتا عم بيقول : ما تجربو تشوهو صورة رمزي البطل .. مارح تقدرو
و7 آب … وليلى وولادا تحت جوانحا ، من التعليم بالجامعة ، لعند البطرك ، ع الطرقات بإخراج زوجا من السجن ونضالا أثمر … " الحجر الذي رذله البناؤون صار رأس للزاوية " ، من السجين المضطهد .. صار ممثل الشعب
وبقدر إنسى العيد .. ومين قال إنو ما بيمرق عالمساكين . هوي بقلبن .. ولو تمنو غالي … ؟ الناس يللي بالظلّ تقدم الهدايا لولاد الشهدا ، الهدايا … وما يطلع الضو علين … لأنو زوار الليل بيتصيدون على باب شغلن ، يهددو ، يضربو ، يكسرو العضم بس ما يكسرو الارداة .. منشان هيك بعزّ مرحلة الوصاية وحل القوات اللبنانية .. من ال 94 ولاد الشهدا والمساجين كان إلن عيديتن
والقداس … درب جلجلة .. شوك بإجرين اللي مشيو حريصا وع ميفوق … زهرّ قداس شهدا بعدو لليوم بقلن كل سنة : إنتو علّة بقاءنا
ووصل النضال … بال 2005 متل الرمح ممشوق … بعد 11 سنة وقف وصل النضال ؟ يعني خلص ؟ أكيد لأ .. نقطة الوصول هيي نقطة بداية جديدة وعم مناضل اليوم ؟ أي عم مناضل .. ليش ؟؟
بنسى ؟ بتذكر ؟ .. هيي مش ذكريات هو تاريخ
القوات اللبنانية تجارب نضالية وبتعبر عن كل النضال التاريخي ، تجربتك د. جعجع مش ملكك ، تجربتك ملك تاريخنا . مواجهة بالحقيقة قشعت لبعيد وقاومت كل المخارز اللي كانوا محضرينا لانها حقيقية تجربة كل انسان بدو يرسم طريقو بالحياة والتاريخ بدون ما يتزلف لحدا وبدون ما يكذب ، هيي تجربة الانسان والمواطن العادي العم بيفتش عن محل لإ لو تحت ضوّ الشمس ، هيدي تجربة نضالنا التاريخي ومقاومتنا
عشتم مناضلات ومناضلي في القوات اللبنانية
ليحيا لبنان