غدرت الايام فينا
غدرت الايام فينا
بيعدتنا عن اهالينا
همنا مركب بدون شراع
ببحر مجنون ما الو مينا
صرنا بقلب بلادنا اغراب
ماتت الغيري تفرقوا الاحباب
ما عاد نسمع غير نعيق غراب
ولا عاد شي بالكون يرضينا
راح الامان والحرب لهبة نار
يا ويلنا جبنا لعنا العار
قلوبنا حقد بيوتنا صارت دمار
ما ضل عنا كوخ يأوينا
بيناتنا ليش دخلنا الغريب
صرنا نقتل عالهلال وعالصليب
يا رب علينا هون الامر العصيب
ارحمنا وعدرب النور اهدينا
غابت الافراح اسودت الايام
العيد صار نواح بكيت الاحلام
ماضي العمر بالحرب والاجرام
بغض وضغينة ودم يكفينا
كيف صار هاللي صار يا لبنان
حمامك الابيض ينقلب غربان
قمحك الاسمر تاكلو الحيطان
ويضل غيم الشر يعمينا
حرام تجرحوا ارز الخلود
وترحلوا نيسان من غير الورود
لبنان انت يا مربع اسود
رجع عهود البطولة بتحيينا
لبنان عود توحد ورص الصفوف
خاوي حسين وبطرس ومعروف
خلي الدين كل الدني عنا تشوف
ابطال وصناديد تحمينا
رجع الحفلات وليلك السهران
ضو القمر يحكي مع الخلان
فراشك يحاوم على الريحان
بمروجك الخضرا بيلهينا
حرام الربيع يغيب من غير العطور
ما تقدر النحلات تجني من الزهور
تيبس الكرمات ما نسحب خمور
ويشمت الحاضر بماضينا
منفديك بالدمات وبنور العيون
عحسابك الارواح والقلب الحنون
يبقى نسيمك عطر ورد وزيزفون
ونبعك الفوار يروينا