(تصوير ضاهر شمعون)
أقامت مصلحة القطاع العام في "القوّات اللبنانية" عشاءها السنوي في حضور عضو كتلة "القوات" النائب أنطوان زهرا ممثلاً رئيس الهيئة التنفيذية د. سمير جعجع، منسّق المصلحة بيار بعيني ومسؤول العلاقات السياسية نادي غصن ومنسّق منطقة كسروان – الفتوح شوقي دكّاش وايلي ابي طايع ورئيس لابورا الأب طوني خضرا ورؤساء بلديات ومخاتير وحشد من المحازبين.
زهرا شدد في كلمته على ان "حقوق المسيحيين هي مشروع واحد تاريخي لا يمكن لأحد ان يخرج عليه ويكون مسيحياً في السياسة لأن حقوق المسيحيين تكون في بناء دولة فعلية وثابتة مع مؤسساتها في لبنان، وحقوق المسيحيين تكون بإلغاء كلّ الفرقاء الذين ينازعون الدولة سلطتها، وحقوق المسيحيين تتحقق بإسترداد السيادة كاملة وترسيم الحدود نهائياً وإسترجاع المفقودين والأسرى ومنع ايّ تدخّل خارجي في الشؤون اللبنانية، من ايّ جهة اتى، ويكون اولاً واساساً في ان تكون المؤسسات الدستورية في لبنان هي صاحبة السلطة وهي حامية القرار وغير مرتهنة لأيّ مشروع إقليمي او دولي ومشروعها الوحيد بناء الإستقرار والإذدهار بواسطة مؤسساتها المحترمة والكفوءة والتي ليست مجرّد مزرعة لتقاسم المغانم والمكاسب والحصص". (لقراءة الخبر كاملاً اضغط هنا)
أما بعيني فألقى كلمةً تحدث فيها عن المصلحة وعملها وعن مسيرة "القوّات اللبنانية" ونضالها في السلم والحرب وعن التنظيم الجديد للحزب وما يتيحه للمحازبين من ان تصير كلمتهم مسموعة اكثر.
كلمة الاستاذ بيار بعيني بعشاء القطاع العام في القوات اللبنانية
اخوتي ورفاقي
هاللقاء يلّي بيتجدد كل سنة، منلتقي فيه لنتشارك لحظات فرح قليلة، ونجرب ننسى التعب والعذاب يلّي منعيشن على مدار السنة، هاللقاء صار بالنسبة لألنا عيد نحتفل فيه معكن لنجدد عهدنا ونكفي المسيرة سوا. كل كلمات الترحيب مش كافية ولا بتعبر عن سعادتنا بهالجمعة الحلوة، ولا بتقدر توصف شعورنا والفرح يللي بيغمر قلوبنا بس نجتمع فيكن.
يا رفاق، قبل كل شي بدي اشكر كل يلّي عم يشتغلوا معنا ويساعدونا بالقطاع، كل يلّي حملوا رايتنا وآمنوا بقضيتنا وبدي اطلب منن يكملوا معنا بنفس الحماس والجهد.
يا رفاق كلكن عشتوا الاسى، التهميش، انظلمتوا واضطهدتوا، بس كلنا سوى رح نشيل الاسى ونكسر الظلم والاضطهاد، ونعيش حياة المشاركة الحقيقية يلّي ميزت لبنان عن غيرو من البلدان العربية والشرق اوسطية و خلتو يكون بلد الرسالة متل ما سماه الطوباوي يوحنا بولس التاني.
يا رفاق، انطلاقتنا كانت قويّة، صو تنا صار عم يدويّ، كلمتنا صارت عم توصل، اشيا كتيري قدرنا نحققا واشيا لأ، بمطارح توفقنا بمطارح تانية لأ، وهالشي عطانا القوة والحافز لنكمل المسيرة، مسيرتنا يلّي بلشناها من اكتر من تلاتين سنة، مسيرة لبنان الواحد، مسيرة الدولة مش الدويلات، مسيرة كل الالوان والاطياف مش مسيرة القمصان السود وهيمنة الفريق الواحد.
ما رح نقبل انو دولتنا تكون دولة محسوبيات او مربعات امنية
ما رح نقبل انو الدولة تكون بمناطق ومش موجودة بمناطق تانية
ما رح نقبل انو فئة او حزب او أي طرف يكون عندو مناطق مسكرة عالدولة
ما رح نقبل انو اراضي الدولة تكون مشاعات محللة لفئة او مناطق معينة
ما رح نقبل انو يكون ممنوع علقوى الامنية والعسكرية تفوت على اي منطقة
لأ يا رفاق، القوات اللبنانية ناضلت وقدمت الشهدا كرمال لبنان، لبنان الحرية والكرامة، لبنان المساواة والعيش المشترك، لبنان الدولة الوحدة القادرة والقوية. وكرمال هيك لاحقونا, وحبسوا قائدنا ورفاقنا، ومن بعد ما رجعنا كملنا نضالنا السياسي ورح نكفي، خلّي الكل يعرف، ما رح نقبل انوّ حدا يتسلط علينا، ما رح نقبل انوّ حدا يستقوي علينا، ما رح نقبل انوّ نكون مهمشين، نحنا نوجدنا لكل لبنان وبالأخص لألكن، لنوقف حدكن، نحميكن وندعمكن، ونتعاون سوى تنوصل للبنان المشاركة، المساواة، المناصفة يلّي اكدا الدستور والطائف.
ما حدا منكن يحس للحظة انو ما في ضهر يحميه،
ما حدا منكن يفكر للحظة انو ما في حدا يوقف حدّو،
نحنا معكن، نحنا لألكن، وعم نشتغل لنحقق كل شي بتستاهلوا وبتتمنوا،
بس هالشي بدو وقت، بدو تعب، بدو طولة بال، ما رح فينا نعمل كل شي، بس رح نطالب بكل شي، كل شي بتستحقوا ولازم تاخدوا،
كلنا يا شباب عم نشهد ولادة حزبنا بتنظيمو الجديد، وبعد انطلاقة المؤتمر العام الاول والتصديق على النظام الداخلي للحزب يلّي كلكن اطلعتوا علي وشاركتوا بافكاركن وتعليقاتكن بكتير من بنودو، رح ينفتح باب الانتساب ويصير عملنا الحزبي منظم اكتر، رح تصير كلمتكن مسموعة اكتر، حزبنا يا رفاق رح يكون مثال للديموقراطية وتداول السلطة والتنظم ومنتمنى يكون قدوة لكل الاحزاب والتيارات اللبنانية يلّي عم تعتمد الشخصنة والاحادية.
بشكركن مرة تانية، ونشالله سنة عن سنة نكبر ونزيد
الله يقويكن ويقوينا لنكون على قد المسؤولية
عشتم، عاشت القوات اللبنانية، عاش لبنان
وفي الختام قدّم زهرا وبعيني والاب خضرا دروعاً تكريمية لبعض المجلّين.