حوار بين لبناني 8 ولبناني 14… في آذار

لبناني 8: شو؟ كمان هالسنة رح تحيوا ذكرى ثورة الارز؟
لبناني 14: أكيد وبسبب الوضع الدقيق من حولنا رح نتلاقى بـ "البيال" … وإنتو، شو عاملين؟
لبناني 8: نحن هيك حركات مش عايزين. وقت اللزوم منلبس أسود ومنسكر الطرقات. لا بدنا شعارات ولا من يحزنون. القميص الأسود بيحكي.
لبناني 14: القميص الأسود… يعني السلاح!
لبناني 8: وشو خصّ القميص الأسود بالسلاح؟ هيدا تعبير سلمي عن الرأي. مش إنتو بتحملوا العَلَم بمظاهراتكم؟ إيه نحن منلبس قميص أسود.
لبناني 14: لا قميصك الأسود ولا عرض عضلاتك كان بينفعك لولا السلاح اللي بتملكو جماعتك. وهيدا منو تعبير سلمي عن الرأي. هيدا تهديد. وما نسينا شو عملتوا ب 7 أيار المجيد.
لبناني 8: بس بشرفك… مش حلو تكون بموقع قوة؟ يعني إنت هيك مبسوط لاحق جماعة بتضل مهددة بالقتل؟
لبناني 14: والله أنا لاحق الجماعة اللي بشوف إنو معها حق. وصاحب الحق سلطان.
لبناني 8: طيب، خبرني من سنة 2005 لحدّ اليوم شو ربحتوا؟
لبناني 14: ربحنا خروج الجيش السوري من لبنان.
لبناني 8: ضحكتني! فإذن نحن شو عم نعمل هون؟؟؟ خبرني شي غيره.
لبناني 14: ربحنا المحكمة الدولية اللي عم تنظر بالإغتيالات.
لبناني 8: قال محكمة دولية قال! إيه تبقى خبرني لما تكمشوا حدا من المتهمين! وغير هيك… شو ربحتوا؟
لبناني 14: أكترية نيابية.
لبناني 8: ولك يا عمي شو هالحكي! كيف إنتو أكترية ومش طالع بإيدكم شي؟ رئاسة المجلس معنا. الحكومة إلنا. تلات رباع البلد تحت سلطتنا. وبكرا بتشوف إذا ما منمسك المفاصل الأمنية كلها لما منزيح كم واحد باقي بطريقنا.
لبناني 14: حاجي بقا تهدوا مراجل. تنازلات 14 خلتكم توصلوا لهون لأنها ما بتآمن بالحكم الواحد. بس هالشي ما بقا يتكرر. انطر الانتخابات الجايي ومنشوف! بس دخلك… قلّي إنتو شو ربحتوا من ورا هالإنقلاب اللي عملتوه ووصلكم لحكم البلد؟
لبناني 8: بدّك أكتر من إنو ربحنا بلد نحكمه؟
لبناني 14: وشو هوّي هالبلد؟ شو إسمو؟
لبناني 8: ما بدا سؤال. وَلَوْ… إسمو لبنان.
لبناني 14: لأ… اسمحلي فيها! البلد اللي عم تحكموه صار إسمو كل شي إلا لبنان! مش شايف كيف هالبلد صاير غرقان بالأسود متل قمصانكم؟ اسمع مني يا خيي… روح غيّرلي هالقميص اللي بيطفي القلب والبس شي قميص أبيض، وتعا لنروح سوا شي كزدورة نفتش ع بلد إسمو لبنان! على الله نلاقيه…