برعاية رئيس حزب "القوات اللبنانية" الدكتور سمير جعجع ممثلا بعضو تكتل "القوات اللبنانية" النائب شانت جنجنيان، أقامت منطقة البقاع الشمالي في "القوات" العشاء السنوي في دير الاحمر، بحضور راعي أبرشية دير الاحمر وبعلبك المطران سمعان عطاالله، الاباتي حنا رحمة، منسق "القوات" في البقاع الشمالي المهندس مسعود رحمة، رئيس اتحاد بلديات دير الاحمر ميلاد عاقوري وفاعليات اجتماعية من منطقة البقاع الشمالي وقرى دير الاحمر.
جنجنيان حمّل في كلمته الحكومة وفريق "8 آذار" مسؤولية أي عملية اغتيال، مشددا على ان الفريق الآخر فشل بأدائه سياسيا وحكوميا وهو يحاول اليوم جر قوى "14 آذار" الى الحوار حتى تشحذ حقوقها بعدما فشلوا أمنيا واقتصاديا وبملفات الكهرباء والمياه.
من جهته، ألقى المطران عطاالله كلمة أعرب فيها عن ارتياحه "لحركة عودة الناس الى منطقة دير الاحمر في خطوة لافتة"، وقال: "آمل ان تستمر في تجمع هذه الاعداد بما يسجل الفخر للابرشية بأبنائها ولكي يكون هذا الاجتماع باكورة لاجتماعات دائمة تأكيدا للوجود المسيحي في المنطقة.
أما مسعود رحمة، فشدد على ان "أيام الاحتلال والوصاية ولت الى غير رجعة ومن غير أسف واليوم نعود لنؤكد ان قرانا سوف تنبض بالحياة بشكل دائم وليس بالمناسبات والاحزان والافراح". واشاد بانتصار الكورة، آملا بانتصارات في مناطق أخرى مستقبلية.
وفي ما يلي كلمة مسؤول منطقة البقاع الشمالي في "القوات اللبنانية" مسعود رحمة كاملة:
"مسا الخير، مسا الحريي، مسا الكرامة، مسا الإنتصار، مسا الحكيم….
بنقلكن مبروك:
المبروك الأول: عالنصر اللي حققنا بالكورة… وع قبالنا هون…
ما تستبعدوا شي: بالإيمان والعمل الدؤوب أكيد رح نوصل… إذا مش اليوم أكيد بكرا…
والجايي قريب وما قلنا شي إلا وحققناه.
الحق والمنطق والعدالي يمكن تغط عينن شوي… بس بالنهاية كلن بدن يتحققوا، ونحنا صوتنا رح يوصل، ومنرجع نأكد ما رح نقبل حدا يمثلنا بالبرلمان اللبناني إلا اللي نحنا بنختارو…أنتوا مش هِنّ… إيام الإحتلال والوصاية راحوا من غير رجعة ومن غير أسف…
والمبروك التاني: المكان اللي تم استحداثو وسهرتنا اليوم اللي كانت حلم وتحقق رغم كل الظروف والصعوبات.
هالسهرة ما كانت تحققت لولا اصرار وجهود الرفاق اللي بيستحقوا كل تقدير واحترام تـ"نبقى سوا" هون… وبضيعنا.
استوقفني "message" بعتو المكتب الإعلامي بالمنطقة: "هالمرة بعكس السير…."
بعكس السير:
بعكس السير: تنأكد أنو ضِيعنا بتنبض بالحياة، مش ضيع أموات…
بعكس السير: أكيد وقت الكل بيفضلوا الصورة عَ الجوهر… وبعد فترة زغيرة بيلاقوا معنا الحق… بيرجعوا يلحقونا…
بعكس السير: وقت الكل غمضوا عينين وسكروا دنين وصدت عقولن وقبضوا 30 من الفضة…..
بعكس السير: لما شلحوا تياب الحق وصرخوا: احبسوه… اشنقوه… تتوسع قدّامنا الساحات…
بعكس السير: لمن ما عاد الوطن ساحة للإنسان وملعب للكراميوالحريي… ولا للتعب عرق… ولا للحياة حلا… ولمنعاد العنب يعطي نبيد… ولا الأرض تربّي رجال… ولا السلطة عندا وجود…
بعكس السير وأكيد… بعكس التيار…أكيدأكيد… (كلنا منعرف إنو التيار بيهب هبات وبيروح وما بيترك وراه إلا الفوضى والخراب…):
رفعوا شعارات توحيد البندقية… السيادة والحريي والإستقلال… ودعم الدولة ومحاربة الفساد… شو بقي منن…كلمات؟…برددهاالنسيان… وشغلن ع الأرض عكس اللي طرحوه: تسكير طرقات… شل مرافئ الدولة… تعطيل مصالح الناس… وما بكفينا الإنحباس الحراري خلقولنا توليع دواليب…
خلي الكل يعرف:
– أرضنا ما رح نتركا…
– وصاية ما رح نقبلا…
– حدا يمننا بحق أصلاً إلنا مرفوض…
– تهميش ومسايرة مش بقاموسنا…
– اللي بيدفع مصاري وبيوافق يندعس ع كرامتو رح ينباع بأرخص الأسعار …هيدا إذا لقى حدا…
العمر كلو وقفة… يا بتنحسب معك يا بتنحسب عليك… والوردة اللي ما بتعطي عطر وراقا مفرفطين ما حدا بيطلع فيا.
من هون الشخص الناجح كلنا معو ليش ت يفل؟…
أما الشخص الخايف المتردد الفاشل ليش ت يبقى؟…
طالما الله معنا والعدرا حاميتنا وأرضنا رجالا (بنات وشباب): أبطال وعنفوان وكرامي، ما في خوف، لأنو بالآخر "ما بيصح إلا الصحيح".
آخرشي بحب أشكر كل اللي ساهموا بتحضير المكان وإنجاح هالسهرة…. بخص بالذكر:
– سعادة النائبين ستريدا جعجع وإيلي كيروز والوزير غازي العريضي المحترمين.
– بلدية دير الأحمر ولاسيما رئيسا المهندس ميلاد العاقوري المحترم اللي حسينا لأول مرة ما في روتين بمؤسسة من مؤسسات الدولة.
– بلدية عيناتا
– النائب العام لأبرشية بعلبك – دير الأحمر المارونية قدس الأباتي حنا رحمه المحترم
– إتحاد التعاونيات في المنطقة بشخص رئيسو الإستاذ صبحي الخوري المحترم
– الأشخاص اللي قدموا كابلات وآليات وشجر وتعب وعمل متواصل وما حبوا يذكروا أسمامين…
– القوى الأمنية والعسكرية السهراني ع أمننا…
– كل الرفاق وأهلنا الموجودين هون واللي قلوبن معنا…. واللي سقطت أساميهن سهواً…
منتلاقى المرة الجايي ب كنيسة سيدةبشوات ب: 11 آب 2012 ساعة 5 ب قداس شهدا المنطقة…
عاشت القوات اللبنانية
عاشت منطقة البقاع الشمالي تيبقى لبنان: سيداً حراً مستقلاً".