اليَوم رَح إكتُب باللهجة العاميّة اللهجة الِلبنانية الصافية تَماماً مِتِل ما كان يحكينا الشَيخ بَشير.
بَشير المُقاوم… بَشير القائد… بَشير الرَئيس… بَشير الحِلم.
بَشير المُقاوم يَلّي شاف الخَطَر الهاجم عَ وَطَنّا حَسّ بالمؤامَرة و أدرَك إنّو إذا ما حَدا وقِف وقال لاء أولاد الظُلمة رَح يكِبّونا بالبَحر ويَعملوا مِن لِبنان وَطَن بَديل.
بَشير القائد يَلّي عِرِف كيف يجمَع الشَباب حَولو و ينَظِمُن قَوّى إرادِتُن عَلَّمُن ما يخافوا وقَلُّن إنّو بايمانُن بوَطَنُن وبالقَضِيّة ما مُمكِن قُوّة تِكسِرُن.
بَشير الرَئيس الطالِع مِن قَلب المِتراس وصَفّ العَسكَر طالِع وهَدَفو واحَد إنّو يبني الدَولة لِ كِل لِبناني بيحلَم فيا دَولة القانون والعَدالة مَطرَح ما كِل مُواطِن بياخُد حَقّو من دون أي تَفرِقة أو تِمييز.
بَشير الحِلم… الحِلم الأبيَض الحِلو… الحِلم بِ جَنّة مَساحِتا 10452 كلم2 …حِلم زَرَع الأمَل بِ نفوسنا والرَجا بِ قلوبنا.
هَيدا هُوّي بَشير… الشَيخ بَشير… بَشير الشَهيد.
بِ 23 آب 1982 الفَرحة كانِت كبيرة لِبنان كِلّو رَفَع كاس الانتِصار وكِل واحَد فينا تطَلَّع بالسَما وشَكَر رَبّو لأنّو الخَلاص صار قَريب.
و بِ 14 أيلول وبَعد 21 يوم قَرَّر الاجرام يُخطُف مِنّا الحِلِم بَسّ هَالمُجرمين العُمَلا ما عِرفوا إنّو نِحنا شَعب ما بيركَع و إنّو بكِلّ واحَد فينا خِلقِت روح بَشير.
صَحيح كانِت الصَدمة قَويّة والمصيبة كبيرة بَس كِلمات بَشير كانِت أقوى مِن ظَلامُن، كِلمات نطَبَعِت بوجدان كِل واحَد فينا: إذا مِتِت و ما إجا مِن بَعدي 600 بَشير فَ 6000 سِنة علَيكُن وعَالقَضيّة.
يا بَشير ما يهِمَّك الـ 600 صاروا أكتَر بكتيرو الايمان صار أكبَر بكتير و النور لـِ شَقيت مِن خِلالو العَتمة بعُمرو ما رَح يُنطُفي.
يا بَشير ما تخاف "القُوّات الِلبنانيّة" بقيت عَ وَعدَك والمَسيرة استَمَرِّت وما وقفِت مَسيرة بُطولة وعُنفوان عَمَّدتا إنتَ بِ دَمَّك وتكَمَّلِت مَعموديّة الدَم مَع رفاق استَشهَدوا مِن بَعدَك كِرمال القَضيّة وتَ يبقى لِبنان.
قُوّاتَك هِيي هِيي عَ دَعساتَك مِشيت وعَ دَربَك عَم تسير قُوّات بَعدا مِتِل ما إنتَ بَدَّك ياها تكون قُوّات مُواجَهة وتَصَدّي بوجه الاحتِلال والفَساد وقُوّات مَحَبّة وسَلام لَبناء الدَولة القَويّة القادرة.
المَشعَل لِ ضَوَّيتو بَعدو هون حَمَلو بأمانة قائد جَبّار مَواقفو حَكيمة و إسمو الحَكيم ضَحّى بالغالي و ما تنازَل عَن ثَوابت فَدَيتا إنتَ بروحَك.
شَيخ بَشير إنتَ ما مِتِت……بَعدَك مَعنا……و رَح تِبقى حَيّ فينا.
يا رَيسنا القائد……………حِلمَك ما بموت.