عزيزتي الدولة اللبنانية،
بصراحة مش عارف من وين لازم بلّش، فارتأيت انو أفضل شي بلّش بالاعتذار، الإعتذار انو وَعيّتك من سباتك العميق يللي صرلِك شي أربعين سنة غاطسة في…
أما بعد الإعتذار فبقلِّك انو مش قادر حدد شعوري تجاهك، مش قادر حدد اذا بشفق عليكِ أو بحتقرك!!
بشفق عليكِ لأنّك ما بتشبهي الدولة بشي…
الدولة بتحكم وانتي بيتحكّموا فيكِ.
الدولة بينخاف منها وانتي بتعصى عليكِ مخالفة بنا…ما بتموني تسكّري كسّارة أو تفتحي طريق.
الدولة بتسيطر على أرضا وانتي بسيطر عليكِ حزب شمولي حاكم بقوة السلاح والتهديد بالسلاح والإغتيالات… وبالمال الطاهر من المخدرات والدوا المزوّر وحبوب الكبتاغون والأكل المغشوش…
الدولة بتكون الأقوى على أرضا وانتي الحلقة الأضعف.
بشفق عليكِ لأنو نظامك فاشل،
وسياسييكِ معظمن حراميِّ،
بشفق عليكِ لأنو حكامك تجار واقتصادك منهار
ولأنو صديقك غدّار وعدوّك جبار
بدِّك للصراحة… بشفق عليكِ لأنو شعبك… مع الأسف… مجموعة قبايل لا عارفة تعيش مع بعضا ولا عارفة تحل عن بعضا ولا عارفة تعمل منك دولة… بشفق عليكِ يا دولتنا العليّة لأنو آكلتك غرائز الحقد والطائفية…
بشفق عليكِ لأنو شعبك مش شايف انو حالو عم يرجع لورا … بس شايف حالو بشوية عرق وتبولة وكبة نيّة.
بعدو عايش عل المجد اللي راح… لما كان سويسرا الشرق وباريس الصغيرة ومنارة الحرية…
ومش شايف انو صار كابول المتوسط وطهران الصغيرة ومرتع التكفيرية…
بشفق عليكِ لأنو حكومتك كذابة،
بتنتقد حالا،
وبتسب حالا،
وبتتظاهر ضد حالا،
وبترجع بتهني حالا بانتصارات وهمية…
بشفق عليكِ لأنو وزير فيكِ ما بيعبر حكومتو وبلدو ومصلحة بلدو وحقوق بلدو… مش فارقة معو رئيس وزرا أو رئيس جمهورية… فاتح على حسابو… وحسابو عند الحزب المدّعي للألوهيّة…
بشفق عليكِ لأنو هجّرتينا وهجرناكِ… هجّرتنا طبقتك السياسية…
وبيطلع واحد من أبطالا يتعنتر من ورا الميكروفون ويتهجّم على الدول الخليجية…بدّو يهجّرنا بعد مرة!!
قادر هالجهبذ يلاقي شغل لللبنانيّ اذا فلّو من الخليج؟!
قادر يعيّش ولادن ويطعمين و يعلّمن؟!
قادر هوي ووزرائو الفاشلين يستغنوا عن المليارات يللي بيبعتوا اللبنانيّ العايشين بالخليج ليخلّو هالإقتصاد الفاشل يضل مضاين؟!
مين بيهتم فين اذا فلّو من الخليج؟! ايران أو حزبا بلبنان؟
بشفق عليك لأنو ما عدتِ دولة…
لا كهربا، لا طرقات، لا دوا، لا قانون، لا حقوق، لا فن، لا ثقافة.
بس زعران ….زعران وسلاح واغتيالات… وقطع طرقات وحرق دواليب ومسبات واهانات… وخوف…
بالشوارع زعران… بالحكم زعران… بالإدارات زعران… حتى الزعران اللي بالحبس أقوى منك وبيتحكموا فيك من ورا القضبان..
بشفق عليكِ لأنو بعد في كم آدمي عم يجرّبوا يصلحوكِ…رغم ضعف الأمل
عزيزتي الدولة اللبنانية… لكل هالأسباب بشفق عليكِ. بس بحتقرك لأنو الدولة نحنا ونحنا هيِّ.