المعادلة السحرية التي تحمي لبنان. سحرية لانّو ما بتحمي لبنان الا اذا كانت مكتوبة بالبيان الوزاري. اسرائيل طلعت بتخاف من الحبر على ورق… لانّو لحظة يلي هل المعادلة بتنشال من البيان، بتهجم اسرائيل!!!
طيب، خلينا شوي نفكر… لنحسب انو البيان طلع بلا هل المعادلة وإسرائيل قررت الهجوم، شو رح يعملو الشعب والجيش والمقاومة؟
الشعب، قسم منو رح يهرب وقسم رح يستقبل؛ عدا عن الموت والإصابات…
الجيش، وحسب الفسحة المعطية لإلو، بيعمل شوية امن، ع تطفاية حرائق ونقل جرحى ومصابين، مع احتمال مناوشات؛ أكيد حسب كبر الفسحة…
“المقاومة” بتحارب العدو، وطبعا رح تنتصر…
هل في حدا بيعتقد انو الشعب والجيش والمقاومة ممكن يعملو غير هيك؟
اسرائيل عندها نظرة عدائية ضد لبنان… يعني وقت يلي بتشوف انو لازم تهجم، بتهجم…
خلينا هلق نقول انو المعادلة السرية صارت حبر على ورق، شو رح يتغير؟ هل الشعب رح يعمل شي غير؟ الجيش؟ “المقاومة”؟ هل اسرائيل بتغير فكرا؟
الشعب موجود وما بدو بيان … الجيش كمان… وكل يوم “المقاومة” بتذكرنا بوجودا من الحواجز الأمنية، لسوريا، و لطلات التلفزيون… موجودين بحبر او بلا حبر…
اذا كان هيك، ليش الإصرار عل الحبر؟
الحبر مهم لحتى الحزب يستعمل المعادلة لدعس الشعب، وتهميش الجيش، وتقوية وضعو داخليا… الحبر بيعطي ورقة لتبرر قانونيا كل شي بيعملو من الحواجز الاخيرة، لمخالفات البناء، لمصادرة الاراضي، والسيطرة على المطار والبور لتهريب البضائع من دون جمرك وضرايب… هيدي معادلة سحرية بمعنى انها معادلة تسلطية بوجه السلطة، وتنفيعية بوج النفع العام… معادلة سيطرة، بس مش على النية العدوانية الاسرائيلية وانما سيطرة على الشعب والجيش والدولة…
سؤال صغير: قبل اختراع هل المعادلة، ما كان الحزب عم يقاوم؟
وسؤال اكبر: اذا المعادلة ما صارت حبر وهجمت اسرائيل، هل الحزب رح يتفرج؟ اذا نعم، فهو ليس مقاومة، واذا لا، فهو ليس بحاجة الى الحبر…
ومن سخريات القدر انو الحزب يلي بيعتبر حالو بدو يرد الحق للإمام علي، عم يستعمل الحبر قميص عثمان من اجل القضاء على الدولة، يلي هي شعب وجيش ومؤسسات…