وصيّة جدّي إليّ قبل ان يتوفى، أهديها لأهل الذمّة:
قلّي همس، جدّي قبل ما يموت
كلمة صداها معشعش بدمّي
“راسي رْفعوه طلوع بالتابوت
مرفوع راسي من بطن إمّي”
“مرّت علينا جْحافل من الخوت
شي مِيْتْ إمّة عْليك ملتمّة
وكَنّا ما بدّا تخبّرك بيروت
عِدّن ع نهر الكلب كم إمّة!”
“تُوقع!… ونرجع نشقعا البيوت
إلا بِإسم الربّ ما نسمّي
غير الصلابة ما مناكل قوت
غير الكرامة ما شرب تمّي”
“نْ شفت الغلط، شو لو نفع السكوت
جدّك بصفّ السمسرة أُمّي
ولأيش بدّي زرار من ياقوت؟
ما زال خيط تراب ع كمّي!”
“عمري انتهى وناطر حكم تالوت
واسمع يا جدّي منيح شو همّي:
همّي إذا بيطلّ شي “جالوت”
يطلع حدا من الناس، من يمّي
ويوقف معو يدلّو لوين يفوت
ويقلّكن هيدا إبن عمّي!…
وقّف يا جدّي قبال هالعكروت
وعّي اللي غافي وقول بين الناس:
نحنا يا شعبي مش أهل ذمّي!”