هالقال “هي شحطة قلم”…
غلطان!
مش عالخرايط مطرحَك!
ولا كمّ تلّة شاقعة حيطان
عالشرق… فيها تشرحك!
إنتِ متل “فتحوا ورق وجدان”
دمّين عالتاريخ رسموا مسرحك:
دمّ لْ على جبينن إسم “لبنان”
ودم لْ ما طايق قعدتو بشريان
كل اللي فكّر يجرحك!
**************
إنتِ اللي قبل،
جدودنا عملوك
ختموا الوصيي بإسمنا وفلّوا:
“عن هالأرض ممنوع تتخلّوا
لولا مرق مِيّة ألف مملوك”!
إنتِ اللي قبل، ملوك
وجيوش ما حملوك
عينو عليك مْحيطنا كِلّو
إنت اللي قبل، بصدرهن حملوك
أهلك ع وسع كفوفهن علّوك
كانوا إذا شافوا العِدا طلّوا
حِضروا ما كَلّوا، ت العدا كَلّوا
كلما إجوا مرّة ت يحتلّوك!
*******************
يا “صيغة التسعين”:
“قوروش”(1) وصدرو ضاق!
بدّو ع غفلة يغيّر الميثاق
مش عاجبو تخمين!
هيدا ميثاق “عتاق”
من كل التلاوين
مضيوا سوا ع وراق:
“منعيش مجموعين”!
هيدا متل “عاصي الحدث”
لو “إبن صبحة”(2) فاق
بيطلّ هامة معنونة: “المقدّمين”
هيدا متل “هاك الخشب”:
لولا إجا سرّاق
“هرقل”(3) بيخلق كل عشر سنين!
**************
جايي الهوا ملمال؟
في ناس صاروا بعاد؟!
يمكن بيحبّوا المال…
معليش، لا تزعل مِنُن، الولاد
شو عرّفن؟جابوا شي مرّة بلاد؟!
هودي إذا شَرّا، شي مرّة قال:
“بدي الوطن”، قالوا: “معك رسمال؟”
معليش هودي ولاد!
يمكن بيحبّوا المال…
يمكن ما صاروا رجال…
هودي نْ مرق بيّاع، قالوا: “قعاد”
سألوا، متل ناطر هدايا عياد:
“قديش بدّك حقّ استقلال؟”…
*********************
الولاد هني ذاتهن يا ناس
عاللعب شو عندن جلد!
بِكلّ بلدان الدني ريّاس
ونحنا ما عنا بهالبلد
مطرح ما لازم يرقعوا الجراس
وينو ل عم يدق الجرس؟
وين العصا ووين الحرس!؟
كتر الحكي مش “مجد” يا حراس
والمملكة عم تنجلد!
والعيد!؟
أيا عيد يا وسواس
ومن “الفخامة” بيولد؟
كرسي رياسي بعدها بلا راس
وبعدو عم بيلعب هالولد!
*********************
ع كل جيل محتّم ومكتوب
“يوضاس” يطلع من قلب منّو
و”بيلاطس” يغسّل دَيْه…
بِ كل جيل بيستلم، مطلوب
عالجبهتين يحضّروا الحروب
من ميل برّا، في عِدا جنّوا
ولبنان هجموا لَيْه
ومن ميل جوّا،ع ضعف القلوب
في ناس ع باب العَدُوْ تْمنّوا
يرمي لهن كرسة حصى ولنّو،
وبيبوّسوا إجريه!
من كم جيل وهالوطن مصلوب؟!
لكن يا أهلو بقلّكن إنّو:
“لولا اقترعتوا عليه
واتمسمروا إيديه
بيطلّ مين بينصلب عنّو!
وبيقول لَجْلَك يا وطن كنّو
رح بنصلب…
مَعْلَيْه!”
*********************
لبنان! يا لبنان! مِنّي سماع:
عرّم بصدرك! قوم! لا يهمّك
لا تخاف!
إرث جدودنا ما ضاع!
منفهّمو: “هالأرض مَنّا مْشاع!”
كنّو حدا بحجّة “إبن عمّك”
طالع ع بالو لحصّتو يضمّك!
منفهّمو: “هالأرض ما بتساع”
إلّا اللي هنّي بسّ من يمّك!
لا تخاف!
مربى سباع
نِ بردت منضمّك
نحنا ما عشنا غير ت نشمّك
“وبركي وقعت؟!”…
لا تخاف!
ما بتوقاع!
شعبك جَرِد بيقوم ت يلمّك!
**************
(1) – قوروش: ملك فارسي
(2) – أبن الصبحة: خائن ماروني، برزت خيانته في موقعة “عاصي الحدث” فوق وادي قنوبين
(3) – هرقل: هو الذي استردّ صليب المسيح (“هاك الخشب”) من الفرس، الذين سرقوه من القدس