بجو من الرجاء، إجتمع المئات من أهل وأحباء ورفاق الزميلة والرفيقة نانسي رؤوف زيادة حول مذبح الرب في كنيسة “سيدة النجاة” في جورة الترمس صباح الاحد 1 شباط 2015 عند العاشرة صباحاً حيث أقيمت الذبيحة الالهية لراحة نفسها لمناسبة مرور أربعين يوماً على رحيلها.
القداس الذي خدمته جوقة من الاخوة في جمعية “المرسلون اللبنانيون الموارنة” (الكريميين)، تخلله صلوات أعدت خصيصاً للمناسبة.
ومما جاء في النوايا:
1- منصلي يا رب عن نية إمنا الكنيسة وعلى رأسها بابا الفقرا، بابا الثورة ولكن بحكمة ومحبة، البابا فرنسيس يلي كان لنانسي نعمة انو تشارك بحفل تقديس بابوين بحضرة بابوين، حفل تقديس البابا يوحنا الثالث والعشرين والبابا يوحنا بولس التاني، بحضور البابا فرنسيس والبابا بنديكتوس، من بعد ما الله سهل بآخر دقيقة مشاركتها برحلة روحية لـَ ايطاليا بنيسان الماضي، وكانت فرحتها مش سايعتها رايحة لعند jean paul 2. يا رب عطينا كهنة قديسين متل هل بابوين، وبارك بطريركنا مار بشارة بطرس الراعي وأبينا مار نصرالله بطرس صفير وراعي ابرشيتنا أنطوان نبيل العنداري وكافة الاباء والرهبان والراهبات، يا رب أرسل فعلة لحصادك وعطينا دعوات مقدسة، إلك يا رب منصلي.
2- يا رب، عطينا نعيش فرحة اللقاء فيك وبأمنا العدرا، بالذبيحة والقربان والمسبحة وننعم بالسلام الداخلي رغم صعوبات هل حياة متل نانسي، يلي كانت تشارك بلهفة بقداس الاربعا بحريصا تحت جناح سيدة لبنان، وعطينا متلها نعيش ايماننا ببساطة يومية عبر محبة خينا الانسان متل ما هو، الابتعاد عن النميمة، مساعدة الاخر ع السكت، ونعرف انو افعلنا الصغيرة جواز عبورنا نحو القداسة الكبيرة، إلك يا رب منصلي.
3- يا رب، منحط بين ايديك عيالنا وشبيبتنا يلي هني امل بوكر، حصنهم من عواصف الخطية ورياح الشر، وبعّد عنهم تجارب اللذات الفانية والادمان عل مخدرات، خليون يضجوا بالحياة والفرح متل نانسي بس ما تخلي ضجيج هل العالم ينسيهن صوتك، الك يا رب منصلي.
4- يا رب، خلي عينك ع شرقنا لعم ينزف بسبب جنون الديكتاتوريات وهمجية التطرف ولامبالاة او مصالح لدول الضيقة. يا رب حمي لبنانك، هل ارض المجبولة بقداسة شربل ورفقا والحرديني وغيرهم كتار، ومجبولة بعرق جدودنا ودم شهدائنا، علمنا نلتزم متل نانسي وناضل كرمال لبنان الحرية والتعددية، وطن الرسالة وطن يصون كرامة الانسان وحقو بعيش ايمانو بعيداً عن اي ذمية او خوف، إلك يا رب منصلي.
كذلك، قدم مع القرابين، مجسم للسيدة العذراء وبيت مسبحة وكاتب “نهاركم سعيد” وهو يتضمن عبرة يومية من القديس “بادري بيو” وزعوا في نهاية القداس بالاضافة الى بطاقة عمل نانسي للعام 2015.
وتلي النص الاتي خلال تقديم القرابين:
1- يا رب، منعرف قدر معزتك لامك مريم العدرا، هيي يلي بعرس قانا مانت عليك وعدلت مواقيتك، حبين نقدما هل مجسم تا يتبارك وتكون امنا العدرا ساهرة على بيوتنا.
2- منقدم بيوت المسبحة يارب تـ نقول للعدرا شو منحبك يا امنا وشو محتاجين الك إنت يلي وصيتينا تسلحوا بالمسبحة بوج اي ضعف أو تجربة، المسبحة جرعة قوة ونفحة سلام، بيوت المسبحة منقدمن ع نية نانسي القلب الحلو، البسمة ل ما بتنطفي، ع نية المحبة السايعة الكل، ع نية العمر ل انطفى هون وضوّى هونيك بحضن يسوع
3- بتحبي بادري بيو، ومن وحي هالقديس المتواضع نسجت حبك للدني، باسم هالقديس لالك نانسي كل يوم حبة صلا، كل يوم كم سطر من كتابو، هل كتاب يلي صرلك شهرين عم تقري يومياً، هل كتاب يلي حتطي ع مكتبك بالشغل، كل يوم عِبرة و بسمة للذكرى وللحب ت تبقى حياتك الجديدة مطرح ما انت سعيدة، ويبقى نهارنا بذكراكِ سعيد.
4- منقدم بطاقة عملك نانسي، للرب تا يبارك اعمالنا، ونكون متلك عم نشهد بالفعل وببساطة وفرح لمحبة يسوع ونعكس صورتو من حولنا، نكون متلك عم نشتغل مش خوف من رب عمل أو قوانين بل عم نشتغل لانو الشغل بضمير هو فعل صلاة، ونتذكر قول الطوباوي الاخ اسطفان “الله يراني”
كذلك في ختام الذبيحة تليت صلاة الشكر الاتية:
منشكرك يا رب عن نعمة المشاركة اليوم بالذبيحة الالهية، يلي إتحدنا فيها نحن ونانسي، كنيسة الارض وكنيسة السما بالقربانة، خلي روحك يشتغل فينا ونكون شهود لحضورك بكل ثانية من حياتنا، غمرنا بالسلام والفرح والرجا، وعطينا انو نشكرك بعيش المحبة وخدم الاخر وحمل صلبان هل حياة بفرح. الك المجد لللأبد.
وبعدها عرض تقرير مصور تحية لنانسي.