هالضيعِةْ اللي حارسة التلّة
بعرف بِقلبا واسع محلّي
“بقلوبنا، لْ بيحبّنا، بيبات”
ع كل مفرق بيت بتقلّي!
يا الساهرة لِمْ حزّت الحزّات
يا سدّ ردّ جيوش محتلّة
طافت ع بيدر نخوتك هامات
لما اندعيتي بموسم القِلّة
بيني وبينِك عجقت الكلمات
واليوم جايي نفّض السلّة
بيت الشعر هالغفِّتو الورقات
لمّن سمِع دق الجرس بقنات
مِنّو لحالو قام ت يصلّي!
******
نسر المجد من هون… شو همّو
نِ اتجمّعوا الغربان والتمّوا:
ما في كذب بكتابنا تْأرّخ!
عم ينكروا… وبعدو طري دمّو!
شوكن قسا، فوق القبر فرّخ!
هنّي نْ نِسْيوا، نِسِيْتو إمّو؟؟!
صوتا لْ وقع: لمّا الصدى لمّو
انبحّ الصدى من كتر ما صرّخ!
******
جيش الوحش لمّن ع أرضي اندزّ
رِجْمِةْ عضام بإيدك تشقّع
يا رْفيق نحنا قلوبنا بتحزّ
توب الوطن لليوم ما اترقّع
في ناس كبّوا عالأعادي رزّ
في مين باعك إلْهُن ووقّع!
جرحك قَطَب، بس الأرض بتنزّ
لليوم بعدو الدمّ ما صقّع!
لا تنام!… مش رح فيك تشبع عزّ!
هيدي الأرض صرلا عمر بتهزّ
لولا ما انتِ سانِدا بْتُوقع!
******
افهمني يا خيّي لَوْ اشكيتلّك
عم بشتكي عالصّابهن نسيان
مطرح ما نايم هون بتضلّك
ملجا الدفا بهالليل للبردان
لا تفتكرني اليوم عَ مْطلّك
جايي تَ إنعي الخيل بالميدان!
ما في غريب بأرضنا تملّك
بعدا ع بابا واقفي الفرسان
وجراس كلما تدق بتدلّك
ع كم تلّة واقفي الصلبان؟
وعيون شعبك حافظة محلّك
وقلوبهن بتموت عن لبنان
ع قدّ ما بتموت بِلبنان!
******
رح طمّنك، لا يحكمك وسواس:
التاريخ عِنّا قصّتو نَصّا
غير اللي لهتو عرّق المتراس
مين اللي قادر يكتب القصة!؟
لا تخاف! عِنّا ريّس الرياس
بعدو الأعادي بيعرف يرصّا
عنّا حكيم بتلتجيلو الناس
كلما القلوب تحسّ بِغصّة
لا تخاف! ما بتكلّ هالحراس
ما بكلّ قرنة انت متوصّى
يوضاس قرّب ورقتو تيباس
هيّي وأسامي كتار بِنصّا
لا تخاف! بعدو مبلّش القداس
وكلما شقل علّيقتو يوضاس
نحنا منعرف كيف منقصّا!