في ذكرى اربعين المرحومة مريم بشارة والدة النائب انطوان زهرا- كفيفان في 12 نيسان 2015:
جينا نصلي بيوت مسبحتك سوا ومع كل حبي نقول الله يرحمك
لا تزعّلي يا ام طوني الحاضرين طلي وشوفي هالاحبة الطيبين
قالوا صباح الخير ردي ع الصباح انت صباح اللطف، ينبوع الحنين
ولادك عا باب القبر نهداتن رماح وشبعت حجار البيت اهات وانين
خي واخت يا جناح يلوي عا جناح غيابك كسرهم والرياش منتفين
يا لابسة من الطهر والعفة وشاح شربل شو بدو يقول يوم الاربعين
من غياب امي وبعد قلبي ما ارتاح وانت يا امي التانيي بحلف يمين
غيابك يا ام الكل مسّونا جراح حتى الشوادي بالبراري ساكتين
ومن كل ناح الناس فطرت ع النواح الدمعات حدة والعيون محجرين.
الام كلمة قد هالكون الرهيب وفوق الاسامي اسم مريمنا سما
مريم البكيت ابنها فوق الصليب وسكبت دموع العين ع التربة دما
ومريم عليها ولادها زادوا النحيب ونشفوا عا قبرها الجوري حيما
اجتمعوا الاحبة من بعيد ومن قريب وللصلا عن روحها الشمل التمى
يا حسرتي عا سراجنا مطفي كئيب وهني عا نور الزيت في اطهر مكان
التقيوا المريمتين بي قلب السما
يا ام طوني قلبك الابيض رخام عرفتك حنوني من القلب بتضحكي
ومتلك ولادك يرحم ابوهم ع الدوام صاحب قيم وشموخ يتخطى الحكي
وطوني بقلب المجلس وعالي المقام زهرا بتنشر عطرها كل ما حكي
هم الوطن عاطيه كل الاهتمام زينة شباب الارز هالشب الذكي
بذكر بيوم غيابك “زغار الحمام” عا درفة الشباك تحدي وتشتكي
“احفاد” تشهق ماتت التيتا حرام بكوا صخور الصم من كتر البكي
هالعمر سفرة قاسية بدنيا العذاب والموت حق وما لنا عنو بديل
نيال قلبك طاهرة ختمت الكتاب حملت الامانة لربك ونعم الوكيل
دخلت تراب الارض قدست التراب وعيون كيف ما مال نعشك عم تميل
وقبل الفراق المر ودعت الشباب لا تزعلو يا بيار يا طوني واميل
بيكفي يا لينا ويا نبيها اكتئاب وانت يا رمزا مع سمر حاجي عويل
الام اللي فتحت ع السما مليون باب ضلوا ارقصوا بتذكارها وغنوا الرحيل
يا تاركة هالارض الله يكرمك بسمة رضى الرحمان غمرت مبسمك
لولا كنت رسام ناوي ارسمك بربي بدون المسبحة ما برسمك
جينا نصلي بيوت مسبحتك سوا ومع كل حبي نقول الله يرحمك