برعاية سعادة محافظ بعلبك الهرمل الاستاذ بشير خضر أقام مركز المطالعة والتنشيط الثقافي وبلدية القاع مؤتمرا حواريا لاطلاق حملة “بصتنا” بالتعاون مع جمعية مسار وبدعم من منظمة أكشن أيد – المبادرة العربية الجمعة 11 ايلول الجاري في تمام الساعة السابعة مساء وتضمن المؤتمر عرضا لنشاطات الحملة قدمها شباب وصبايا المركز، الذين شكروا سعادة المحافظ والبلدية والمؤسسات المشاركة على دعمهم ورعايتهم وشراكتهم. وقد شاركت بالمؤتمر فعاليات قاعية، بمداخلات توجهت للشباب كل من الاب سابا سعد، والمحامي نقولا مطر، والاستاذ طوني وهبه، والمحامي بشير مطر واخصائية التغذية الانسة جويل فرحه والمهندس وديع ضاهر كل بمجال اختصاصه وانطلاقا من خبرته ورؤيته لتطور مجتمع الشباب القاعي، وكان عنوان مداخلة رئيس مركز “القوات اللبنانية” في القاع “ما بينعسوا الشباب وممنوع ينعسوا”.
وقال مطر: “”ما بينعسوا الشباب”، ممكن يتفاجأ البعض من هالعنوان ويربطوا بشعار سياسي، انا ما عندي مشكلة، مع انو الهدف من التوجه للشباب مش الحكي بالسياسة بمعنى الدعاية السياسية، بس الهدف هو الحكي عن قضايانا ومشاكلنا من دون محاذير وعقد نفسية وافكار مسبقة”.
وتابع: “ما بينعسوا الشباب، لأن الاكبر منن (أي نحنا) غاطط بنوم عميق وحتى احلامنا، صارت بتشبهنا، وهي تحت السقف المطلوب بكتير، بتراعي الخواطر ما بتزعل حدا، متواضعة، مترددة خايفة، غوغائية وكمان انانية فردية. مصلحية، نفعية”.
واستشهد بقول لجبران خليل جبران: “كم من الناس صرفوا العمر في اتقان فن الكتابة، ليذيعوا جهلهم لا غير”، وفي ناس بتكتب تتب حقدا خبثا وافكارا الهدامة، وتتخدم مصالحا الخاصة وتحّرف الحقايق وتزوّر الوقايع… وممكن كون انا منن وعاراسن. لهالسبب مالزم تنعسوا يا شباب وماتتعبوا وما تيضيعو تيضيّعوا لازم تفتشواعن الحقيقة و المعرفة، بالاستقصاء بالسؤال وبالرجعة لورا، يعني مفروض قبل ماتجوا لهون أو لمطرح تاني، تاتفهموا اكتر شوبدنا نقول، لازم تتطّلعوا عافكار واداء واعمال وتاريخ ومصلحة وخلفية كل واحد منا، وما تخلوا حدا يغشكن”.
وأضاف: “”ما بينعسوا الشباب وممنوع ينعسوا”، وبينعسوا لما بيحضروا اجتماع عام او خاص او ندوة ويفوتوا بنقاش متل صفحة بيضا مين ماكان بيكتب شوماكان عليا، متل ماعم يصير معنا بهالايام، مش هون بس بغير مطرح أكيد، ماعم نطلب التخصص بالذرّة، بس المطلوب شوّية جهد، انو معقول شخص مسؤول بالانتخاب او بالتعيين او مصّنف حالو فعالية (فاقد الفعالية)، صرلو كذا سنة بيتعاطى بالشأن العام، مش نازل عا منطقة مشاريع ومابيعرف مناطق بعيون من جوارمائية من وادي الخنزير، مابيعرف مين محتل هالارض ولا وين متواجد العرسالي او الهرملاني او التركماني ولا وين وكيف قاعد السوري النازح او العامل ؟؟؟. معقول هالفعاليات المنفوخة المفعول بها، بتخلط بين مسؤولية المختار ومسؤولية الخوري، مابتعرف شو امكانية وصلاحية البلدية (مجلس ورئيس)، وما بتعرف مين صاحب الصلاحية بمنع تعديات البنا، ولا وين بتبلش صلاحية المحافظ ووين بتنتهي وشو يعني ميّ ورئيس لجنة المي. اساسا القضية معقدة وبتضيّع لانو ماحدا عم يشتغل بشغلتو، وفي منن فاقدي الشرعية والقانونية و الاهلية”.
وأردف: “”ما بينعسوا الشباب وممنوع ينعسوا”، وهني بينعسوا لما بيحفظوا كل اغاني بيت الديك ورامي الحسين وطلقني يا عبدو… ما يعرفوا ابن ضيعتنا كلود شلهوب عا سبيل المثال كموسيقي عازف وملحن اخد جوايز عالمية، وما بيعرفوا انو عنا نايب مهم وشغيل ومتابع لقضايا منطقتو من بيت شحود بالمانيا الاتحادية، وما بيعرفوا وين منتشرين مغتربينا باميركا الشمالية والجنوبية ويحاولو يوصلوهن بأرضن، وما بيعرفوا كتّاب وادبا ورسامي ونحاتي وفناني ومبدعي ضيعتنا، وأكتر وأكتر ما بيعرفو تاريخ ضيعتنا لبيعود لاكتر من الف سنة… ولا وين بتصير مواقعنا الاثرية المهملة ومابيقاتلو تيحافظو عليا، ومابيعرفو شهدائنا ويحفظوا اساميين وصورن ويصونوا التراب يلي استشهدوا كرمالو”.
وقال مطر: “بينعسوا لما يعبوا الدني بصور السلفي والاكل والاركيلة والسفر عاوسائل التواصل الاجتماعي وماحدا يتذكر او ينوّه انو في عنا طلاب وغير طلاب متفوقين بكل المجالات وعنا طالب من مهنية القاع طلع السابع بلبنان.ومانشوف صورة للعامل لعم يلم الزبالة وللعمال لعم يسقوا الشجر أو للمزارعين أو للرعيان الباقيين بأرضن تنقلن يعطيكن العافية. أوصورة لقلعة فخر الدين،جباب القنا،وقناة الست بلقيس الاثرية، أو حتى صور دعائية للمؤسسات القاعية تندعم وجودا ونحّض القاعيين تيشتروا منا”.
واستطرد: “ما بينعسوا الشباب وممنوع ينعسوا، وبينعسوا لما ما بيحاربوا بقوة أفات السكر ولعب القمار والدعارة وتعاطي المخدرات والمتاجرة فيها، ومابيوقفوا بقوة ضد قطع الكهربا والتعدي عليا، وضد قطع الميّ والتعدي عليا، وضد بيع الارض والبنا بالتعدي عليا وتهريب مواد البنا للمعتدين، ويطالبوا بقوة وبالعقل والمنطق انطلاقا من المصلحة القاعية مش مصلحة اي حدا تاني،بالحد من انتشار السوريين بمنطقة المشاريع قبل ماتصير كل المنطقة (مخيم عين حلوة كبير ) وأرض خصبة للتطرف والارهاب ولي حتما بدا تغيّر هوية أرضنا وتقضي على وجودنا، بينعسوا لما مابيتصدوا لفتح المحلات التجارية السورية لعم تنافس محلات القاعيين وتقطع برزقن”.
واعلن: “ما بينعسوا الشباب وممنوع ينعسوا، وبينعسوا لما يقبلوا بالافكار لبتقول انو الطوايف والاحزاب سبب المشكلة بالبلد، وكل السياسيين فاسدين، ساعتا منبطل كمسيحيين حزبيين ومنبطل طائفيين وما بيعود عنا ثقة بحدا، وغيرنا بيضل طائفي ومذهبي وحزبي وموالي لحزبو وزعيمو للعضم، والنتيجة بتصير الطوائف والاحزاب لعند غيرنا عم تواجه مجموعة افراد عنا لا حول لها ولا قوة، ومنزيد خسارتنا خسارة ونهمش حضورنا أكترواكتر، نعم لازم نحارب الفساد وقلة الاخلاق بأحزابنا وطوايفنا وحتى بعائلاتنا ونعمل لتقديم الافضل منن باي استحقاق انتخابي، ولازم نتنافس تنافس شريف راقي وحضاري، متلا اذا القوات دعمت المدارس،التيار بيدعم المزارعين، اذا القوات عم تقاتل منشان الارض التيار بيقاتل منشان الميّ. ولازم نستفيد بزكا وحنكة من اختلافنا لمصلحة القاع واهلها، أوقات لازم نتفق انو نختلف”.
وتابع مطر: “ما بينعسوا الشباب وممنوع ينعسوا، وبينعسوا وقت لما ما بيعرفوا يفصلو بين الحزب والمليشيا وبين السلاح الشرعي والسلاح غير الشرعي ويعرفوا انو الجيش وحدو بيحمينا ووحدو صاحب الحق بحمل السلاح وخوض الحروب وكيفية خوضا وتقرير توقيتا، ويعرفوا اكتر انو هالضيعة لي قدمت هالعدد من الشهدا ولعندا هالشباب لحميوا كل لبنان وقت يدق الخطر عالبواب،بيعرفو كيف يحمو ضيعتن وغير ضيعتن”.
وشدد على انه “ما بينعسوا الشباب وممنوع ينعسوا، وبينعسوا لما ما بيكون عندن الجرأة تيقولوا للسني مافيك تحتل أرضنا وتغير هويتا وتعمل تجمعات سكنية أو امارات دينية عنا وتهدد أمّنا ووجودنا، ويقولوا للشيعي ما يحرض عالسني ويكون شريكو باحتلال ارضنا ويسهّلوا البنا والتعدي عليا، و ويقولولو للشيعي وحزب الله بالذات مافينا نكون معك بحربك ضد الارهابيين وعندك ناس من بيئتك عم تسرق ارزاقنا بالمشاريع وتقطع ميّتنا وتتعدا عليا، وتقطع الطرقات وتقوّص علينا وتشلحنا سياراتنا، وكل ماصار مشكل بيهدودنا انو جايين يكسروا راسنا، وراسنا مابيتكسر، ومنقلن كلّن بدنا نعيش معكن شركا اسياد عاراضنا، بدنا نحبكن مابدا نخاف منكن،وما نقبل ابدا نعيش اهل ذمة… صديقك من صدقك القول وليس من صدّقك”.
وأضاف مطر: “ما بينعسوا الشباب وممنوع ينعسوا، لانو دورن كبير واساسي بحماية هوّية ارضنا تضل لبنانية مسيحية وقاعية، ويحددوا دور ووظيفة ارضنا الاقتصادية والمعيشية، تنصير رواد بالثقافة والمعرفة وبالتعليم والمدارس، رواد بالخدمات السياحية والطبية والتجارية، رواد بالزراعة وبالخدمات الزراعية، رواد باستقطاب السياح والصيادين وتأمين افضل الخدمات الن. رواد بالاستفادة من المعالم الدينية والأثرية والمهرجانات رواد بنضافة الشوارع وتحديثا وتطويرا، وما لازم يغيب عن بالنا ابدا انو الحرب بسوريا بدا تنتهي وكيف ماانتهت، سوريا بدا تشهد فورة عمرانية ولازم نحضر حالنا ونستعد كضيعة حدودية خسرت وتضررت كتير من الازمة،تنساعد باعمار سوريا ونستفيد لأقصى حد من الاعمار ونعوّض خسايرنا، لازم نكون حاجة وضرورة لا يستغنى عنها للمحيط لنعزز استمرارنا وبقائنا على هذه الارض”.
وتابع: “ما بينعسوا الشباب وممنوع ينعسوا، لان الواعي منا حاليا رح ينعس قريبا ولازم يضل حدا سهران يحفظ الامانة، وتيكون السهر مجدي ويعطي نتيجة لازم يتطور مركز المطالعة والتنشيط الثقافي ويتحول الى مركز دراسات الكتروني ويساهم بانشاء البلدية الالكترونية ويجمع العقول والطاقات والافكار، يوجه المجتمع ويرشدو ويبحث ويدرس ويخطط ويبدع بايجاد الحلول لمشاكلنا على المدى الاستراتيجي، أما بالمدى المنظور لازم يكونو الشباب متل المرا النكدية (وفي عنا نماذج كتيري) لبتضل تنق و تنق تتوصل للبدا ياه، برفع الصوت بالاعتصام بالتظاهر بالتواصل مع المسؤولين والوزرا والمحافظ وقوى الامن والبلدية والاعلام (100 هاشتاغ لقضية بتعمل شغل كبيروماننسى انو الفايسبوك والشباب اسقطوا انظمة وحكام.). نحنا اصحاب حق ولازم نبقى ندافع عن حقوقنا”.
وختم مطر: “فينا نكون قوات وفينا نكون تيار وفينا مانكون، فينا نكون 14 وفينا نكون 8 وفينا مانكون، بس مافينا الا مانكون قاعيين اسياد احرارنضاف واعيين تنحفظ ارضنا لأبد الابدين، واخيرا، تحية من القلب لشهداء القاع وتحية كبيري لشهدا الجيش والقوى الامنية”.