.jpg)
فكّرت شو بكتبلك بْعيدَك
ما لْقَيْت بكتابي أنا شي خَرْجْ…
بدّي حرف
يشقع ع قَشْعَك بِرْجْ…
بور الحكي…
وإنتِ مقامك مَرْجْ…
وكلمة حيالله أيش بتزيدَك!!؟
معليش نشحد عا مْواعيدَك!؟
إنتِ الحكمة دلق، تبقى، وكَرْجْ
كلما يا بيّي نْفضت تجعيدَك
ويبقى الحرف مفكوش ماشي عَرْجْ
إلّا بإيدَك…
عيرني إيدَك…!
بتجوز العياري…
ما في مْحلَّك…
من وين في متل الإخِتْياري!؟!؟
وبيجوز تبقى تْعيرنا ظلّك
إنت لِ بتدلف مجد عا حِلَّك…
بعرف مجد لبنان إجباري
لكن سمعتو شي قِفي مْطلّك:
“خايف لا ينقص كَيْل بِجْراري”…!
في فرد شغلة ضِبّها كِلَّك
لا تْعير مِنّا لقمِة “دْواري”
وْ نِ عْتزْت، خود بْلاش يا شاري:
شعب لْ بيحبّك طلّ ت يْقلّك
“عِمْري خدو مِلْكَك… مَو عْياري!”
****
عمرَك مَنُو ستّة بعد تسعين
عمرك عمر تاريخنا كلّو
عطرك عبق بخور قنوبين
مجدك مشفّق عالأرز ظلو
ما كان شعنن بالشتي صنين
لو ما جْبينو
بْشَيبتك بَلّو!
صلّب يا بطرك:
عجقة شياطين
إلا بصليبك ما رح يفلّوا!
… وْلا تلوّح بإيدَك،
ما فيك تْفِلّ
من بالنا، مْن قلوبنا…
و”الكِلّ”…
ولا تْقول “خِتْيَرْنا عَ شي عَرْكة”…
ولو مَرّ ٥ سنين،
ما بْيِنْحَلّ
إيمانّنا بهالوجّ والبَرْكة!
نحنا لِ شْربنا بعد منّك خَلّ
منقولها وشو همّنا لْ “بَرْكي؟!”:
لولا تلاتين التانية بِتْطلّ
ومِيتَيْن بطرك يمرقوا،
بتضلّ
وحدَك يا بيّي “سيّد بكركي”!
****
نحنا يا بَيّي كتار… قدّسناك
عَ حْياتَك، وللشعب مَقْدِرْتو:
شو هَمّ لو قالولنا “كْفَرْتوا!”؟
غصبًا عَنُن… قدّيس طوبناك!
لْ بَدّو يعادي ثورة النساك
بيكون عِمْل بْدَيْه مقبرتو…
نحنا اللي عِنّا حيصِة أْباليس
نِصّ الصلا لْ عَ تِمّ القداديس:
“شو عْلَيْه لولا ربّنا نَطرَك!؟”
إنت لْ عَ صوتك طَلْعِة مْحابيس
وعَ مَوْدحِةْ سَطرك
المكسّر كوابيس
صمغ الأرز دَخَّن: طِلِع عِطرَك!
إنت بْنَظرنا “المار والقديس
والبيّ والختيار والبطرك!”
