كتب الرفيق اندرو حبيب:
فلفشت كل وْجوهْكُن بالحِلْمْ
وِلْقيتني
مخجول من حالي…
إنتوا لْ بِيَوْم الحرب،
خيّالي،
ونحنا لْ ما عنّا عِلْم
ع الصّعب، عم نعرج بيوم السِّلْم…
نحنا لْ ما عنّا عِلْم…
من بينّا بتشوف قوّالي
كسرت بْسِعْر الدّمّ:
“شو غالي!؟”…
نحنا لِ مننعي… وما لِحِقْنا ظلْم!
فلفشتكُن…
مخجول من حالي…
وإنتوا لْ بِيَوْم الحرب،
خيّالي،
وكلما الخطر بيدقّ،
إنتوا الزِّلْم…
*****
يا رْفاق، ناموا عالهدا…
ولا تفزعوا
نْ مغّط بِساعاتو المدى،
نحنا ما عنّا وقت، نتعكّر…
لا تفزعوا
نْ مِنْبَحّ موّال الحِدا
وما ضلّ مطرح للحكي…
عِنّا صدى…
وما في صدى، عالصوت متنكّر…
لا تفزعوا،
مين قال رح ننسى حدا؟!
شعبي ما رح ينسى… بْيِتذكّر
كلّ اللي خلّو الباب،
لِمْ دقّوا العدا،
بْ وجّ العدا، بالدّمّ يتسكّر…!!!
*****
قَوْلَك مننسى، والدّهر قَلْبة؟
وهَمّ القِلِبْ، ياخد رهج همَّك!؟
لا تخاف…
ما يْهمَّك!
نحنا مننسى!؟
كيف!؟
والطَّلْبة:
بْخَشِّة حْبوبا، مْنطلع نْشمَّك…!!
نحنا مننسى!؟
كيف!؟
والحَلْبة:
بَعْدو ترابا مْطرطش بْدمّك…!!!
نحنا مننسى!؟
كيف يا قلبي!؟!؟
وعِنّا الجّرس،
دقّو دمع إمَّك…!!!؟؟؟
*****
وفي صوت عَ “التّلّة”
ما بتعرف نْ كنّو مْلاك متجلّي
يَمّا عم بْيِبْرد رِمْحْ…
نحنا ما درنا خدّ تاني سَمْحْ…
نحنا المواسم زِلم…
مَيْ قِلّة!
و”إنتوا القلّة” فكرك تقلّي!؟
شفت الخطر،
لو دقّ،
لنّو لَمْحْ؟!:
لمّوا البيادر هالعِدا غلّة…
نحنا ما درنا خدّ تاني سَمْحْ…
شفت الخطر،
لو دقّ،
لنّو لَمْحْ؟!:
بالمسبحة الزيوان مِنفَلّي…
والمبخرة، نْ كَنّا سنابل قَمْحْ:
بالمنجل حزيران بيصلّي…