شو بدّك يا ملحم؟

أنا شاب لبناني متلي متل كل الشّباب والصبايا يلّي تخرّجوا من الجامعة مش شايف  بمستقبلي غير الهجرة ومش شايف بلبنان غير الذّكريات… لأنّو مش شايف مستقبل لهل بلد يلّي عايش فيه، مش شايف أمل للتطوّر وبطّلت ناطر يصير عنّا دولة تحميني وتخاف علّي وتسمحلي عيش بكرامة! كنت بلّشت إتأقلم مع هيدي الفكرة…

شو جابك؟ شو جيت تعمل؟ ليش عم تعمل هيك؟ شو بدّك يا ملحم؟

ليش ما عم تسرق؟ ليش ما عم تستغل الفلتان بالدولة لتعمل ثروة؟ ليش ما عم تعمل وسايط؟ ليش ما فوّتت أصحابك على الوزارة؟ ليش ما وظّفتني بالدولة وقلتلّي خلّيك بالبيت والمعاش بيوصلّك كل آخر شهر؟ ليش ما عيّنت رئيس مجلس إدارة لتلفزيون لبنان ع ذوقك؟ ليش ما بدّك مواكبة كبيرة؟ ليش عم تستقبل المواطنين كل أربعاء بلا موعد؟ ليش وليش وليش؟!! عم تتظاهر بنظافة الكف قدام العالم؟ طيّب إذا هيك، صحيح إنو يلّي عم بقدموا على إدارة تلفزيون لبنان كتار، في قسم منهم عندهم الكفاءة المطلوبة، بس ليش ما عم تعمل واسطة لأصحابك يلّي هنّي جزء من هل قسم الكفوء؟ ما حدا رح يعرف صدّقني! وأصلا إذا عرفوا، مين إلو معك؟! مين رح يحاسبك؟!… ما بدّك؟ طيّب ليش؟!!! ليش لمّا أحد الأشخاص اتّصل فيك وطلب منك وظيفة لصديقو كان جوابك “خلي يقدم طلب، وإذا كان كفوء بيتوظّف”؟

ليش؟ ليش عم تردّلي الأمل بتطوّر الدّولة؟ ليش عم تردّلي الأمل إنو معقول بيوم من الإيام عيش بلبنان وكرامتي محفوظة، والدولة عم تحميني وتهتم فيّي وما تتركني إتبهدل؟ ليش وشو بدّك يا ملحم؟ كيف قدرت تردّلّي كل هل أمل بس من خلال شغلك بوزارة الإعلام يلّي تطوّرها ما بغيّرلي شي بحياتي عمليّا!

ملحم الرياشي… مش عم بقدر عيّطلك معالي الوزير! لأنّو من أنا وصغير صورة الوزير براسي هي الإنسان يلّي ما بيسمع صوت الناس ولا بشوف تعتيرهم ولا بحس بوجعهم…! بس إنت غيّرتلي هيدي الصّورة وفرجيتني صورة الوزير الصّحيحة ويلّي لازم تكون ببلد كتار استشهدوا كرمالو تيبقى…

يا معالي الوزير، أنا بفتخر إنّو بيوم من الإيام ناضلت بصفوف القوّات اللبنانية معك بجهاز الإعلام والتواصل.

إنت فخر للقوات وفخر للبنان…

المصدر:
فريق موقع القوات اللبنانية

خبر عاجل