اعتبر رئيس مصلحة الطلاب في حزب “القوات اللبنانية” جاد دميان أنه “في زمن الحرب لبينا النداء وعلى جدران ساحات الظلم كتبنا شعار: يوم قل فيه الوفاء كنا لكم اوفياء”.
وخلال احتفال يوم الطالب في معراب، أضاف دميان: “طلاباً كنا وفي الاستشهاد أحياء، سقينا تراب لبنان، انقى الدماء. وانتهى زمن الحرب… اندثرت الغيوم وصفيت السماء… وخرج المارد المتمرد من الإعتقال وحلّ فينا الرجاء”.
وتابع: “ان كان الله معنا… فمن علينا… والله معنا وسمع الدعاء. وها انت يا يوم الطالب تطل سنة بعد سنة تروي مسيرتنا عنفواناً وصلابةً، شراباً الذ من الماء”.
وقال دميان: “طلاب القضية شعارنا، تدعونا، فنلبي النداء، فأفرحوا فينا يا اهل الارض… وهللوا لنا ايها الشهداء. هيدا تاريخنا، حاضرنا ورح يكون مستقبلنا… خلقنا مشرقيين، واختارنا الرب انو نكون لبنانيين مسيحيين وطنيين، هالهوية مع كل ما بتحملو من ثقافة، تراث وحضارة… هي قدرنا ومسؤولية كبيرة علينا انو نحافظ عليا، وبخاصةٍ “في هذه الايام البائسة” مش هيدي وصية بطرك الاستقلال التاني، طول بعمرو، مار نصرلله بطرس صفير النا؟؟؟”.
وأردف: “تاريخنا، امانة لإلنا ولولادنا، كرمال هيك قررنا السنة كمصلحة نوثق هالتاريخ ونشتغل على وثائقي منعرض في لأول مرة تاريخ مصلحة طلاب القوات اللبنانية من التأسيس حتى اليوم ورسالتي لإلكن إنو تحضرو، لانو اذا قررت تقضي على شعب نسي تاريخو. وصدقوني اول شعور بينتابكن انو قد ما تعرفوا وتسمعوا عن تاريخ المصلحة… بيبقا الي بتعرفوا … قليل…”.
وأضاف دميان: “من بعد حملة مكافحة المخدرات اللي اشتغلت عليها مصلحة الطلاب بالفترة الماضية تبنينا السنة خلال المؤتمر العام، قضية جديدة يلي هي ملف التربية وقدرنا لليوم نشتغل على 3 مراسيم لإدخال مفهوم السلامة المرورية، الرياضة والبيئة ببعدن النظري والتطبيقي بالمناهج المدرسيّة. اجتمعنا مع أغلبية الجمعيات المدنية والخطوة التالية حتكون جولة على كافة الوزراء والمسؤولين المعنيين بهيدا الملف. مثل ما دايماً عودتكم مصلحة الطلاب رح نضل سهرانين على هيدا الملف لحديت ما نوصل لكافة الأهداف”.
وتابع: “متل ما الكل شايف انو عنوان المرحلة “سقط القناع”. اعلان النوايا الحسنة بينا وبين التيار الوطني الحر يلي اثمر وصول رئيس جمهورية قوي اثمر ايضاً عن كشف النوايا السيئة اللي بيضمرا كل المدعين بالمرحلة السابقة على حرصن على وحدة المسيحيين والميثاق الوطني والوفاق ووو… طلعت القصة كلاّ إسمع تفرح، جرّب، تحزن!! وهون بحب وجه اكتر من سؤال:
اولاً: للذكرى فقط لا غير، مش حزب القوات اللبنانية كان دايماً المبادر بإعلان طروحات سباقة بناءة ومفصلية ويكون الجواب محاربة وإسقاط وتخوين؟؟ كل الهدف من الحملات الإعلامية هو إنو يجربو يزعزعو ايمان مناصرينا بطروحاتنا. فيا شباب متل ما مازبطت معن من قبل ما تخلو شي يهز ايمانكن بقضية الحزب!!
ثانياً: وينن الداعمين لقانون إنتخاب بأمّن أغلبية مسيحية بأصوات المسيحيين؟؟ رح قلكن وينن، عم بشوفو شو هو اكتر قانون بيضرب التمثيل المسيحي ليعتمدوا.
تالتاً: لا يلي بنادي بالعيش المشترك وهو يلي ستّف الخيم بوسط بيروت وعطّل الحركة الإقتصاديّة وبتر اجر وايد الحكومات لغياب احد المكونات… وينو اليوم العيش المشترك والميثاق بالتمديد رغماً عن ارادة المسيحيين؟؟
رابعاً: لكل يلي شككوا بالوفاق بين القوات والتيار، قريبين كانوا او بعيدين واعتبروا، مصلحة شخصية او اتفاق غير استراتيجي او لقاء ظرفي عابر، بسألن، رئيس جمهورية قوي، حكومة المسيحيين فيا إلن ثقل وازن، منن معارك ناجحة بحرب استرداد الحقوق؟؟ واليوم، معركة قانون الانتخاب بالظروف اللي عم تنخاض فيا، منا اقرب معركة لإكمال مسيرة استرداد الحقوق؟ حركة سياسية بالبلد مش احسن من جمود دام حوالي الـ3 سنين؟”.
وأجاب دميان: “ليلي راهنوا انو بإدارة او نقابة او بلدية او مخترة، الوفاق بينهز وبيسقط وهو مع جماعتو على مبادئن ثابتون، جوابي قلو نحنا كمان على مبادئنا ثابتون وزيادة عن هيك برؤيتنا السياسية والاستراتيجية… صائبون.
اما الجواب على كل هل اسئلة هو التالي: صحيح انو بيتطلّب زمننا اليوم انو لنكون منظّمين ونشتغل بنطاق الدولة و بالاطر المظبوطة انو نكون عم نشتغل تحت نطاق حزب مسجّل بوزارة الداخلية انما، مش هيدي القوات اللبنانية، القوات اكبر بكتير من حزب، القوات قصة تاريخ ونضال وحرية، القوات عيلة وأرض وبيت، القوات نهج وفكر و مشروع، القوات مسيرة عمرها اكتر من ١٤٠٠ سنة، القوات نقطة زيت بكباية المي. قد ما حاولو يدوّبو هيدي النقطة بالمي ان كان بحرب او بتهجير او بكم مقعد وزاري او بقانون انتخابات، بآخرة النهار هيدي النقطة حترجع تفوش على وجه المي”.
وختم متوجهاً لرئيس حزب “القوات” سمير جعجع قائلاً: “كرمال هيك حكيم باسم الصبايا والشباب بمصلحة طلاب القوات اللبنانية بقلك: ارثوذكسي او مختلط. نسبي او اكثري. ٦٠ او 120. مع وفاق بلا وفاق. مع حلفاء او بلا حلفاء. نحن ضد التمديد ونحن مع التجديد. حكيم نحن للانتخابات جاهزون، تحت اي قانون ان شاء الله منتصرون، في سبيل قضية القوات في كل الظروف عاملون… بقيادتكم الحكيمة واثقون”.