“بحبك يا لبنان”

“بكرا انت وجايي”

فيروز رح بتخبرك…

“عن بلد العيد… المزروعة ع الداير نار وبواريد”…

وبتقلك دخيلك….

تفرج عَ هالمزرعة لي عم بتكبر وبتزيد…

وبتفسرلك ليش “نحنا والقمر جيران”…

لانو هوي الوحيد لي بيضوي علينا تنقرى قصص جبران

وفيروز… ما تشدي العزيمة

قوليلو الـ”قهوة عالمفرق”…. انكسر صاحبها…

وبالديون عم بيغرق

وما تنسي تأكديلو عرفنا وين “ضاع شادي”

انخطف عالهوية

وانتسى بسجون سورية

و”قديش كان في ناس عالمفرق…. تنطر ناس”

راحو بانفجار المرفأ وصارت بيروت ما بتنداس

و”الصغيرة لما بتعرف بلعب الكبار”…

قتلتها الشظايا… وشوهها الانفجار

و”راجح” سرق الخواتم

واشترى سلاح وكواتم…

وأمي ما “نامت ع بكير… ولا سكر بيي البوابي…

امي ماتت ع بكير…

من التلوث…

وماتو معها صحابي..

واذا قلتيلوا “حبيبي لوين رايحين”

ما ينسى انو “سوا ربينا”…

وحلم الأغلبية صار…

فيزا طيارة ومينا…

واذا قنعوه وصدق انو يا “حبيبي ما تتعب قلبك”…

انا كنت وبعد ورح ضل قلّو…

“بحبك يا لبنان”… يا وطني بحبك