أعلنت مراسلة “LBCI” غراسيا أنطون في تعليق “مؤثر” إصابتها بفيروس كورونا.
وكتبت عبر “فيسبوك”، ” “من شباط اشتغلت كتير ع تقارير وشاركت ببرامج وحملات توعية من فيروس كورونا… حكيت عن والدي وعن الخوف والمسؤولية… اليوم عم عيش كل شي حكيت عنو… بس بإيمان كبير انو مرحلة ورح تمرّ”.
وأضافت، “من باب الحرص على سلامة جميع اللي خالطن بالأيام الماضية… مبارح عملت فحص PCR واليوم تبلغت أنى مصابة بفيروس كورونا… العوارض بدأت بشكل كتير خفيف مساء الاثنين واشتدت مساء الثلاثاء بشكل سريع ومتعب… ومن وقتها انا بغرفتي محجورة ورح ضل محجورة 14 يوم…”.
وتابعت، “تعبانة؟ ايه، موجوعة؟ كتير، خيفانة؟ اكيد… بس مش ع حالي. ما عم وقف بكي ما بعرف اذا من الاوجاع او من الخوف ع اهلي وع بيت جدي. اشتريت كل انواع الادوية… وناطرة الفرج… فرج مفروض عمرو 14 يوم…”.
وأردفت، “بهال 14 يوم كان مفروض كون عم بستقبل وشوف خطيبي اللي صرلي 8 أشهر مش قادرة شوفو من ورا كورونا واجراءات التسكير… هلق بس حلحلت، كورونا دق بابي وحرمني مرة جديدة من اللي بحبن… حتى لما صاروا قراب… كل يوم منقول الاعداد ارتفعت بشكل خيالي وكارثي، ومنروح ومنجي حاطين هالماسك كأنو اكسسوار…”.
ولفتت أنطون إلى أن “الماسك ما بيحمي بخفف نسبة انو ننعدي… بس مش يعني بس نلبس ماسك نحس حالنا عنا قدرات خارقة، لإنو العكس تماماً… سألوني من مين انعديتي.. جوابي كان ما بعرف لان ع اساس حاطة الماسك او اقله ما منسلم ولا منبوس ومنقعد بعاد ومنعقّم، والمحلات القليلة اللي عم نروح عليها ملتزمة بإجراءات وزارة الصحة، والا مش مفروض تكون فاتحة”.
وأضافت، “الفيروس بوجّع وبيزعج… بكفي الشعور بالوحدة… واتصالات الرعب: مين شفتي؟ عندك حدا مريض؟ انتبهي يطبقوا الروايا! عكل حال نصيبي… واوجاعي الجسدية والنفسية رح اتحملها 14 يوم… انتو اتوقوا اكتر ما تستخفوا لان اللي ما انصاب ما رح يفهم معنى الاصابة… صحتي ما بتهمني… بتهمني صحة اهلي! رح تتلفنو او تحكوني تسألوني كيفك… رح قلكن منيحة!”.