افتخر أنت لبناني!!

كتبت جوزفين حبشي في “المسيرة” – العدد 1718

– حبيبي؟ هيدا إنتَ؟؟؟؟ ما عرفتك. ليش ضعفان؟ ليش دقنك طالعة؟ ليش تأخّرت؟

– ناطر صرلي شي جمعة، جمعة تلحقها جمعة، هيدي مش أول مرة، ما بعبّي بنزين بالمرّة، وهالمرة مش رح إسكت، وإنتوا شهدوا يا جماعة

– برافو، أوعى تسكتلُن. فوّلت السيارة؟

– لأ، فَوَّلت معي، قمت بهدلتن ورجعت… مشي عالبيت.

– أخ. طيب، قدرت سحبت مصاري من البنك؟

– لأ. قال تخطيّت المسموح إلي بالشهر، وأكلتا بهدلة لأني كتير بعزيق.

–  شو؟؟ ما قلتلن إنو إبنك مريض وعم يسعُل وصدرو عم بيخرّ، وضروري تعملو فحص دم، وممكن تفوتو مستشفى، والمستشفى بطّلت تقبل مرضى الضمان والأسورانس، والبنج مقطوع، ومجبورين ندفع كاش؟

– قلتلن، قاموا قالولي ادهنلو صدرو زيت من مار شربل وقديسة رفقة، وغطيه منيح.

– الله وقديسينو يصطفلوا فيهن. طيب مرقت عالصيدلية وجبتلو دوا سعلة وأنتيبيوتيك؟

– مرقت حبيبتي، مرقت، قبل إضراب الصيدليات بنهار.

– Yessss… وينو الدوا؟

– مقطوع

– قطيعة تقطعن شو كذابين. ما تقلي سكتّلن؟

– أبدًا، ما سكتّلن أبدا. بهدلتن وقلتلن: تفو عليكن .. لأ، لأ بلاها تفو عليكن، إهانة هيدي، قلتلن يا عيب الشوم عليكم، 3 مرات باليوم، قبل الأكل وبعد الأكل ولمدة أسبوع.

– ع سيرة الأكل، وين الدجاجة؟ بدنا نعملو صحن شوربة للصبي.

– احترمي حالك حبيبتي، صار إسما لايدي دجاجة. ما تحلمي تشوفيها وتشميها وتفصفصيها بعد اليوم.

– حلو كتير. طيب لقيتلو حليب؟

– ما تعصبيني وتخلّي حليب النَوَر يفور هلأ. عن أيا حليب عم تحكي؟ صار إسمو لبن العصفور.

– حاصلو، شو بدو ياكل الصبي هلأ؟

– …

– ولووو!!! هيدا إبنك يا بلا قلب.

– شو وقفت على إبني؟ كلنا يعني كلنا آكلينا… بالعتيقة، ومن ساواك بنفسه ما ظلمك. شو متوقعة مني طعميه؟ … جديدة؟ إنسي، سعرا أغلى 4 مرات من معاشي.

للإشتراك في “المسيرة” Online:

http://www.almassira.com/subscription/signup/index

from Australia: 0415311113 or: [email protected]​​​​