هابي تعتير يير

كتبت جوزفين حبشي في “المسيرة” – العدد 1723

-هابي تعتير يير، هابي تعتير يير.

-يا تعتيري، جنّ الزلمة. شو عم بتغني يا بو توفيق؟ هيدا الزوهايمر عامل عمايلو فيك. من وين طلعتلي بالتعتير؟ بيقولوا «هابي نو يير، نو، نو يير»، وبعدين بعد بكير عال «نو يير». بعد ما خلصت ال2021، معقول بعد تبيضها.

– ليش بقي شي ما خلّصت عليه ال2021؟ بعدين بكير على شو يا خرفانة؟ وأيا تبيّضها أيا بلوط؟ صرلنا 5 سنين بالتعتير، و365 يوم بالعتمة وبالمجارير، وختامها مسك إذا الله راد.

-العمى شو بتنق. أكيد ختامها مسك، طوّل بالك شوي، أنا أكيدة إنو السنة الجايه رح بتجيبلنا الخيرات والبحبوحة.

-ما حدا غيرك إنتي وعهدك رح بتجيبولي آخرتي يا إم توفيق. بحبوحة شوووو؟؟؟؟ انبحّ صوتي أنا وقلك البلد بح، وإنتي ديّنة من طين وديّنة من عجين.

-خليك متفاءل يا بو توفيق.

– كان بودّي، بس كيف ساقبت، أنا كمان ما خلّوني… إتفاءل.

-بكرا شوف إنو الجايه أحسن من اللي راح، وسنة 2022 رح تكون أفضل سنة ع لبنان. مش الرئيس قال بعضمة لسانو إنو بدو يسلّم البلد أحسن مما استلمو؟

-معك حق يا إم توفيق عبد اللطيف. دخلك، عن أيّا رئيس عم تحكي؟ جان عبيّد؟

-ييييي، ذكرتني بغنيّة صباح «عبدو عبيد عبيدو». ع سيرة صباح والنو يير، وين ناوي تسهّرني ع راس السنة؟

– بجهنم الحمرا. شو عذوقك؟

-أكيييد عذوقي. الحمرا بتجنن. وفي إلنا فيها ذكريات حلوة. بتتذكر لما كنت تسهّرني بالزمانات  بالـ«كيت كات» ؟

– قلتيلي أنا اللي معي زوهايمر؟ ال»كيت كات» ما كان بالحمرا يا إم توفيق. كان عالزيتونة .

-أصلاً الخبزة والزيتونة أطيب شي، والمهم السهرة. بدنا نرقص ونهيّص يا بو توفيق. قولك بعدو فاتح ال»كيت كات»؟

– سكّري عالموضوع يا أم توفيق. عن جد عصبتيني، كل شي انفتح محلات بلبنان بالتسعينات، عهدك سكّرن كلن يعني كلن بسنة  ال2021. وبدك ال»كيت كات» يكون بعدو فاتح؟

– إيه، مزبوط، معك حق، بس تسكيرة ال»كيت كات» ما خص العهد فيها. حرام الظلم يا بو توفيق.

للإشتراك في “المسيرة” Online:

http://www.almassira.com/subscription/signup/index

from Australia: 0415311113 or: australia@almassira.com​​​​