بو عاصي من المتن الأعلى: علينا رسم مصيرنا بيدنا في صناديق الإقتراع

أقام مكتب الشباب في منطقة المتن الأعلى في حزب القوات اللبنانية، لقاء لمناسبة الأعياد في بزبدين، تعذّر النائب بيار بو عاصي حضوره، لكنه تواصل مع الشباب وقال لهم إنه “للأسف ما رح فيي كون معكن اليوم، بس رح يكون عندنا محطات كتيرة تجمعنا لانو القضية بتجمعنا. قضية الوجود والدور المسيحي بلبنان. قضية الدولة اللبنانية يللي بتحفظ سيادتنا وتعدديتنا وديمقراطيتنا. قضية الانسان بلبنان وحقه بالسعادة وتحقيق ذاته وخاصة انتو، عنصر الشباب.
حاوَلو يتعاملو معنا كأننا ضيوف بوطننا. سرقو اموال الناس وتعبها. وبعدهن بنفس التعالي والاستكبار. نسيو انو الذل ما بيصيب يللي بينسرق، انما الذل بيطال الحرامي السارق. الحرامي جبان ولو ما كان فاشل وجبان ما صار حرامي. الحرامي بينسى انو اذا قدر سرق مال الكهرباء والمال العام ما بيقدر يسرق هوية الناس واحلامن. بعد كم شهر، واصلين لانتخابات نيابية. بعد كم شهر علينا ناخد مصيرنا بايدنا ونتصرف كمواطنين ببلدنا مش كسيّاح.
الكلمة رح تكون للناس وكل فرد منا قادر يعمل الفرق. بالانتخابات الجاية رح فينا نقول لحزب الله ولكل مين غطّى سياسته واستفاد منو وتواطأ معو انو لبنانهم التابع للهيمنة الايرانية ما بيشبه بفقرو وعزلتو وانهيار دولتو لبنان يللي حلمنا فيه واشتغلنالو ودافعنا عنو. لبناننا هوية تاريخية وعلم وانفتاح وازدهار.
مرفأنا شط امان وصِلة وصل مع العالم. مرفأهن موت ودمار واستحالة تحقيق جدي”.
وأضاف أنه ” بتمنالكن من قلبي اجتماع موفق ببيت رفيقنا عبدو بعقليني. كل شاب وصبية منكن معنيين بقضيتنا قدي واكتر. سوى منخلّص المتن الاعلى وبعبدا وكل لبنان. مع كامل محبتي وتقديري”.​

خبر عاجل