شفتو النور؟… أكيد مش جبران!

كتبت جوزفين حبشي في “المسيرة” – العدد 1725

ـ يا إم توفيق، يا إم توفيق وينك؟؟؟؟

– عم قشّر بطاطا، أيش في؟

– شوفيلي مين هالجوز عالتلفزيون؟

– الله ينجينا من الزوهايمر. ما عرفتا يا بو توفيق؟ هيدي كارمن.

– كارمن؟ يه يه يه، تغيّرت كتييير من ال2020 لهلأ. دخلك ما كان عندا تالولة كبيرة بدقنا؟

– حاج تخبّص. هيدي ممثلة الفلك والشمس. بس هيدا القمر اللي حدا مين؟؟؟ بيشبه قمر الـ OTV  الغالي بايام الكسوف.

– شو عم بيقولوا يا أم توفيق؟ ما عم بفهم عليهم ولا كلمة. ترجميلي.

– يه يه يه، معقوووول؟

– أيش في يا إم توفيق؟ طمنيني؟

– الهيئة هيدا… الحكيم.

– شوووو؟؟؟ الحكيم؟ الحكيم ما غيرو؟ كمان مغيّر عليي. مخفف دقنو وعامل سكسوكي. مش لابقتلو.

– ولِك لأ. إسمو الحكيم نشأت مدري شو. والهيئة هو  نبي.

–  نبي؟ نبي جبران؟

– أكيد لأ، صحيح عندو طاقة، بس ما خصو لا بجبران ولا بالكهربا. سماع كارمن شو عم بتقول: «لو كنتم ترون لرأيتم النور فوق لبنان منذ أسبوعين، ولشعرتم بقوة بالنور الإلهي، ولو تأملتم قليلاً لعرفتم أنكم الآن أكثر أماناً تحت جناح النور الساطع». شفت؟ لا شفنا نور ولا ساطع. أكيد هيدا مش جبران.

– امبلا، أكيد جبران، بس الشعب أعمى. اسمعي إنتي شو عم بتقول: «لو كنتم ترون  لرأيتم النور فوق لبنان»، بس للأسف ما بدّن يشوفوا. شعب جاحد.

– روق يا تسلملي روق، هلأ بيطلع ضغطك. روق واستبشر بالخير، لأنو الهيئة هيدا النبي الجديد هو المنقذ والمرسل من السما على لبنان ليخلصنا من جهنم.

– باااااطل. تفوووو على هالحكي. اطفي هالتلفزيون، اطفيه هلأ وبسرعة.

– ولِك شو صرلك يا بو توفيق؟ انلطشت متلن؟

– بعد ناقص نقبل بمنقذ من السما ليخلصنا من جهنم. من وين نبشوه لهالمنقذ؟ من القمر؟؟؟ إنو  قمر بعبدا من شو بيشكي؟ مش حلو هيك. حلو الوفا، وأنا وفيّ لقمرنا، وما ممكن إتخلى عنو، وعالجنة ماني رايح، وعلى جهنم وراه وراه. حلو الوفا وأنا معو عالحلوة والمرة.

– روق، روق يا بو توفيق، الهيئة الرسول عصّب من اللي عم يتمسخروا عليه. يه يه يه، بلّش يشتمن ويكبّر بالحكي.

– مش لابقلو. حتى لو جرّب يتشبّه بقمرنا، ما بيوصل لكعب إجرو. بعد ناقص، شو جاب لجاب.

– روق يا بو توفيق روق، الهيئة الرسول من جماعتنا. عم بيدافع عن قمرنا .

– والله؟؟؟؟ شو، شو عم بيقول؟

– عم بيقول «عيب عليكن تشتموه».

– ع سلامتو هالرسول. قلتلك هيدا نبي جبران، ما صدقتيني.

للإشتراك في “المسيرة” Online:

http://www.almassira.com/subscription/signup/index

from Australia: 0415311113 or: [email protected]