“إمّ الكل”

كتبت  في “المسيرة” – العدد 1726

– بيّي، فكرت شو بدك تهدي «أم الكل» هدية غير شكل بعيد الأم؟

– «أمّ الكل» جو قديح؟؟؟؟ بعد ناقص إهديه هدية. الله يهديه وينوّر عقلو ويرجّعو الى السراط المستقيم. وعهد عليّي، إذا رجعلو عقلو وصار مع العهد، لإحضرلو كل مسرحياتو أنا وأم توفيق .

– ولك أخ منك يا بو توفيق أخ. قال معك «زوهايمر». أيا «زوهايمر» أيا بلوط؟ ذاكرتك أقوى من الفيل. عم إسألك عن أمِّي.

– أمِّك؟

ـ إيه أمّي. ذاكر جو قديح وناسي أمّي؟ أمِّي، أمِّي ما غيرا.

– يا ريتني مع غيرا. أمك رح بتموتني ناقص عمر.

– يا عيب الشوم على هالحكي، هيدا جزاها لأنها متحملتك العمر كلو؟

ـ مجبورة تتحملني. مش لأنها مرتي، لأنو صدر مرسوم وزاري بإلزامية نتحمّل بعض. إذا بتخالفو، فيني دِكا بالحبس.

– طيّب، قبل ما تزتا بالحبس، خلينا نعايدها بعيدا.

– نعايد مين؟

– ولِك أمِّي، أمِّي الحنونة.

– ييييي… يلعن سيرتها، ما إجانى البلا غير منها. أصلاً لمعلوماتك أمك الحنونة ما بتطيق «بيّ الكل»، وطول عمرو الجنرال ديغول بيغار من جنرالنا.

– يه، يه، يه، رجعنا نخبّص يا بو توفيق؟

– جرافة تخبصك، احترم بيّك يا ولد.

– ولو يا بو توفيق! أمنا الحنونة طوّل عمرها واقفة حدنا. نسيت كيف إجا الرئيس ماكرون بعد الإنفجار ليدعمنا؟

– أيشك على نياتك، متل أمَّك، لا رِحتْ ولا جيت. أمنا الحنونة ما إجت هيك لوجه الله. إجت لأنو جبلنا ما راح. فهمت؟ عم بتحط على عينو. اقتنعت؟ وعلى فكرة فيروز طلعت أذكى منك يا توفيق، بتعرف أيش غنتلا لأمنا الحنونة لما راحت تزورا؟ «هيدي إمي بتعتل همي، منك إنت، ملا إنت». اقتنعت؟

– ولك أخ منك يا بو توفيق أخ، ويا حرام عليكي يا أمِّي. قال شو؟ عتلانة همّك لأنو معك «زوهايمر». حاصلو، إنسالي هلأ أمنا الحنونة وركّز معي. عم بسألك عن أمِّي، أم توفيق، مرتك منذ أكثر من خمسين سنة. شو بدنا نجبلا هدية على عيد الأم؟

– مرتي منذ أكثر من خمسين سنة؟ ليش أنا مجوّز؟

للإشتراك في “المسيرة” Online:

http://www.almassira.com/subscription/signup/index

from Australia: 0415311113 or: australia@almassira.com​​​