كتبت جوزفين حبشي في “المسيرة” – العدد 1727
-يا بو توفيق، انتبه يا رجوتي، اليوم أول نيسان، أوعى حدا يكذب عليك.
-ما تخافي يا أم توفيق، منصمد ومنربح، الكذبة ما بتدوم. شوفي كذبتهم بـ 14 آذار 2005 كيف سقطت. 33 سنة على 14 آذار الأصلية بالـ89، بقيت واستمرّت معنا من بعد ما سقط القناع عن 14 آذار المزوّرة.
– يا تعتيري، ضرب الزوهايمر معو عن جديد. عن شو عم تحكي يا خرفان؟
– أنا خرفان يا حرباية؟
– يا عيب الشوم عليك، هيك بتكافيني لأنو عم نبّهك أوعى حدا يكذب عليك بأول نيسان؟
– أنا ما حدا بيكذب عليّي. أنا بكذب عالكل.
– إيه هيك. يلا، حضّرلك شي كذبة مهضومة لليوم.
-كذبة؟
-إيه، كذبة غير شكل ممكن تقطع عالناس.
– هَربوا وبقينا لوحدنا نقاتل.
– له له له يا بو توفيق، يرضى عليك، ركّز معي، هيدي الكذبة إذا ناوي اليوم تتسلى وتكذبها على حدا، ما حدا رح يصدقك، ما بتتصدقش يا رجوتي، ما بتتصدقش.
– طيب، نحنا مش قابضين ولا منشريين، وهني ساكتين لأنّهن مموّلين من سفارة.
– سفارة؟ أيّا سفارة؟ الفرنساوية اللي ما هربنا عليها، وبقينا لوحدنا نقاتل؟ مش زابطة. غيرا.
– كلّن منشريين إلا نحنا، وهالشي بيّن حتّى بالميغاسنتر، يلّي معهم مصاري ما بدّهم الميغاسنتر لأنّهم متّكلين ينقلوا الناس على حسابهم، ويلّي متلنا ما معو ينقلهم. نص مليون حقّ التنكة.
– له له له، شفلك غيرا هالكذبة، لأنو هيدي مش كذبة أبدًا ابدًا يا بو توفيق. حرام ولو، ما سمعت بو غابريال لما خبّرنا عن مرتو كيف بتنطر بالساعات دورا بالبنك لتسحب 200 دولار؟ أكيد ما معو ينقل الناخبين. ما تظلمو يا رجوتي.
– الحرباية مش بس بتغيّر لونها، كمان بتغيّر الحقيقة، وعم بتحاول تغيّرلنا لوننا.
– شو قصتك إنت والحرباية؟؟؟ بعدين طبيعي الحرباية تغيّر لونا. كذبلك كذبة بتقطع.
– الرصاصة بتقتلك مرّة، أمّا الكذبة والشائعة بتقتلك كل مرّة.
– ولِك ريتني موت، هيدي كذبة هيدي؟ إنت أكيد ناوي تجلطني وبدّك تجبلي أجَلي.
-كهرباء بدّنا نجيب، وسدود بدّنا نعمّر، ونفط وغاز بدّنا نستخرج ونصدّر، وأموال بدّنا نستردّ، ونظام بدّنا نطوّر ودولة بدّنا نبني.
– إيه إيه حلوة كتير هيدي. قوية وجديدة ومش مستهلكة. خلص اعتمد عليها وما تغيّرها متل الحرباية.
للإشتراك في “المسيرة” Online:
http://www.almassira.com/subscription/signup/index
from Australia: 0415311113 or: australia@almassira.com