المفتاح الانتخابي… قفّل

كتبت جوزفين حبشي في “المسيرة” – العدد 1728

ـ يا جرصتنا بين الناس، كيف بتطرد المفتاح الانتخابي من بيتنا يا بو توفيق؟ زوهايمر فهمنا، كمان قلة أخلاق؟

-هو البلا أخلاق. أكيد ما فهمتي أيش كان عم بيقول. رح فهّمك أم توفيق. بكل دول العالم، وقت الانتخابات، الأحزاب بتتحالف مع اللي بيشبها بالسياسة والتفكير. ماهيك؟

-هيك.

ـ بفرنسا، «أمبوسيبل» تشوفي اليسار عم يتحالف مع اليمين، و»أمبوسيبلين تنين» تشوفي ماكرون حاطط إيدو بإيد مارين لوبين. وببلاد العم سام، «نو واااي» عمك ترامب الجمهوري يتحالف مع بايدن الديمقراطي. صح؟

ـ خلصني، لوين بدك توصل؟

– لعند هالمفتاح الانتخابي القفل اللي طردتو من شوي.

ـ يا عيب الشوم يا بو توفيق، الزلمي منا وفينا. ما فينا نبهدلو هيك.

ـ فينا، فينا. شو هني وحدن فيهن؟

ـ طيب فيك تفهمني ليش طردتو؟

-عم بيقول إنو التيار ما عندو مشكلة يسبح عكس التيار ومع التيار وبلا التيار.

يعني التيار طلع «حرباية» يا أم توفيق، بيتقلّب وبيتلوّن حسب مصلحتو.

ـ يه يه يه، هيك قال المفتاح؟

– قال لازم ننتخب ليستة التيار المتحالف اليوم مع كل اللي كان ضدن مبارح.  ومع إنو طول عمرو بينادي بشعارات الحرية والسيادة والإستقلال، وبيعارض كل الميليشيات والدويلات داخل الدولة، عم يطلب منا ننتخب اليوم سلاح أصولي وإرهابي، كان أصلاً هو (بالماضي السحييييق) واقف ضده بشراسة.

ـ له له له، مستحيل و«أنبوسيبل».

– وقال كمان لازم ننتخب ليستة التيار المتحالف اليوم مع اللي كان يسميه مبارح البلطجي، ومع اللي ما خلاه ينجز شي، ولا يبني شي، ولا يضوّي شي غير راسي اللي ضوّى وأعصابي اللي تكهربت لما سمعت المفتاح الانتخابي.

ـ روق يا رجوتي روق. صحيح التيار ما قدر يبني سدود، بس واقف سد منيع بوج أبطال مسلسلات «الإفتراء المستحيل» و»أوعى خيّك». شفت؟ التيار مش متحالف معن هول الحقودين. حبيبي يا أبو توفيق، لازم تصلّب إيدك على وجك، وتنتخب الليستا كاملة وعالعمياني. وما لازم أبدًا تزعل من تيارك. ولو!!!! ما في ثقة؟

– مين عم بيقول أنا زعلان من تياري؟ أنا زعلت من المفتاح الانتخابي القفل، ولهيك طردتو. قال التيار متحالف مع البلطجية والمهربجية والهيمنة الإيرانية والسورية قال. باااطل هالحكي. الهيئة معو زوهايمر وعم بيخرّف هالقفل الانتخابي. لا بقى تفتحيلي سيرة هالمفتاح، أحسن ما إرجع عصّب ها.

للإشتراك في “المسيرة” Online:

http://www.almassira.com/subscription/signup/index

from Australia: 0415311113 or: [email protected]​​​​​

المصدر:
المسيرة

خبر عاجل