مين قال؟ جبران قال

كتبت جوزفين حبشي في “المسيرة” – العدد 1729

يا رجوتي يا بو توفيق.

أمر؟

مش الانتخابات خلصت؟

خلصت.

ومش نحنا ربحنا وصار عنا أكبر تكتّل بمجلس النواب؟

مين قال؟

جبران قال.

إذا جبران قال، يعني مزبوط.

ومش رفعوا حيط الباطون والأسلاك من الوسط التجاري ببيروت، وفتحوا الطريق قدام مجلس النواب؟

مين قال؟

التلفزيون قال.

أيّا تلفزيون؟ الـ OTV؟

أكيد الـ OTV، ليش نحنا منحضر غيرو؟

إذا الـ OTV قال، يعني مزبوط.

طيّب، بشرفك قوم. قوم  كزدرني ببيروت. عبالي إتفتل شوي بساحة النجمة وإتصوّر قدام المجلس.

جنّيتي يا أم توفيق؟ أفيناش نفوت عالمجلس. في حيط باطون وأسلاك حتى ما يهجموا “الزعران” ع نوابنا الأوادم.

يييه علينا، رجعنا للزوهايمر؟ شالوه للحيط شالوه، ما “الزعران” بطلوا “زعران” وصاروا نواب.

مين قال؟

وزير الداخلية  قال، بس لا تعتل همّ، المجلس بعدو مجلسنا، ونحنا إلنا الأكترية فيه؟

مين قال؟

لا حول ولا قوة،  جبران يا بو توفيق، جبران قال!!!

إذا جبران قال، يعني مزبوط.

طيب، يلاّ قوم.

هلأ مش فاضي.

ليش بشو مشغول من غير شرّ؟

في مسلسل بدّي إحضرو.

حبيبي يا بو توفيق، لا تفقعلي مرارتي، “مرارة الحب” باقي. العهد بيخلص وجوليا لأ. حلقة بالناقص، حلقة بالزايد ما بتأثر. ما رح يروح عليك شي. قوم.

قلتلك مشغول. في مسلسل جديد هلأ بدو يبلّش وبدّي إحضرو.

مسلسل شو؟

مسلسل “ما خلّوني” الجزء التاني. بطولة جبران و”الزعران”.

للإشتراك في “المسيرة” Online:

http://www.almassira.com/subscription/signup/index

from Australia: 0415311113 or: [email protected]​​​​​​